ଚମ୍ପୁଆ, ୫ା୧(ଡି.ଏନ୍.ଏ.)- ଚମ୍ପୁଆ ଏନଏସି ଗଠନ ହେବାର ୫ ବର୍ଷ ପୂରିବାକୁ ଆଉ ଅଳ୍ପ କିଛି ମାସ ବାକି ରହିଥିବା ବେଳେ ୱାର୍ଡବାସୀ ମୌଳିକ ସୁବିଧାରୁ ବଞ୍ଚିତ ହେଉଥିବା ଅଭିଯୋଗ ହେଉଛି। ବାରମ୍ବାର ୱାର୍ଡବାସୀ ଏନଏସି କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରୁଥିଲେ ମଧ୍ୟ ଏଥିପ୍ରତି ଧ୍ୟାନ ଦିଆଯାଇ ନ ଥିବାରୁ ସାଧାରଣ ଜନତାଠୁ ଆରମ୍ଭ କରି ଉକ୍ତ ରାସ୍ତା ଦେଇ ଯାଉଥିବା ପଥଚାରୀମାନେ ମଧ୍ୟ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଅନେକ ସମୟରେ ଗ୍ରାମବାସୀ ଉକ୍ତ ନାଳ ଉପରେ ମାଟି ପକାଇ ସମତୁଲ କରି ଯାଆସ କରୁଛନ୍ତି। ମାତ୍ର ଗାଡିଗୁଡିକ ଅଧିକ ଚାଲିବାରୁ ତାହା ପୂର୍ବ ଅବସ୍ଥାକୁ ଫେରି ଯାଉଛି। ଯାହାର ଜ୍ୱଳନ୍ତ ଉଦାହରଣ ପାଲଟିଛି ଚମ୍ପୁଆ ଗୋଧୂଳି ରାସ୍ତାର କନିଆଁନୁକା ନାଳ ଉପରେ ନିର୍ମାଣ ପାଇଁ ଦାବି କରାଯାଉଥିବା କଲଭର୍ଟ।
ସୂଚନା ଅନୁସାରେ ଚମ୍ପୁଆ ଏନଏସିର ୧ନଂ. ୱାର୍ଡ ଏନଏସି ମୁଖ୍ୟାଳୟଠାରୁ ୩ କି.ମି. ଦୂରରେ ଅବସ୍ଥିତ। ଏହି ୱାର୍ଡକୁ ମୌଲାନାଗୋଡା ଛକଠାରୁ ଗୋଧୂଳି ପର୍ଯ୍ୟନ୍ତ ପ୍ରଧାନମନ୍ତ୍ରୀ ସଡ଼କ ଯୋଜନାରେ ସଂଯୋଗ କରାଯାଇଛି। ଏହି ରାସ୍ତାର ଭାଲିଆଢିପାଠାରେ ଏକ ବଡ଼ନାଳ ପଡୁଥିବା ବେଳେ ଗୋଧୂଳି ଗାଁକୁ ଲାଗି କନିଆଁନୁକା ନାଳ ରହିଛି। ଏହି ନାଳ ଦେଇ ଖରା ଓ ଶୀତ ଦିନରେ ଲୋକମାନେ ଯେନତେନ ପ୍ରକାରେ ଯିବା ଆସିବା କରୁଥିଲେ ମଧ୍ୟ ବର୍ଷା ଓ ଅନ୍ୟ ଦିନମାନଙ୍କରେ ଏହି ନାଳ ଦେଇ ଯାତାୟାତ କରିବା ପ୍ରାୟତଃ କଷ୍ଟକର ହୋଇପଡ଼େ। ଗୋଧୂଳି ଗାଁରୁ ଛାତ୍ରୀଛାତ୍ରମାନେ ସାଇକେଲ ମାଧ୍ୟମରେ ପାଠ ପଢିବା ପାଇଁ ଚମ୍ପୁଆ ଆସୁଥିବା ବେଳେ ଅସୁବିଧାର ସମ୍ମୁଖୀନ ହେଉଛନ୍ତି। ଏପରି କି ଏହି ଗାଁକୁ ଲାଗି ପଡ଼ୋଶୀ ଝାଡ଼ଖଣ୍ଡକୁ ଯିବାଲାଗି ରାସ୍ତା ରହିଥିବାରୁ ଉକ୍ତ ଅଞ୍ଚଳରୁ ମଧ୍ୟ ଦିନରାତି ଶହଶହ ବାଇକ ଓ ଛୋଟ ଛୋଟ ଗାଡ଼ି ଯିବା ଆସିବା କରନ୍ତି। ଏହାକୁ ଆଖିରେ ରଖି ଏହି କନିଆଁନୁକା ନାଳ ଉପରେ କଲଭର୍ଟ ନିର୍ମାଣ କରିବା ପାଇଁ ଗୋଧୂଳିବାସୀ ବାରମ୍ବାର ଦାବି କରିଆସୁଛନ୍ତି। ମାତ୍ର ଆଜି ପର୍ଯ୍ୟନ୍ତ କଲଭର୍ଟ ନିର୍ମାଣ କରାଯାଇପାରିଲା ନାହିଁ। କିଛି ଦିନ ପୂର୍ବରୁ ଉଭୟ ଗୋଧୂଳି ଓ ଭାଲିଆଢିପା ଗ୍ରାମବାସୀ ଅସନ୍ତୋଷକୁ ତୀବ୍ର କରିବାରୁ ଉକ୍ତ ନାଳ ନିକଟରେ କିଛି ହ୍ୟୁମ ପାଇପ୍ ୩ ମାସ ହେବ ପଡ଼ି ରହିଛି। କିଏ ଓ କାହିଁକି ଏହି ପାଇପ୍ ଏଠାରେ ପକାଇଛି ତାହା ଆଜି ପର୍ଯ୍ୟନ୍ତ ସ୍ଥାନୀୟ ଲୋଙ୍କୁ ମଧ୍ୟ ଜଣାନାହିଁ। ଏହି ସମସ୍ୟାକୁ ଗ୍ରାମବାସୀ କାହାକୁ ଦୋଷ ଦେବେ ତାହା ଏବେ ଦ୍ୱନ୍ଦାତ୍ମକ ପରିସ୍ଥିତି ସୃଷ୍ଟି କରିଛି। ତୁରନ୍ତ ଏହି ନାଳ ଉପରେ ଯାତାୟାତ ପାଇଁ କଲଭର୍ଟ ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି।
