ଅନୁଗୋଳ ଅଫିସ, ୮।୬- ଅନୁଗୋଳରେ କୋଭିଡ୍ କଟକଣା ମାନୁନାହାନ୍ତି କେତେଜଣ ବ୍ୟବସାୟୀ। ଏହାର ମାଳ ମାଳ ଉଦାହରଣ ଥିଲେ ବି ସୋମବାର ରାତିରେ ପୌରପାଳିକାର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ଅମଲାପଡ଼ାର ଏକ ସାଉଥ୍ଇଣ୍ଡିଆନ ହୋଟେଲ ବ୍ୟବସାୟୀଙ୍କୁ ଧରିଛନ୍ତି। ଚଢ଼ାଉ ବେଳେ ଉକ୍ତ ହୋଟେଲରେ ନିୟମ ଉଲ୍ଲଂଘନ କରାଯାଇ କେତେଜଣ ଗ୍ରାହକଙ୍କୁ ଖାଦ୍ୟ ପରଷା ଯାଉଥିବା ନିର୍ବାହୀ ଅଧିକାରୀ ଦେଖିବାକୁ ପାଇଥିଲେ। ଏ ନେଇ ସେ ବ୍ୟବସାୟୀଙ୍କୁ ତାଗିଦ୍ କରିଥିଲେ। ତେବେ କେବଳ ଚେତାବନୀ ଦିଆଯାଇ ସମ୍ପୃକ୍ତ ବ୍ୟବସାୟୀଙ୍କୁ ଛାଡ଼ି ଦିଆଯାଇଥିବାରୁ ଏ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଅନୁଗୋଳ ଜିଲାରେ ଅପରାହ୍ନ ୫ଟା ଯାଏ ଦୋକାନ ବଜାର ଖୋଲାଯାଇପାରିବ ବୋଲି ପ୍ରଶାସନ ନିର୍ଦ୍ଦେଶନାମା ଜାରି କରିଛି। ଏଥିସହ ଜଳଖିଆ ଦୋକାନୀ କିମ୍ବା ହୋଟେଲ କେବଳ ପାର୍ସଲ ଦେଇପାରିବେ ବୋଲି ନିୟମ ରଖାଯାଇଛି। କିନ୍ତୁ ଅମଲାପଡ଼ାର ଉକ୍ତ ସାଉଥ୍ ଇଣ୍ଡିଆନ ହୋଟେଲରେ ରାତି ୭ଟା ପରେ ଗ୍ରାହକଙ୍କୁ ବସାଯାଇ ଖାଦ୍ୟ ପରସା ଯାଉଥିବା ଦେଖାଯାଇଥିଲା। ଅଧା ଶଟର ଖୋଲି ବ୍ୟବସାୟୀ ଜଣକ ଏହି ବେପାର କରୁଥିବା ବେଳେ କେହି ବି ମାସ୍କ ପିନ୍ଧି ନ ଥିବା ନିର୍ବାହୀ ଅଧିକାରୀ ଦେଖିବାକୁ ପାଇଥିଲେ। ପୂର୍ବରୁ ତାଗିଦ୍ କରାଯାଇଥିଲେ ନିର୍ଦ୍ଦେଶ କାହିଁକି ମାନୁ ନାହାନ୍ତି ବୋଲି ନିର୍ବାହୀ ଅଧିକାରୀ ପଚାରିବାରୁ ବ୍ୟବସାୟୀ ଜଣକ ଅନୁଗୋଳ ଥାନାରୁ ଅନୁମତି ଆଣିଥିବା କହିଥିଲେ। ସନ୍ଧ୍ୟା ୭ଟା ପରେ କିଭଳି ଦୋକାନ ଖୋଲା ରହିଲା ବୋଲି ନିର୍ବାହୀ ଅଧିକାରୀ ତାଗିଦ୍ କରିବାରୁ ବ୍ୟବସାୟୀ ଅନୁମତି ନ ଥିବା ସ୍ବୀକାର କରିଥିଲେ। ଏଣିକି ନିୟମ ଉଲ୍ଲଂଘନ ହେଲେ ଦୋକାନକୁ ସିଲ୍ କରାଯିବ ବୋଲି ନିର୍ବାହୀ ଅଧିକାରୀ ଚେତାବନୀ ଦେଇ ଫେରି ଯାଇଥିଲେ।
ଫଟୋ- ହୋଟେଲରେ ଲୋକଙ୍କୁ ବସାଇ ଖାଇବାକୁ ଦିଆଯାଇଛି।
