ନୂଆଦିଲ୍ଲୀ,୨୭।୪: କୋଭିଡ୍-୧୯ ବିରୋଧରେ ଲଢ଼େଇ ଲାଗି ସରକାର ସୁପର ରିଚ୍ ବା ଅତି ଧନୀଙ୍କ ଉପରେ ଟିକସ ବଢାଇପାରନ୍ତି। ସେହିଭଳି ବିଦେଶୀ କମ୍ପାନୀଗୁଡିକ ଉପରେ ଲାଗୁ ହେଉଥିବା ଟିକସ ମଧ୍ୟ ବଢିବା ନେଇ ଆଲୋଚନା ହେଉଛି। ଏହି ବର୍ଗଗୁଡିକରେ ଟିକସ ବୃଦ୍ଧି କରିବାକୁ ବରିଷ୍ଟ ଟିକସ ଅଧିକାରୀମାନେ ସରକାରଙ୍କୁ ସୁପାରିସ କରିଛନ୍ତି। ଭାରତୀୟ ରାଜସ୍ବ ସେବା(ଆଇଆର୍ଏସ୍) ସଂଘ କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ (ସିବିଡିଟି)ର ଅଧ୍ୟକ୍ଷ ପି.ସି.ମୋଦିଙ୍କୁ ଫିସ୍କାଲ ଅପ୍ସନ ଆଣ୍ଡ ରେସ୍ପନ୍ସ ଟୁ ଦ କୋଭିଡ୍-୧୯ ଏପିଡେମିକ (ଫୋର୍ସ) ନାମରେ ଉକ୍ତ ପ୍ରସ୍ତାବ ରଖିଛି। ଯେଉଁ ଟିକସଦାତା ଠିକ୍ ସମୟରେ ଟିକସ ପଇଠ କରିବା ସହ ସରକାରଙ୍କ ନିୟମ ଅନୁପାଳନ କରୁଛନ୍ତି ସେମାନଙ୍କୁ କେବଳ ଟିକସ କ୍ଷେତ୍ରରେ ରିହାତି ଦିଆଯିବା ଉପରେ ପେପରରେ ଉଲ୍ଲେଖ ରହିଛି। ସରକାରଙ୍କ ମହଙ୍ଗା ଭତ୍ତା ସମ୍ପର୍କିତ ନିଷ୍ପତ୍ତି ଦ୍ୱାରା ରାଜକୋଷରେ ୩୭ ହଜାର କୋଟି ଟଙ୍କା ବଞ୍ଚିବ।
କିଛି ପ୍ରସ୍ତାବକୁ ସାମୟିକ ଲାଗି କାର୍ଯ୍ୟକାରୀ କରାଇବାକୁ ସଂଘ ପକ୍ଷରୁ କୁହାଯାଇଛି। ୧ କୋଟି ଟଙ୍କାରୁ ଉର୍ଦ୍ଧ୍ୱ ଆୟକାରୀ ବ୍ୟକ୍ତିବିଶେଷଙ୍କ ଉପରେ ଟିକସର ସୀମା ୩୦%ରୁ ୪୦%କୁ ବଢାଇବା ଲାଗି ପ୍ରସ୍ତାବ ରହିଛି। ୫ କୋଟି ଟଙ୍କାରୁ ଉର୍ଦ୍ଧ୍ୱ ଆୟ କରୁଥିବା ବ୍ୟକ୍ତିବିଶେଷଙ୍କ ଲାଗି ଓ୍ବେଲ୍ଥ ଟିକସ ପୁଣି ଲାଗୁ କରିବାକୁ କୁହାଯାଇଛି। ଏହି ପ୍ରସ୍ତାକୁ ସରକାର ୩ରୁ ୬ ମାସ ପର୍ଯ୍ୟନ୍ତ ଲାଗୁ କରିପାରିବେ ବୋଲି ସଂଘ ମତ ରଖିଛି। ବଜେଟ ୨୦୨୧ରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ସୁପର ରିଚ୍ଙ୍କ ଲାଗି ସରଚାର୍ଜ ଲାଗୁ କରିଥିଲେ। ଏହାଦ୍ୱାରା ରାଜକୋଷକୁ ୨,୭୦୦ କୋଟି ଆସିବ ବୋଲି ଆକଳନ କରାଯାଇଥିଲା। ବର୍ତ୍ତମାନ ସର୍ବୋଚ୍ଚ ଟିକସ ସୀମା ୩୦% ରହିଥିବା ବେଳେ ଏହାକୁ ୪୦% ବଢାଗଲେ ସରଚାର୍ଜରୁ ସରକାରଙ୍କ ଆୟ ମଧ୍ୟ ବଢିଯିବ। ବାର୍ଷିକ ୧ କୋଟି ଟଙ୍କାରୁ ଉର୍ଦ୍ଧ୍ୱ ଆୟକାରୀ ବ୍ୟକ୍ତିବିଶେଷଙ୍କୁ ସୁପର ରିଚ୍ ବୋଲି ବିବେଚନା କରାଯାଉଛି।
ସରକାରଙ୍କୁ ପ୍ରଦାନ କରାଯାଇଥିବା ବର୍ତ୍ତମାନର ପେପରକୁ ୫୦ ସଦସ୍ୟ ବିଶିଷ୍ଟ ଆଇଆର୍ଏସ୍ ଅଧିକାରୀଙ୍କ ଟିମ୍ ପ୍ରସ୍ତୁତ କରିଛନ୍ତି। ସୁପର ରିଚ୍ଙ୍କ ଉପରେ ୨ ପ୍ରକାର ଟିକସ ଲାଗୁ କରିବା ଲାଗି ପ୍ରସ୍ତାବରେ କୁହାଯାଇଛି। ବାର୍ଷିକ ୧ କୋଟିରୁ ଉର୍ଦ୍ଧ୍ୱ ଆୟ କରୁଥିବା ବ୍ୟକ୍ତିବିଶେଷଙ୍କୁ ସୁପର ରିଚ୍ ବର୍ଗରେ ରଖାଯାଇଛି। ଏମାନଙ୍କ ଉପରେ ୩୦% ଟିକସ ଲାଗୁ ହେଉଥିବା ବେଳେ ଏହାକୁ ବଢାଇ ୪୦% କରାଯିବାକୁ ପ୍ରସ୍ତାବ ରହିଛି। ଯେଉଁମାନଙ୍କର ବାର୍ଷିକ ଆୟ ୫ କୋଟି ଟଙ୍କାରୁ ଅଧିକ ସେମାନଙ୍କୁ ଅଲ୍ଟ୍ରା ରିଚ୍ ଭାବେ ବିବେଚନା କରାଯିବା ସହ ଓ୍ବେଲ୍ଥ ଟିକସ ଲାଗୁ କରାଯିବାକୁ ରିପୋର୍ଟରେ ଉଲ୍ଲେଖ ରହିଛି।
ବିଦେଶୀ କମ୍ପାନୀଙ୍କ ସର୍ଚାର୍ଜ
ବିଦେଶୀ କମ୍ପାନୀଙ୍କ ଉପରେ ବିଚାର କଲେ ପ୍ରସ୍ତାବିତ ନିୟମକୁ ୯ ରୁ ୧୨ ମାସ ଲାଗି ଲାଗୁ କରିବାକୁ କୁହାଯାଇଛି। ଅର୍ଥାତ୍ ବିଦେଶୀ କମ୍ପାନୀଙ୍କ ଉପରେ ସର୍ଚାର୍ଜ ବଢ଼ାଇବାକୁ ସରକାରଙ୍କୁ ପ୍ରସ୍ତାବ ଦେଇଛି ଅଧିକାରୀ ସଂଘ। ବର୍ତ୍ତମାନ ୧ରୁ ୧୦ କୋଟି ଟଙ୍କା ଆୟ ଉପରେ ୨% ସର୍ଚାର୍ଜ ଲାଗୁ ହେଉଛି। ୧୦ କୋଟି ଟଙ୍କାରୁ ଊର୍ଦ୍ଧ୍ୱ ଆୟ ଉପରେ ୫% ସରଚାର୍ଜ ରହିଛି।
