କଟକ ଅଫିସ୍,୧୩ା୫: ସ୍କୁଲ ଫି’ ବୃଦ୍ଧି ସମ୍ପର୍କିତ ଏକ ଜନସ୍ବାର୍ଥ ମାମଲାର ବିଚାରକରି ହାଇକୋର୍ଟ ମଙ୍ଗଳବାର ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି। କୌଣସି ଛାତ୍ରୀଛାତ୍ର ସ୍କୁଲ ଫି’ ଦାଖଲ କରିଥାନ୍ତୁ କିମ୍ବା ନ କରିଥାନ୍ତୁ, ଅନ୍ଲାଇନ୍ରେ ପାଠପଢ଼ାରୁ କାହାରିକୁ ବଞ୍ଚତ୍ତ କରାଯାଇପାରିବ ନାହିଁ ବୋଲି ହାଇକୋର୍ଟ କହିଛନ୍ତି। ସ୍କୁଲ୍ ଫି’ ବୃଦ୍ଧିକୁ ଚ୍ୟାଲେଞ୍ଜ କରି ଓଡ଼ିଶା ଅଭିଭାବକ ମହାସଂଘ ପକ୍ଷରୁ ଦାଏର ମାମଲାର ବିଚାରକରି ଏହି ଅନ୍ତରୀଣ ନିର୍ଦ୍ଦେଶ ଦେଇଛନ୍ତି ମୁଖ୍ୟ ବିଚାରପତି ଜଷ୍ଟିସ୍ ମହମ୍ମଦ ରଫିକ୍ ଏବଂ ବିଚାରପତି ଜଷ୍ଟିସ୍ ଏସ୍.କେ. ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ । ପ୍ରତ୍ୟେକ ଛାତ୍ରୀଛାତ୍ରଙ୍କୁ ଅନ୍ଲାଇନ୍ରେ ପାଠ ପଢ଼ିବା ପାଇଁ ଆଇଡି ଏବଂ ପାସ୍ୱାର୍ଡ଼ ପ୍ରଦାନ କରିବାକୁ ନିର୍ଦ୍ଦେଶ ଶୁଣାଇଛନ୍ତି। ଏହି ମାମଲାରେ ସିବିଏସ୍ଇ କର୍ତ୍ତୃପକ୍ଷ, ଆଇସିଏସ୍ଇ କର୍ତ୍ତୃପକ୍ଷ, ରାଜ୍ୟ ବିଦ୍ୟାଳୟ ଏବଂ ଗଣଶିକ୍ଷା ନିର୍ଦ୍ଦେଶକଙ୍କୁ ଜବାବ ଦାଖଲ ଲାଗି ନୋଟିସ୍ ଜାରି କରାଯାଇଛି। ଆସନ୍ତା ୨୬ ତାରିଖରେ ମାମଲାର ପରବର୍ତ୍ତୀ ଶୁଣାଣି କରାଯିବ। ମଙ୍ଗଳବାର ଏହି ମାମଲାରେ ଅଲ୍ ଓଡ଼ିଶା ପ୍ରାଇଭେଟ୍ ସ୍କୁଲ୍ ଓନର୍ସ ଆସୋସିଏଶନ୍କୁ ମଧ୍ୟ ପକ୍ଷଭୁକ୍ତ କରାଯାଇଛି। ସ୍କୁଲ ଫି’ ସମ୍ପର୍କରେ ପୂର୍ବରୁ ଦୁଇଟି ମାମଲା ଦାଖଲ ହୋଇଥିଲା। ଏହି ଦୁଇଟି ମାମଲାକୁ ଏଥିରେ ଯୋଡ଼ି ଶୁଣାଣି କରାଯିବ। ଓଡ଼ିଶା ଅଭିଭାବକ ମହାସଂଘ ପକ୍ଷରୁ ରୁଜୁ ମାମଲାରେ ନିବେଦନ କରାଯାଇଥିଲା ଯେ, ବର୍ତ୍ତମାନ ଲକ୍ଡାଉନ୍ ଯୋଗୁ ଲୋକମାନେ ରୋଜଗାର ହରାଇଛନ୍ତି। ତଥାପି ବିଭିନ୍ନ ଘରୋଇ ବିଦ୍ୟାଳୟ ପକ୍ଷରୁ ଅଭିଭାବକଙ୍କଠାରୁ ବିଭିନ୍ନ ଉପାୟରେ ଫି’ ଆଦାୟ କରାଯାଉଛି। ଏପରିକି ବସ୍ ଚାଲୁ ନ ଥିଲେ ମଧ୍ୟ ଫି’ ନିଆଯାଉଛି। ଏପ୍ରିଲ୍ ଠାରୁ ଜୁନ୍ ପର୍ଯ୍ୟନ୍ତ ତିନି ମାସର ସ୍କୁଲ ଫି’ ଆଦାୟ ନ କରିବାକୁ ମୁଖ୍ୟମନ୍ତ୍ରୀ ନିବେଦନ କରିଥିଲେ। କିନ୍ତୁ ଘରୋଇ ସ୍କୁଲ କର୍ତ୍ତୃପକ୍ଷ ଫି’ ଆଦାୟରେ ବ୍ୟସ୍ତ ଅଛନ୍ତି। ଏହାକୁ ବିରୋଧକରି ଅଭିଭାବକ ସଂଘ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲା। ଯେଉଁମାନେ ସ୍କୁଲ ଫି’ ଦେଇନାହାନ୍ତି, ସେମାନଙ୍କୁ ଅନ୍ଲାଇନ୍ କ୍ଲାସେସ୍ ପାଇଁ ବିଦ୍ୟାଳୟ କର୍ତ୍ତୃପକ୍ଷ ସୁଯୋଗ ଦେଉ ନଥିବା ଏତଲାରେ ଦର୍ଶାଯାଇଥିଲା। ଫି’ ଦିଅନ୍ତୁ କି ନ ଦିଅନ୍ତୁ, କାହାରିକୁ ଅନ୍ଲାଇନ୍ ପାଠପଢ଼ାରୁ ବଞ୍ଚତ୍ତ ନ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଭି. ନରସିଂହ ଏବଂ ବିଭୂତି ଭୂଷଣ ଚୌଧୁରୀ ମାମଲା ପରିଚାଳନା କରୁଥିଲେ।
