ଭୁବନେଶ୍ୱର,୩ା୧୨(ବ୍ୟୁରୋ): ଅନ୍ତର୍ଜାତୀୟ ଭିନ୍ନକ୍ଷମ ଦିବସ ଅବସରରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ଆନୁକୂଲ୍ୟରେ ଇଡ୍କଲ୍ ଅଡିଟୋରିୟମ୍ରେ ୨ ଦିନିଆ ଚଳଚ୍ଚିତ୍ର ଉତ୍ସବ ଏବଂ ଫଟୋଚିତ୍ର ପ୍ରଦର୍ଶନୀ ସୋମବାରଠାରୁ ଆରମ୍ଭ ହୋଇଛି। ବିଭାଗୀୟ ଶାସନ ସଚିବ ଭାସ୍କରଜ୍ୟୋତି ଶର୍ମାଙ୍କ ଦ୍ୱାରା ଉଦ୍ଘାଟିତ ଏହି କାର୍ଯ୍ୟକ୍ରମରେ ବିଭାଗୀୟ ନିର୍ଦ୍ଦେଶିକା ବ୍ରତତୀ ହରିଚନ୍ଦନଙ୍କ ସମେତ ଅନ୍ୟାନ୍ୟ ପଦାଧିକାରୀମାନେ ଉପସ୍ଥିତ ଥିଲେ।
ଦିବ୍ୟାଙ୍ଗଙ୍କ ଦକ୍ଷତା, ପ୍ରତିଭା, ସେମାନଙ୍କ ସୁରକ୍ଷା ଓ ସାମାଜିକ ପ୍ରତିବଦ୍ଧତା ଇତ୍ୟାଦି ପ୍ରସଙ୍ଗ ଉପରେ ଆଧାରିତ ପ୍ରାୟ ୭୦ରୁ ଊର୍ଦ୍ଧ୍ୱ କ୍ଷୁଦ୍ର ଚଳଚ୍ଚିତ୍ର ଓ ବୃତ୍ତଚିତ୍ର ଏହି ଉତ୍ସବରେ ସ୍ଥାନିତ ହୋଇଛି। ଭାରତର ବିଭିନ୍ନ ଅଞ୍ଚଳର ଚଳଚ୍ଚିତ୍ର ନିର୍ଦ୍ଦେଶକମାନଙ୍କ ଦ୍ୱାରା ଏହି ଚଳଚ୍ଚିତ୍ରଗୁଡ଼ିକ ପ୍ରସ୍ତୁତ କରାଯାଇଥିବାବେଳେ ଏହାମଧ୍ୟରେ ୭ ଫିଚର୍ ଫିଲ୍ମ ରହିଛି। ‘ଆଇ ଆମ୍ ଏବୁଲ୍’, ‘ସାମର୍ଥ୍ୟ’, ‘ସ୍ବାଭିମାନ’, ‘ମୁଁ ବି ସକ୍ଷମ’, ‘ଉର୍ବଶୀ’, ‘ଆଟିଚ୍ୟୁଡ୍’, ‘ଅଟୋବାଲା’, ‘ଡିଫ୍ ଆଣ୍ଡ୍ ଡମ୍ବ’, ‘ଡୁ ବିଫୋର ୟୁ ଡାଇ’, ‘ଲଭ୍ ସଟସ୍’, ‘ଲେଟ୍ ଅସ୍ ବାଇସାଇକେଲ୍ ଟୁଗେଦର’, ‘ୱାନ୍ ଫିଟ୍’, ‘ଓଡ଼ିଶାସ୍ ଇନର ଆଇ’, ‘ଷ୍ଟାଣ୍ଡ ଫର୍ ରେସ୍ମେକ୍ସ’ ଏବଂ ‘ହ୍ବାଟ୍ ଆଇ ଫିଲ୍’ ଭଳି ଏକାଧିକ ନିଆରା ଏବଂ ଭିନ୍ନସ୍ବାଦର ଚଳଚ୍ଚିତ୍ରରେ ଦିବ୍ୟାଙ୍ଗମାନଙ୍କ ଅନୁଭବ, ସାଧନା, ଭାବପ୍ରବଣ ଜୀବନଧାରା ଓ ପାରସ୍ପରିକ ସମ୍ପର୍କ ପ୍ରତିଫଳିତ ହୋଇଛି। ‘ଅକ୍ଷମ ନୁହେଁ, ମୁଁ ବି ସକ୍ଷମ’ ପ୍ରତି ଫିଲ୍ମରେ ଏହି ବାର୍ତ୍ତା ରହିଥିଲା। କାର୍ଯ୍ୟକ୍ରମରେ ୨୦ ଶିକ୍ଷାନୁଷ୍ଠାନର ଛାତ୍ରୀଛାତ୍ର ଏବଂ ସ୍ବେଚ୍ଛାସେବୀମାନେ ଯୋଗଦେଇ ଚଳଚ୍ଚିତ୍ର ଦେଖିବାର ଅବସର ପାଇଥିଲେ। ଏହି ଅବସରରେ ଦିବ୍ୟାଙ୍ଗଙ୍କ ସୁରକ୍ଷା, ଆତ୍ମନିର୍ଭରତା, କୃତିତ୍ୱ ଇତ୍ୟାଦି ଉପରେ ପର୍ଯ୍ୟବସିତ ଫଟୋଚିତ୍ରକୁ ନେଇ ଏକ ସ୍ବତନ୍ତ୍ର ପ୍ରଦର୍ଶନୀ ଆୟୋଜିତ ହୋଇଛି। ଶ୍ରେଷ୍ଠ ବିବେଚିତ ୩ ଫଟୋକୁ ମଙ୍ଗଳବାର କାର୍ଯ୍ୟକ୍ରମର ଉଦ୍ଯାପନୀ ସମାରୋହରେ ପୁରସ୍କୃତ କରାଯିବ। ଆଦିବାସୀ ପ୍ରଦର୍ଶନୀ ପଡ଼ିଆରେ ବିଭାଗ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମର ଉଦ୍ଯାପନୀ ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟଅତିଥି ଭାବେ ଯୋଗଦେବାର କାର୍ଯ୍ୟକ୍ରମ ରହିଛି।
