ବାହାନଗା, ୬ା୮(ଡି.ଏନ.ଏ.)-ବାଲେଶ୍ୱର ଜିଲା ବାହାନଗା ବ୍ଲକରେ ଥିବା ଏକମାତ୍ର ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ନାନା ଅବ୍ୟବସ୍ଥା ଦେଇ ଗତି କରୁଛି। ଏଠାରେ ଡାକ୍ତର ନ ଥିବାରୁ ଡେପୁଟେଶନରେ ଆସୁଥିବା ଜୁନିୟର ଡାକ୍ତରଙ୍କ ଦ୍ୱାରା ରୋଗୀସେବା କରାଯାଉଛି। ଅନେକ ସମୟରେ ଜୁନିୟର ଡାକ୍ତର ମଧ୍ୟ ଅନୁପସ୍ଥିତ ରହୁଥିବାରୁ ରୋଗୀମାନଙ୍କୁ ନିରାଶ ହୋଇ ଫେରିବାକୁ ପଡୁଛି। ସୋମବାର କୌଣସି ଡାକ୍ତର ଆସି ନ ଥିବାରୁ ଅପ୍ରୀତିକର ପରିସ୍ଥିତି ଉପୁଜିଥିଲା। ଏହି ସ୍ବାସ୍ଥ୍ୟ କେନ୍ଦ୍ରକୁ ସକାଳେ ପ୍ରାୟ ୧ଶହରୁ ଊର୍ଦ୍ଧ୍ୱ ରୋଗୀ ଚିକିତ୍ସା ପାଇଁ ଆସି ଟୋକନ ନେଇଥିଲେ ମଧ୍ୟ କୌଣସି ଡାକ୍ତର ନ ଥିବାରୁ ଡାକ୍ତରଙ୍କ ଚାମ୍ବରରେ ରୋଗୀମାନେ ଘଣ୍ଟା ଘଣ୍ଟା ଅପେକ୍ଷା କରି ଅସନ୍ତୋଷ ବ୍ୟକ୍ତ କରିଥିଲେ। ଏହି ସମୟରେ ଗୋପାଳପୁର ନୋଡାଲ ଉଚ୍ଚ ବିଦ୍ୟାଳୟର ଜଣେ ୭ମ ଶ୍ରେଣୀ ଛାତ୍ରୀ ସୁନୀତା ବେହେରାଙ୍କ ଦେହ ଅସୁସ୍ଥ ହେବାରୁ ତାଙ୍କୁ ସହପାଠିନୀମାନେ ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ ା ମାତ୍ର ଏଠାରେ କେହି ଡାକ୍ତର ନ ଥିବାରୁ ଛାତ୍ରୀଜଣକ ଗୁରୁତର ଅବସ୍ଥାରେ ବାରଣ୍ଡାରେ ଶୋଇବା ପରେ ଲୋକମାନେ ଉତ୍ତ୍ୟକ୍ତ ହୋଇପଡିଥିଲେ। କେତେକ ନର୍ସ ଛାତ୍ରୀଙ୍କୁ ସ୍ବାସ୍ଥ୍ୟକେନ୍ଦ୍ରର ଶଯ୍ୟାରେ ଶୁଆଇ ପ୍ରାଥମିକ ଚିକିତ୍ସା ଆରମ୍ଭ କରିଥିଲେ। ବିଧାୟକ ପର୍ଶୁରାମ ଧଡା ଖବରପାଇ ଜିଲା ଚିକିତ୍ସାଧିକାରୀଙ୍କୁ ଅବଗତ କରାଇବା ସହିତ ତୁରନ୍ତ ଜଣେ ଡାକ୍ତରଙ୍କୁ ପଠାଇବା ପାଇଁ କହିଥିଲେ। ଏହାପରେ ସାଉଡୁ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରୁ ଜୁନିୟର ଡାକ୍ତର ଅବିନାଶ ଜେନା ଗୋପାଳପୁର ଆସି ରୋଗୀମାନଙ୍କୁ ଚିକିତ୍ସା କରିଥିଲେ। ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ୨୪ଟି ପଞ୍ଚାୟତର ବାସିନ୍ଦା ନିର୍ଭର କରନ୍ତି ା ୨୦୧୭ରେ ୨ଜଣ ଡାକ୍ତରଙ୍କ ଦ୍ୱାରା ରୋଗୀ ସେବା କରାଯାଉଥିଲା। ସେମାନଙ୍କ ମଧ୍ୟରୁ ଜଣେ ଚିକିତ୍ସାଧିକାରୀ ଭାବେ ପଦୋନ୍ନତି ପାଇବା ପରେ ତାଙ୍କର ଭଦ୍ରକ ମୁଖ୍ୟ ଚିକିତ୍ସାଳୟକୁ ବଦଳି ହୋଇଥିଲା ା ସେବେଠାରୁ ଜଣେ ମାତ୍ର ମହିଳା ଓ ପ୍ରସୂତି ଡାକ୍ତରଙ୍କ ଦ୍ୱାରା ରୋଗୀ ସେବା କରାଯାଉଥିଲା। ତାଙ୍କର ଗତବର୍ଷ ବଦଳି ହେବା ପରେ ସେଦିନଠାରୁ ଆଉ କୌଣସି ଡାକ୍ତରଙ୍କୁ ଏଠାରେ ନିଯୁକ୍ତି ଦିଆଯାଇନାହିଁ। ତେବେ ବ୍ଲକ ଅଞ୍ଚଳରେ ଥିବା ବିଭିନ୍ନ ପ୍ରାଥମିକ ଚିକିତ୍ସା କେନ୍ଦ୍ର ବା ସବ୍ସେଣ୍ଟରରେ କାମ କରୁଥିବା କନିଷ୍ଠ ଡାକ୍ତରମାନଙ୍କୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଡେପୁଟେଶନରେ ପଠାଇ ରୋଗୀ ସେବା ଚାଲିଛି। ଏଠାରେ କୌଣସି ଚିକିତ୍ସା ଅଧିକାରୀ ନ ଥିବାରୁ ବର୍ତ୍ତମାନ ୩ ମାସ ଧରି କୌଣସି କର୍ମଚାରୀ ଦରମା ପାଇପାରୁନାହାନ୍ତି।
ଉଲ୍ଲେଖଯୋଗ୍ୟ ଯେ, ଏହି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ୧୯୩୦ ମସିହାରେ ପ୍ରଥମେ ଏକ ଆୟୁର୍ବେଦିକ୍ ଉପଚାର କେନ୍ଦ୍ର ଭାବେ ପ୍ରତିଷ୍ଠା ହୋଇଥିଲା ା ପରେ ୧୯୩୭ରେ କୃଷ୍ଣପ୍ରସାଦ ଡିସ୍ପେନସାରୀ ଭାବେ ମାନ୍ୟତା ପାଇଥିଲା ା ପରେ ୧୯୪୫ରେ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଭାବେ ମାନ୍ୟତା ଲାଭ କରିଥିଲା ା ସେତେବେଳଠାରୁ ଏହି କେନ୍ଦ୍ରକୁ ରାଜ୍ୟ ସରକାର ୨ ଜଣ ଡାକ୍ତରଙ୍କୁ ରୋଗୀ ସେବା ପାଇଁ ନିଯୁକ୍ତି ପ୍ରଦାନ କରିଥିଲେ। ମାତ୍ର ଏହା ୨୦୧୦ ଅକ୍ଟୋବର ୮ତାରିଖରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଭାବେ ରାଜ୍ୟ ସରକାର ମାନ୍ୟତା ପ୍ରଦାନ କରିଥିଲେ ମଧ୍ୟ ତାହା କେବଳ କାଗଜ କଲମରେ ସୀମିତ ରହିଛି। ଗୋଟିଏ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ବିଭିନ୍ନ ବିଭାଗର ମୋଟ ୬ ଜଣ ଡାକ୍ତରଙ୍କୁ ନିଯୁକ୍ତି ଦେବାର ନିୟମ ଥିଲେ ମଧ୍ୟ ଦୀର୍ଘ ୮ ବର୍ଷ ବିତିଗଲା ପରେ ବି ଏହି କେନ୍ଦ୍ରକୁ ଜଣେ ବି ଡାକ୍ତର ବର୍ତ୍ତମାନ ସୁଦ୍ଧା ନିଯୁକ୍ତି କରାଯାଇନାହିଁ ା କେନ୍ଦ୍ରକୁ ଡେପୁଟେଶନରେ ଆସିଥିବା ସାଉଡୁ ପ୍ରାଥମିକ ଚିକିତ୍ସା କେନ୍ଦ୍ରର ଡାକ୍ତର ଅବିନାଶ ଜେନା କହନ୍ତି ଏଠାରେ କୌଣସି ବିଶେଷଜ୍ଞ ଡାକ୍ତର ନ ଥିବାରୁ ରୋଗୀମାନେ ବହୁତ ହଇରାଣ ହେଉଛନ୍ତି ା
