ଭବାନୀପାଟଣା/ଜୟପାଟଣା୧୨।୪(ସ୍ବ.ପ୍ର/ଡି.ଏନ୍.ଏ): ଓଡିଶା ଭିଜିଲାନ୍ସ ବିଭାଗକୁ ଚକମା ଦେଇ ଦୀର୍ଘ ୨ବର୍ଷ ଧରି ଫେରାର ଥିବା ଅଭିଯୁକ୍ତ ଶେଷରେ ଜଣେ ମହିଳାଙ୍କୁ ଅସଦାଚରଣ କରିବା ଘଟଣାରେ ଛତିଶଗଡ ରାଜ୍ୟ ଜଗଦଲପୁର ପୋଲିସ ଦ୍ୱାରା ଗିରଫ ହୋଇଛନ୍ତି। ଗିରଫ ଅଭିଯୁକ୍ତ ହେଲେ ଦେବୀ ପ୍ରସାଦ ପଟ୍ଟନାୟକ ଓ ସେ କଳାହାଣ୍ଡି ଜିଲା ଜୟପାଟଣାର ବୋଲି ଜଣାପଡିଛି।
ପୋଲିସ ସୂଚନା ଅନୁସାରେ, କଳାହାଣ୍ଡି ଜିଲା ଜୟପାଟଣା ବିଇଓଙ୍କ କାର୍ଯ୍ୟାଳୟରେ ଦେବୀ ପ୍ରସାଦ ଚୁକ୍ତିଭିତ୍ତିକ ଡାଟାଏଣ୍ଟ୍ରି ଅପରେଟର କାମ କରୁଥିଲେ। ଗତ ୨୦୧୮ ମସିହାରେ ବିଇଓଙ୍କ ଜାଲ୍ ଦସ୍ତଖତ କରି ଶିକ୍ଷକମାନଙ୍କ ଇପିଏଫ୍ ଆକାଉଣ୍ଟରୁ ୯୦ଲକ୍ଷ ଟଙ୍କା ଆମତ୍ସାତ କରିଥିବା ତାଙ୍କ ନାମରେ ଅଭିଯୋଗ ହୋଇଥିଲା। ଏହାପରେ ଭବାନୀପାଟଣା ଭିଜିଲାନ୍ସ ବିଭାଗ ଏହି ଘଟଣାରେ ଏକ ମାମଲା ଦାଏର କରି ତଦନ୍ତ ଆରମ୍ଭ କରିଥିଲା। ତେବେ ଏହା ପୂର୍ବରୁ ଦେବୀପ୍ରସାଦ ଫେରାର ହୋଇଯାଇ ଛତିଶଗଡ ରାଜ୍ୟ ଜଗଦଲପୁର ଠାରେ ଆତ୍ମଗୋପନ କରିଥିଲେ। ଗତ ଶନିବାର ସକାଳେ ସେ ଜଗଦଲପୁର ଧରମପୁରା ଅଞ୍ଚଳରେ ଜଣଙ୍କ ଘରକୁ ପଶିଯାଇ ଜଣେ ମହିଳାଙ୍କୁ ଅସଦାଚରଣ କରିବାକୁ ଚେଷ୍ଟା କରୁଥିଲେ। ଏହି ସମୟରେ ମହିଳାଙ୍କ ପରିବାର ଲୋକେ ଅଭିଯୁକ୍ତଙ୍କୁ ଘରେ ଅଟକ ରଖି ପୋଲିସକୁ ଖବର ଦେଇଥିଲେ। ପରେ ଜଗଦଲପୁର ପୋଲିସ ଘଟଣାସ୍ଥଳୁ ତାଙ୍କୁ ଗିରଫ କରି ସ୍ଥାନୀୟ ବିଚା ବିଭାଗୀୟ ହାଜତକୁ ପଠାଇଥିବା ଜଣାପଡିଛି ।
