ନୂଆଦିଲ୍ଲୀ,୨୭-୧୧: ଦେଶର ଆଇଟି ଶିଳ୍ପରେ ଛଟେଇ ଧାରା ବନ୍ଦ ହେବାର ନାଁ ଧରୁନାହିଁ। ଆଗାମୀ ଗୋଟିଏ ବର୍ଷ ମଧ୍ୟରେ ଆଇଟି ଶିଳ୍ପରେ ୧ ରୁ ୨ ଲକ୍ଷ କର୍ମଚାରୀ ଛଟେଇ ହେବାର ଆଶଙ୍କା ରହିଥିବା ବଜାର ବିଶେଷଜ୍ଞମାନେ କହିଛନ୍ତିି। ଇନ୍ଫୋସିସ ଏବଂ କଗ୍ନିଜାଣ୍ଟ ଭଳି କମ୍ପାନୀ ଗତ ୬ ମାସ ମଧ୍ୟରେ ଅନେକ କର୍ମଚାରୀଙ୍କୁ ଛଟେଇ କରି ସାରିଛନ୍ତି। ଏହି ସମୟ ମଧ୍ୟରେ ଆଇଟି କମ୍ପାନୀଗୁଡିକ ସେମାନଙ୍କ ଅତିରିକ୍ତ ଶ୍ରମ ଶକ୍ତିକୁ ଛଟେର ଧାରା ଜାରି ରଖିବେ। ଆଗାମୀ ୩ ବର୍ଷ ପର୍ଯ୍ୟନ୍ତ ଏହି ଧାରା ଲାଗି ରହିବ ବୋଲି ନ୍ୟାଶନାଲ ଆସୋସିଏଶନ ଅଫ୍ ସଫ୍ଟଓ୍ବେର ଆଣ୍ଡ ସର୍ଭିସେସ କମ୍ପାନୀଜ(ନାସକମ୍) ପକ୍ଷରୁ ସୂଚନା ରହିଛି। ଛଟେଇ ସତ୍ତ୍ୱେ ବିଗ୍ ଡାଟା, ଡାଟା ଆନାଲିସିସ୍, ଆର୍ଟିଫିସିଆଲ ଇଣ୍ଟେଲିଜେନ୍ସ, ମେଶିନ ଲର୍ନିଂ ଏବଂ ସାଇବର ସିକ୍ୟୁରିଟି ଭଳି କ୍ଷେତ୍ରଗୁଡିକରେ ଏବେ ମଧ୍ୟ ଆଇଟି ପ୍ରଫେସନାଲଙ୍କ ଚାହିଦା ବଳବତ୍ତର ରହିଥିବା ଜଣାପଡିଛି।
ନାସକମ୍ର ବରିଷ୍ଠ ଉପସଭାପତି ସଙ୍ଗୀତା ଗୁପ୍ତା କହିଛନ୍ତି ଯେ, ଆଇଟି ଶିଳ୍ପରେ ଏବେ ଦ୍ରୁତ ହାରରେ ପରିବର୍ତ୍ତନ ଆସୁଛି। ଏହି କ୍ଷେତ୍ରରେ ନିଜର ସ୍ଥାନ ବଜାୟ ରଖିବା ଲାଗି ନିଜର ଦକ୍ଷତା ଏବଂ ଜ୍ଞାନକୁ ବଢାଇବା ଜରୁରୀ। ଯେଉଁ ଲୋକମାନେ ଏହା କରିବାକୁ ସକ୍ଷମ ହେବେ ନାହିଁ ସେମାନଙ୍କ ଚାକିରି ଯିବାର ସମ୍ଭାବନା ରହିଛି। ଆଇଟି ଶିଳ୍ପରେ ଛଟେଇ ଧାରା ଆଗାମୀ ୩ ବର୍ଷ ଯାଏ ଚାଲିବ। ମାତ୍ର କୁଶଳୀଙ୍କ ଚାହିଦା ଏବେ ମଧ୍ୟ ରହିଥିବା ଗୁପ୍ତା ସ୍ପଷ୍ଟ କରିଛନ୍ତି। ମିଡ୍ ଲେଭଲର କର୍ମଚାରି ଛଟେଇ ଦ୍ୱାରା ବିଶେଷ କ୍ଷତିଗ୍ରସ୍ତ ହେବେ। ଏମାନେ ପରିବର୍ତ୍ତିତ ସମୟ ସହ ନିଜକୁ ପ୍ରସ୍ତୁତ କରାଇ ପାରି ନ ଥିବା କୁହାଯାଉଛି। ଏହି କ୍ଷେତ୍ରରେ ୮ରୁ ୧୨ ବର୍ଷର ଅଭିଜ୍ଞତା ଥିବା ପ୍ରାୟ ୧୪ ଲକ୍ଷ ଲୋକ କାମ କରୁଛନ୍ତି। ଏମାନଙ୍କ ମଧ୍ୟରୁ କିଛି ଲୋକଙ୍କୁ ଦକ୍ଷତା ତାଲିମ ମଧ୍ୟ ପ୍ରଦାନ କରାଯାଉଛି।
ଆଇଟି କ୍ଷେତ୍ରରେ ପ୍ରାୟ ୩ ଲକ୍ଷ ଲୋକଙ୍କର ନିଯୁକ୍ତି ହରାଇବାର ଆଶଙ୍କା ରହିଥିବା ରେଣ୍ଡଷ୍ଟେଡ ଟେକ୍ନୋଲୋଜିର ଉପସଭାପତି ୟେଶାବ ଗିରି କହିଛନ୍ତି। ଏହି ଲୋକଙ୍କୁ ପୁଣି ଥରେ ତାଲିମ ମଧ୍ୟ ଦିଆଯାଇପାରିବ ନାହିଁ। ଛଟେଇର କାରଣ କେବଳ ସ୍କିଲ ନୁହେଁ କମ୍ପାନୀ ନୂଆ ପ୍ରୋଜେଷ୍ଟ ଏବଂ ବାଣିଜ୍ୟକୁ ଧ୍ୟାନରେ ରଖି କର୍ମଚାରୀଙ୍କୁ କାଢୁଥିବା ସେ କହିଛନ୍ତି। ଆଇଟି କମ୍ପାନୀଗୁଡିକ ସେମାନଙ୍କ କ୍ଷମତାଠାରୁ ଅଧିକ ଲୋକଙ୍କୁ ନିଯୁକ୍ତି ପ୍ରଦାନ କରିଛନ୍ତି। ବଡ ପ୍ରକଳ୍ପଗୁଡିକ ଶେଷ ହେବା ଲାଗି ଅଧିକ ସମୟ ଲାଗୁଛି। ଏଭଳି ସ୍ଥିତିରେ ଏଣ୍ଟ୍ରି ଲେଭଲରେ ସ୍ଥିତି ଭିନ୍ନ ରହିଛି। ଏକ ଗଣମାଧ୍ୟମ ରିପୋର୍ଟ ମୁତାବକ ଟିସିଏସ୍ ୩୦ ହଜାର ଛାତ୍ରୀଛାତ୍ରଙ୍କୁ ନିଯୁକ୍ତି ଦେବା ନେଇ ନିକଟରେ ଘୋଷଣା କରିଥିଲା। ସେହିଭଳି ଇନଫୋସିସ ୧୮ ହଜାର ଏବଂ ଓ୍ବିପ୍ରୋ ୨୦ ହଜାର ନୂଆ ଗ୍ରାଜୁଏଟଙ୍କୁ ନିଯୁକ୍ତି ଦେବ ବୋଲି ଜଣାପଡିଛି।
