ଅନୁଗୋଳ ଅଫିସ, ୧୧।୭ – କ୍ରୀଡ଼ାର ବିକାଶ ପାଇଁ ରାଜ୍ୟ ସରକାର ବିଭିନ୍ନ ଯୋଜନା ହାତକୁ ନେଇଛନ୍ତି। ବିଶେଷକରି ଗ୍ରାମାଞ୍ଚଳରେ କ୍ରୀଡ଼ା ପ୍ରତିଭା ସୃଷ୍ଟି କରିବା ଉଦ୍ଦେଶ୍ୟରେ ବ୍ଲକସ୍ତରରେ ମିନି ଷ୍ଟାଡିୟମମାନ ନିର୍ମାଣ କରୁଛନ୍ତି। କିନ୍ତୁ ଅନୁଗୋଳ ଜିଲାର ୮ ବ୍ଲକ ମଧ୍ୟରୁ ୬ଟିରେ ଷ୍ଟାଡିୟମ ନିର୍ମାଣ ହୋଇଥିଲେ ହେଁ ଏଯାଏ ଅନୁଗୋଳ ଓ ବଅଁରପାଳ ବ୍ଲକରେ ମିନି ଷ୍ଟାଡିୟମ ନିର୍ମାଣ ହୋଇପାରି ନାହିଁ। ଏଥିପାଇଁ ଜାଗା ଚିହ୍ନଟ ସରିଥିଲେ ମଧ୍ୟ ଅଦ୍ୟାବଧି ଇଟା ଖଣ୍ଡେ ପଡ଼ି ନ ଥିବାରୁ କ୍ରୀଡ଼ାବିତ୍ଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
୨୦୧୩-୧୪ ଆର୍ଥତ୍କ ବର୍ଷରୁ ରାଜ୍ୟ ସରକାର ପ୍ରତି ବ୍ଲକରେ ମିନି ଷ୍ଟାଡିୟମ ନିର୍ମାଣ କରୁଛନ୍ତି। ଏଥିପାଇଁ ୨୦ ଲକ୍ଷ ଟଙ୍କା ଲେଖାଏ ପ୍ରତି ବ୍ଲକକୁ ଦିଆଯାଉଛି। ସ୍ଥାନୀୟ ବିଧାୟକମାନେ ମଧ୍ୟ ସେମାନଙ୍କ ହାତପାଣ୍ଠିରୁ ୫ ଲକ୍ଷ ଟଙ୍କା ଲେଖାଏ ଷ୍ଟାଡିୟମ ନିର୍ମାଣ ନିମନ୍ତେ ପ୍ରଦାନ କରୁଛନ୍ତି। ଅନୁଗୋଳ ଓ ବଅଁରପାଳ ବ୍ଲକକୁ ଏ ବାବଦରେ ରାଜ୍ୟ ସରକାର ଅର୍ଥ ଦେଇସାରିଥିଲେ ମଧ୍ୟ ଷ୍ଟାଡିୟମ ନିର୍ମାଣ କରାଯାଇପାରୁ ନାହିଁ। ଅନୁଗୋଳ ଓ ବଅଁରପାଳ ବ୍ଲକରେ ଷ୍ଟାଡିୟମ ପାଇଁ ଦୁଇଟି ଜାଗା ଚିହ୍ନଟ ସରିଛି। ବଅଁରପାଳ ବ୍ଲକ ପିବିକେ ହାଇସ୍କୁଲ ପଡ଼ିଆକୁ ଏଥିପାଇଁ ବଛା ଯାଇଥିବା ବେଳେ ଅନୁଗୋଳ ବ୍ଲକର ବନ୍ତଳା ହାଇସ୍କୁଲ ପଡ଼ିଆକୁ ଚିହ୍ନଟ କରାଯାଇଛି। କିନ୍ତୁ ଦୁଇଟି ବ୍ଲକରେ ସ୍ଥାୟୀ ଭାବେ ବିଡିଓ ରହୁ ନ ଥିବାରୁ ମିନିଷ୍ଟାଡିୟମ ନିର୍ମାଣ ହୋଇପାରୁନାହିଁ। ଏଥିଯୋଗୁ ଦୁଇଟି ବ୍ଲକରେ ଥିବା ପ୍ରତିଭାବାନ ଖେଳାଳିଙ୍କୁ ଉପେକ୍ଷା କରାଯାଉଥିବା ଆଲୋଚନା ହେଉଛି। ଏ ନେଇ ଜିଲା କ୍ରୀଡ଼ା ଅଧିକାରୀ ଅକ୍ଷୟ କୁମାର ସେଠ କହିଛନ୍ତି, ସରକାର ଷ୍ଟାଡିୟମ ନିର୍ମାଣ କରିବାକୁ ୨୦ ଲକ୍ଷ ଲେଖାଏ ଟଙ୍କା ପ୍ରଦାନ କରିଛନ୍ତି। କିନ୍ତୁ ଦୁଇଟି ବ୍ଲକରେ ବିଡିଓଙ୍କ ବାରମ୍ବାର ବଦଳି ହେଉଥିବାରୁ ଷ୍ଟାଡିୟମ କାର୍ଯ୍ୟ ଆଗେଇ ପାରୁନାହିଁ। ତେବେ ଭିତ୍ତିଭୂମି ପ୍ରସ୍ତୁତ ସରିଥିବା କ୍ରୀଡ଼ା ଅଧିକାରୀ ପ୍ରକାଶ କରିଛନ୍ତି।
