ଇସ୍ଲାମାବାଦ, ୨୭ା୮: କଶ୍ମୀର ପ୍ରସଙ୍ଗରେ ସବୁଆଡୁ ବାଟ ବନ୍ଦ ହୋଇଯିବା ପରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଭାରତକୁ ଅଣୁ ଯୁଦ୍ଧର ଧମକ ଦେଇଛନ୍ତି। ଏହି ପ୍ରସଙ୍ଗରେ ପାକିସ୍ତାନ ଚୂଡ଼ାନ୍ତ ନିଷ୍ପତ୍ତି ନେବାର ସମୟ ଆସିଛି ବୋଲି ସେ ସୋମବାର କହିଛନ୍ତି। ପରମାଣୁ ଯୁଦ୍ଧ ହେଲେ କେହି ବିଜୟୀ ହେବେନାହିଁ ବରଂ ସମସ୍ତେ କ୍ଷତି ସହିବେ। ତେଣୁ ପାକିସ୍ତାନ କିଛି ଏଭଳି ପଦକ୍ଷେପ ନେବା ପୂର୍ବରୁ ବିଶ୍ୱ ସମୁଦାୟ ଏଥିରେ ହସ୍ତକ୍ଷେପ କରିବା ଉଚିତ। ବିଶ୍ୱର ବୃହତ ଶକ୍ତିମାନେ ପାକିସ୍ତାନକୁ ସମର୍ଥନ କରନ୍ତୁ ବା ନ କରନ୍ତୁ ଆମ ଲାଗି ଯାହା ସମ୍ଭବ ତାହା କରିଦେଖାଇବୁ ବୋଲି ଇମ୍ରାନ ଦେଶବାସୀଙ୍କୁ ସମ୍ବୋଧନ କରି କହିଛନ୍ତି।
ପାକିସ୍ତାନ ଦ୍ୱିପାକ୍ଷିକ ଆଲୋଚନା ଲାଗି ବହୁବାର ପ୍ରୟାସ କରିଛି, ହେଲେ ଭାରତ ଏଥିଲାଗି କୌଣସି ସହଯୋଗ କରିନାହିଁ। ଅପରପକ୍ଷରେ ସୀମାପାର୍ ଆତଙ୍କବାଦର ଆଳ ଦେଖାଇ ଭାରତ ଆମ ଉପରେ ଦୋଷ ଲଦିଚାଲିଛି ବୋଲି ଇମ୍ରାନ୍ କହିଛନ୍ତି। ୩୭୦ ଧାରାକୁ ଭାରତ ଏକପାଖିଆ ଉଚ୍ଛେଦ କରି ଜମ୍ମୁ-କଶ୍ମୀରକୁ ଦୁଇଟି କେନ୍ଦ୍ରଶାସିତ ଅଞ୍ଚଳ କରି ରାଜନୀତି କରୁଛି। ଏହା ଜାତିସଂଘ ପ୍ରସ୍ତାବର ଖୋଲା ଉଲ୍ଲଂଘନ। ଆମେ କଶ୍ମୀରବାସୀଙ୍କ ସହ ପୂର୍ବରୁ ଅଛୁ ଓ ରହିବୁ ବୋଲି ଇମ୍ରାନ୍ ପ୍ରକାଶ କରିଛନ୍ତି। କଶ୍ମୀର ଲାଗି ପାକିସ୍ତାନ ଯେକୌଣସି ସ୍ତରକୁ ଯାଇପାରେ ବୋଲି ମଧ୍ୟ ସେ ଧମକ ଦେଇ କହିଛନ୍ତି। ପ୍ରକାଶଥାଉ କି, କଶ୍ମୀର ପ୍ରସଙ୍ଗରେ ଜାତିସଂଘ ନିରାପତ୍ତା ପରିଷଦ ଓ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ସପକ୍ଷରେ ମତଦେଇ ଏହାକୁ ଦ୍ୱିପାକ୍ଷିକ ପ୍ରସଙ୍ଗ ବୋଲି କହିବା ପରେ ପାକିସ୍ତାନ ଏହାକୁ ସହଜରେ ହଜମ ନ କରି ଅଣୁ ଯୁଦ୍ଧର ଧମକ ଦେଇଛି।
