ଭୁବନେଶ୍ୱର, ୩।୪: କୋଭିଡ୍-୧୯ ମୁକାବିଲା ଅଂଶସ୍ବରୂପ ଶୁକ୍ରବାରଠାରୁ ଜନଧନ ଖାତାରେ ମହିଳାଙ୍କୁ ଆର୍ଥତ୍କ ସହାୟତା ପ୍ରଦାନ କରାଯିବା ନେଇ ସରକାର ପଦକ୍ଷେପ ନେଇଛନ୍ତି। ଏହି କାର୍ଯ୍ୟକ୍ରମ ଅନ୍ତର୍ଗତ ଦେଶର ୨୦ କୋଟି ମହିଳାଙ୍କୁ ମାସିକ ୫୦୦ ଟଙ୍କାର ସହାୟତା ରାଶି ସରକାର ବ୍ୟାଙ୍କ ଖାତାରେ ସିଧାସଳଖ ପ୍ରଦାନ କରିବେ। ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଅନ୍ତର୍ଗତ ଏହି ଅର୍ଥ ରାଶି ପ୍ରଦାନ କରାଯାଉଛି। ଏହି ସମୟରେ ହିତାଧିକାରୀ ବ୍ୟାଙ୍କରେ ଭିଡ ଜମାଇବାର ଆଶଙ୍କା ରହିଛି। ଭିଡକୁ ନିୟନ୍ତ୍ରଣ କରିବା ସହ ହିତାଧିକାରୀ କିଭଳି ସେମାନଙ୍କ ଅର୍ଥ ପାଇପାରିବେ ତାହା ନିଶ୍ଚିତ କରିବାକୁ କେନ୍ଦ୍ର ସରକାର ବ୍ୟାଙ୍କଗୁଡିକୁ ନିର୍ଦ୍ଦେଶ ଦେଇଛନ୍ତି। ଲୋକଙ୍କୁ ସହଜରେ ପାଣ୍ଠି ଯୋଗାଣ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଭିଡିଓ କନଫରେନ୍ସି ଯୋଗେ ଆଲୋଚନା କରିଛନ୍ତି। ସେହିଭଳି ବ୍ୟାଙ୍କଗୁଡିକରେ ସାମାଜିକ ଦୂରତ୍ୱ ରକ୍ଷା କରିବା ଲାଗି ଆର୍ଥତ୍କ ସେବା ବିଭାଗ ପରାମର୍ଶ ଦେଇଛି। ଅଧିକ ସଂଖ୍ୟକ ଲୋକ ଯେଭଳି ଶାଖା ନ ଆସନ୍ତି ସେଥି ଲାଗି ଆକାଉଣ୍ଟ ନମ୍ବର ହିସାବରେ ଦିନ ଧାର୍ଯ୍ୟ ହୋଇଛି। ବ୍ୟାଙ୍କ ଖାତାର ଶେଷ ସଂଖ୍ୟା ୦ ଏବଂ ୧ ରହିଥିଲେ ହିତାଧିକାରୀ ଶୁକ୍ରବାର ବ୍ୟାଙ୍କ ଆସିବେ। ଆକାଉଣ୍ଟ ନମ୍ବରର ଶେଷ ସଂଖ୍ୟା ୧ ଏବଂ ୨ ରହିଥିଲେ ଶନିବାର, ୩ ଏବଂ ୪ ରହିଥିଲେ ସୋମବାର ଦିନ ଧାର୍ଯ୍ୟ ହୋଇଛି। ପର ସଂଖ୍ୟାଗୁଡିକ ଲାଗି ପରବର୍ତ୍ତୀ ବାର ଧାର୍ଯ୍ୟ ହୋଇଛି। ଯଦି କୌଣସି ଗ୍ରାହକ ଧାର୍ଯ୍ୟ ଦିନରେ ସେମାନଙ୍କ ଅର୍ଥ ଗ୍ରହଣ କରି ପାରିଲେ ନାହିଁ, ୯ ତାରିଖ ପରେ ବ୍ୟାଙ୍କ ଖୋଲାଥିବା ଦିନଗୁଡିକରେ ଅର୍ଥ ରାଶି ଗ୍ରହଣ କରିପାରିବେ। ଲୋକଙ୍କୁ ସୂଚନା ଦେବା ଲାଗି ମୋବାଇଲରେ ମେସେଜ ଦିଆଯିବାର ବ୍ୟବସ୍ଥା ହୋଇଛି। ଏହି ସମୟରେ ବ୍ୟାଙ୍କ ଶାଖା ପୂର୍ବବତ ୧୦ ଟାରୁ ୪ ଟା ଯାଏ କାର୍ଯ୍ୟ କରିବ। ଏହି ସୂଚନା ଗ୍ରାହକଙ୍କୁ ଗ୍ରାମ ପଞ୍ଚାୟତ, ବିସି ପଏଣ୍ଟ, ଶାଖା କାର୍ଯ୍ୟାଳୟ ଏବଂ ସୁବିଧା କେନ୍ଦ୍ରରେ ମିଳିପାରିବ ବୋଲି ସୂଚନା ରହିଛି। ୩ ମାସ ଯାଏ ହିତାଧିକାରୀ ପ୍ରତିମାସ ୫୦୦ ଟଙ୍କାର ସହାୟତା ପାଇବେ। ଏ ଯୋଜନା ସମ୍ପର୍କରେ ମାର୍ଚ୍ଚ ୨୬ରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ଘୋଷଣା କରିଥିଲେ। ଉକ୍ତ ଯୋଜନାରେ ସରକାର ମୋଟ୍ ୩୧ ହଜାର କୋଟି ଟଙ୍କା ଲୋକଙ୍କ ବ୍ୟାଙ୍କ ଖାତାରେ ପ୍ରଦାନ କରିବେ।
