ବନ୍ତ, ୨୯।୬ (ସ୍ବ.ପ୍ର.) – ଭଦ୍ରକ ଜିଲା ବନ୍ତ ବ୍ଲକ ଆଗରପଡ଼ା ଅଞ୍ଚଳରେ ହାତୀ ଆତଙ୍କ ଦେଖାଦେଇଛି। ଏକ ମାସରୁ ଊର୍ଦ୍ଧ୍ୱ ହେବ କେନ୍ଦୁଝର ଜିଲା ହଦଗଡ ହସ୍ତୀ ଅଭୟାରଣ୍ୟରୁ ଗୋଟିଏ ଦନ୍ତାହାତୀ ସମେତ ୩ଟି ହାତୀ ଚାଲି ଆସି ଆଗରପଡ଼ା ଓ ଏହାର ଆଖପାଖ ଅଞ୍ଚଳରେ ରହୁଥିବା ସ୍ଥାନୀୟ ଲୋକେ ପ୍ରକାଶ କରିଛନ୍ତି। ୩ଟି ହାତୀ ସାଳନ୍ଦୀ ନଦୀ ଆରପଟେ ଥିବା ଘଞ୍ଚ ଜଙ୍ଗଲରେ ରହୁଥିବା ଜଣାପଡ଼ିଛି। ଦିନରେ ଜଙ୍ଗଲ ଭିତରେ ଆଉ ରାତିରେ ଗଁ।କୁ ପଶି ବହୁ କ୍ଷୟକ୍ଷତି କରୁଥିବା ଲୋକେ କହିଛନ୍ତି। ହାତୀ ବହୁ ଚାଷୀଙ୍କ ବାଡ଼ିରେ ପନିପରିବା ଦଳିଚକଟି ନଷ୍ଟ କରିଦେଉଛନ୍ତି। ସାଳନ୍ଦୀ ନଦୀ କୂଳରେ ଥିବା ପାଟକନା, ରାଉତରାପୁର, ମହାନ୍ତିପଡ଼ା, ହଳଦିପହଣି, କାଣ୍ଡବା ଓ ଗୋପୀନାଥପୁର ଆଦି ଗ୍ରାମକୁ ହାତୀଗୁଡ଼ିକ ପଶି କ୍ଷତି ଘଟାଇ ଚାଲିଛନ୍ତି। ବାଡ଼ିବଗିଚା ଛାଡ଼ି ଯାଉ ନ ଥିବାରୁ ଲୋକଙ୍କ ମନରେ ଆତଙ୍କ ଖେଳିଯାଇଛି। ସନ୍ଧ୍ୟା ହେଲେ ଏହି ଗଁା ଲୋକେ ତାଟିକବାଟ ଦେଇ ଘରେ ରହୁଛନ୍ତି।
ଗତ ଗୁରୁବାର ଦିନବେଳା ରାଉତରାପୁର ଗ୍ରାମ ନିକଟରେ ଏକ ଆମ୍ବତୋଟାରେ ଦନ୍ତାହାତୀକୁ ଦେଖି ଲୋକେ ଭୟଭୀତ ହୋଇଯାଇଥିଲେ। ଫଳରେ ସେମାନେ ସନ୍ଧ୍ୟା ପରେ ଘରୁ ବାହାରି ନ ଥିଲେ। ଉଲ୍ଲେଖନୀୟ ଯେ, ପୂର୍ବରୁ ଆଗରପଡ଼ାରୁ ମାତ୍ର ୪ କି.ମି. ଦୂର ସୋସୋ ଥାନା ଅନ୍ତର୍ଗତ ମରଚାଇପଦା ଗ୍ରାମର ଜଣେ ମହିଳା ଆମ୍ବ ତୋଳିବା ପାଇଁ ଯାଇଥିବା ବେଳେ ହାତୀ ତାଙ୍କୁ ଦଳି ଦେଇଥିଲା। ତୋଟାରେ ଆମ୍ବ, ପଣସ ଓ ସପୁରି ସବୁ ସରିଯିବା ପରେ ଖାଦ୍ୟ ପାଇଁ ହାତୀ ଏବେ ଗଁ।ମୁହଁ। ହୋଇଥିବା କୁହାଯାଉଛି। ଆଗରପଡ଼ାରେ ୩ ହାତୀ ବୁଲୁଥିବା ଖବର ପାଇ ଭଦ୍ରକ ଡିଏଫ୍ଓ ଅମ୍ଲାନ ନାୟକଙ୍କ ନିଦ୍ଦେର୍ର୍ଶକ୍ରମେ ଭଦ୍ରକ ରେଞ୍ଜ ଅଫିସର ରଣଜିତ ମହାନ୍ତି, ଆଗରପଡ଼ା ଫରେଷ୍ଟର ବସନ୍ତ କୁମାର ମାଝିଙ୍କ ନେତୃତ୍ୱରେ ବାସୁଦେବପୁର ବନ ବିଭାଗର ଏକ ୧୦ ଜଣିଆ ଟିମ୍ ଏହି ଅଞ୍ଚଳରେ ରାତିରେ ପହରା ଦେବା ସହ ହାତୀ ଉପରେ ନଜର ରଖିଛନ୍ତି। ଆନନ୍ଦପୁର ଓ ଭଦ୍ରକ ବନ ବିଭାଗ କର୍ମଚାରୀମାନଙ୍କ ଦ୍ୱାରା ପହରା ଚାଲୁ ରହିବ ବୋଲି ବନ ବିଭାଗ ସୂତ୍ରରୁ ଜଣାପଡ଼ିଛି। ଶତାଧିକ ଜନସାଧାରଣଙ୍କ ସହଯୋଗରେ ଲାଇଟ ସହିତ ନିଅଁାହୁଳା ଏବଂ ବାଣ ଫୁଟାଇ ହାତୀଙ୍କୁ ଘଉଡ଼ା ଯିବାର ଯୋଜନା କରାଯାଇଛି। ବନ ବିଭାଗ ହାତୀ ଉପରେ ତୀକ୍ଷ୍ଣ ଦୃଷ୍ଟି ରଖିଛି।
