ରିଓ ଡି ଜେନେରିଓ,୧।୯(ପି.ଟି.)- ଏଠାରେ ଚାଲିଥିବା ଚତୁର୍ଥ ଆଇଏସ୍ଏସ୍ଏଫ୍ ରାଇଫଲ/ ପିସ୍ତଲ ବଶ୍ୱକପ୍ରେ ଭାରତର ଯଶସ୍ବିନୀ ସିଂ ଦେସଓ୍ବାଲ ମହିଳା ୧୦ ମିଟର ଏୟାର ପିସ୍ତଲ ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ କରିଛନ୍ତି। ଏଥିସହିତ ସେ ପୂରା ଢ଼ଙ୍ଗରେ ଭାରତ ପାଇଁ ନବମ ଅଲିମ୍ପିକ କୋଟା ହାସଲ କରିଛନ୍ତି। ୨୨ ବର୍ଷୀୟା ଏହି ପୂର୍ବତନ ଜୁନିୟର ବିଶ୍ୱ ଚାମ୍ପିୟନ ଶନିବାର ୮ ଜଣ ମହିଳା ପ୍ରତିଯୋଗୀଙ୍କୁ ନେଇ ଅନୁଷ୍ଠିତ ଫାଇନାଲରେ ୨୩୬.୭ ପଏଣ୍ଟ ସ୍କୋର କରିଥିଲେ। ପୂର୍ବତନ ଅଲିମ୍ପିକ୍ ଓ ବିଶ୍ୱଚାମ୍ପିୟନ ୟୁକ୍ରେନ୍ର ୧ ନମ୍ବର ମହିଳା ଶୁଟର ଓଲେନା କୋଷ୍ଟେଭିଚ୍ ୨୩୪.୮ ପଏଣ୍ଟ ସ୍କୋର କରି ରୌପ୍ୟ ପଦକ ହାସଲ କରିଛନ୍ତି। ସେହିପରି ସର୍ବିୟାର ଜସମିନା ମିଲାଭୋନୋଭିକ୍ ୨୧୫.୭ ସ୍କୋର କରି ବ୍ରୋଞ୍ଜ୍ ପଦକ ଜିତିଛନ୍ତି।
ଫାଇନାଲରେ ଯଶସ୍ବିନୀ ଜବରଦସ୍ତ ପ୍ରଦର୍ଶନ କରିଥିଲେ। ତାଙ୍କ ପ୍ରଦର୍ଶନ ଏପରି ପ୍ରଭାବୀ ଥିଲା ଯେ, ସେ କୋଷ୍ଟେଭିଚ୍ଙ୍କୁଠାରୁ ଅଧିକ ୧.୯ ପଏଣ୍ଟ ହାସଲ କରିଥିଲେ। ଅର୍ଥଶାସ୍ତ୍ରର ଛାତ୍ରୀ ଯଶସ୍ବିନୀ କ୍ୱାଲିଫିକେଶନ ରାଉଣ୍ଡରେ ମଧ୍ୟ ଶ୍ରେଷ୍ଠ ପ୍ରଦର୍ଶନ କରି ଓ ଏଗ୍ରିଗେଟ ୫୮୨ ସ୍କୋର କରିଥିଲେ। ଯଶସ୍ବିନୀଙ୍କୁ ବାଦ୍ ଦେଲେ ୨୦୨୦ ଟୋକିଓ ଅଲିମ୍ପିକ କୋଟା ହାସଲ କରିଥିବା ଅନ୍ୟ ଭାରତୀୟ ଶୁଟରମାନେ ହେଲେ ସଞ୍ଜୀବ ରାଜପୁତ, ଅଞ୍ଜୁମ ମୋଦଗିଲ, ଅପୂର୍ବୀ ଚାଣ୍ଡିଲା, ସୌରଭ ଚତୁର୍ବେଦୀ, ଅଭିଶେକ ବର୍ମା, ଦିବ୍ୟାଂଶ ସିଂ ପାନଓ୍ବାର, ରାହି ସାର୍ନୋବାତ ଓ ମନୁ ଭାକର।
ରିଓରେ ଏଥି ସହିତ ଯଶସ୍ବିନୀ ତୃତୀୟ ସ୍ବର୍ଣ୍ଣ ପଦକ ହାସଲ କରିଛନ୍ତି। ତାଙ୍କ ପୂର୍ବରୁ ଅଭିଷେକ ବର୍ମା ଓ ଇଲାଭେନିଲ ଭାଲାରିଭାନ ଯଥାକ୍ରମେ ପୁରୁଷ ୧୦ ମିଟର ଏୟାର ପିସ୍ତଲ ଓ ମହିଳ ୧୦ ମିଟଣ ଏୟାର ରାଇଫଲ ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ କରିଥିଲେ। ସେହିପରି ପୁରୁଷ ୫୦ ମିଟର ରାଇଫଲ ୩ ପୋଜିସନ୍ସ ଓ ସଞ୍ଜୀବ ରାଜପୁତ ରୌପ୍ୟ ଓ ପୁରୁଷ ୧୦ ମିଟର ଏୟାର ପିସ୍ତଲ ଇଭେଣ୍ଟରେ ସୌରଭ ଚୌଧୁରୀ ବ୍ରୋଞ୍ଜ୍ ପଦକ ଜିତିଛନ୍ତି।
ଶନିବାର ଅନ୍ୟତମ ଭାରତୀୟ ମହିଳା ଶୁଟର କାଜଲ ସଇନି, ପୂର୍ବତନ ବିଶ୍ୱ ଚାମ୍ପିୟନ ତେଜସ୍ବିନୀ ସାଓ୍ବନ୍ତ ଆଶାନୁରୂପ ପ୍ରଦର୍ଶନ କରି ପାରି ନ ଥିଲେ। କାଜଲ ମହିଳା ୫୦ମି. ରାଇଫଲ ୩ ପୋଜିସନ (୩ପି)ରେ ୨୨ତମ ସ୍ଥାନର ରହି ଅଭିଯାନ ଶେଷ କରିଥିଲେ ଓ ତାଙ୍କର କ୍ୱାଲିଫାଇଂ ରାଉଣ୍ଡ ସ୍କୋର ୧୧୬୭ ଥିଲା। ସେହିପରି ପ୍ରୋନ୍ରେ ତେଜସ୍ବିନୀ ୧୧୫୬ ପଏଣ୍ଟ ସ୍କୋର କରି ୪୭ତମ ସ୍ଥାନରେ ରହିଥିଲେ। ସେହିପରି ପୁରୁଷ ୨୫ମି ରାପିଡ ପିସ୍ତଲ ଇଭେଣ୍ଟରେ ଆଦର୍ଶ ସିଂ ଓ ଅନିଶ ଭାନଓ୍ବାଲା ଯଥାକ୍ରମେ ୧୩ ଓ ୧୪ତମ ସ୍ଥାନରେ ଥିଲେ। ସେହିପରି ଅନ୍ହାଦ ଜଓ୍ବାଣ୍ଡା ୪୮ତମ ସ୍ଥାନରେ ରହିଥିଲେ। ସେହିପରି ନନ୍- କମ୍ପିଟିଶନ ମିନିମମ୍ କ୍ୱାଲିଫିକେଶନ ସ୍କୋର (ଏମ୍କ୍ୟୁଏସ୍) ସେକ୍ଶନରେ ଭାରତୀୟ ଶୁଟରମାନେ ଭଲ ପ୍ରଦର୍ଶନ କରିଛନ୍ତି। ମହିଳା ଏୟାର ୧୦ ମିଟର ଏୟାର ପିସ୍ତଲ ଇଭେଣ୍ଟରେ ମନୁ ଭାକର ଓ ଇଶା ସିଂ ଯଥାକ୍ରମେ ୫୮୦ ଓ ୫୭୭ ପଏଣ୍ଟ ସ୍କୋର କରି ୧-୨ ସ୍ଥାନରେ ରହି ଅଭିଯାନ ଶେଷ କରିଛନ୍ତି।
