କଟକ ଅଫିସ,୨୧।୭: ଏସ୍ସିବି ମେଡିକାଲରେ ଉପୁଜିପାରେ ଗୋରଖପୁର ମେଡିକାଲ ଭଳି ସ୍ଥିତି। କାରଣ ମେଡିକାଲକୁ ଅକ୍ସିଜେନ ଯୋଗାଉଥିବା ସଂସ୍ଥା ୪ମାସର ଟଙ୍କା ପାଇନାହିଁ। ବିଲ୍ ପାଇ ନ ଥିବାରୁ ଅକ୍ସିଜେନ ଯୋଗାଇବାରେ ଅସୁବିଧା ଉପୁଜୁଥିବା ଯୋଗାଣକାରୀ ସଂସ୍ଥା ପକ୍ଷରୁ ମେଡିକାଲକୁ ବିଧିବଦ୍ଧଭାବେ ଅବଗତ କରାଯାଇଛି। ମେଡିକାଲରେ ଦିନକୁ ଦିନ ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ତା ସାଙ୍ଗକୁ ତାଳ ଦେଇ ଅକ୍ସିଜେନର ଆବଶ୍ୟକତା ମଧ୍ୟ ବଢୁଛି। ଦୁଇଦିନ ତଳେ ପଲମନାରୀ ବିଭାଗ ପକ୍ଷରୁ ମେଡିକାଲ ଅଧୀକ୍ଷକଙ୍କୁ ଦିଆଯାଇଥିବା ଚିଠିରେ ଦର୍ଶାଯାଇଛି, ଉକ୍ତ ବିଭାଗ ପାଇଁ ଦିନକୁ ୧୦୦ ଅକ୍ସିଜେନ ସିଲିଣ୍ଡରର ଆବଶ୍ୟକତା ରହିଛି। କାରଣ ରିକୁ(ରେସପିରେଟୋରୀ ଇଣ୍ଟେନସିଭ କେୟାର ୟୁନିଟ)ରେ ରୋଗୀ ବଢୁଥିବା ଯୋଗୁ ଅକ୍ସିଜେନର ଆବଶ୍ୟକତା ବଢୁଥିବା ଉକ୍ତ ବିଭାଗର ମୁଖ୍ୟ ପ୍ରଫେସର ଅଧୀକ୍ଷକଙ୍କୁ ଜଣାଇଛନ୍ତି। ଅନ୍ୟପକ୍ଷରେ ଏସ୍ସିବି ମେଡିକାଲରେ ଦିନକୁ ଅତି କମ୍ରେ ୪୨ କିଲୋଗ୍ରାମ ଓଜନ ବିଶିଷ୍ଟ ୪୦୦ଟି ସିଲିଣ୍ଡର ଦରକାର। ଖାସ୍କରି ଗୁରୁତର ରୋଗୀମାନଙ୍କ କ୍ଷେତ୍ରରେ ଅକ୍ସିଜେନ ବିନା ଜୀବନ ବଞ୍ଚାଇବା ସମ୍ଭବ ନୁହେଁ। ଏଭଳି ସମ୍ବେଦନଶୀଳ ପ୍ରସଙ୍ଗ ଉପରେ ଏସ୍ସିବି ମେଡିକାଲ କର୍ତ୍ତୃପକ୍ଷ କିମ୍ବା ସରକାର ସମ୍ବେଦନହୀନ ହୋଇପଡିବା ରୋଗୀମାନଙ୍କ ପାଇଁ କାଳ ସଦୃଶ ହୋଇଛି। ଯଦି ଯୋଗାଣକାରୀ ସଂସ୍ଥା ଅକ୍ସିଜେନ ଦେବା ବନ୍ଦ କରିଦିଏ, ତେବେ ଉତ୍ତରପ୍ରଦେଶର ଗୋରଖପୁର ମେଡିକାଲ ଭଳି ସ୍ଥିତି ଯେ ନ ଉପୁଜିବ ସେ ଗ୍ୟାରେଣ୍ଟି କିଏ ଦେବ ବୋଲି ସାମାଜିକ କର୍ମୀମାନେ ପ୍ରଶ୍ନ କରିଛନ୍ତି। ଏ ସମ୍ପର୍କରେ ଏସ୍ସିବି ମେଡିକାଲ ଅଧୀକ୍ଷକ ପ୍ରଫେସର ଡା. ସିବିକେ ମହାନ୍ତି କୁହନ୍ତି, ଅକ୍ସିଜେନ ଯୋଗାଣକାରୀ ସଂସ୍ଥା ଯୋଗାଣ ବନ୍ଦ କରିବ ବୋଲି ଯେଉଁ ଆଶଙ୍କା କରାଯାଉଛି ତାହା ଅମୂଳକ। କାରଣ ଉକ୍ତ ସଂସ୍ଥା ସହିତ ହୋଇଥିବା ଏମଓୟୁ ଅନୁଯାୟୀ କୌଣସି ପରିସ୍ଥିତିରେ ସଂସ୍ଥା ଯୋଗାଣ ବନ୍ଦ କରି ପାରିବନାହିଁ। ତେବେ ଆସନ୍ତା ୨୫ ତାରିଖ ମଧ୍ୟରେ ବକେୟା ସମସ୍ତ ବିଲ ପଇଠ କରାଯିବ।
ଏସ୍ସିବି ମେଡିକାଲକୁ ଆନନ୍ଦ ଗ୍ୟାସ ପ୍ରାଇଭେଟ ଲିମିଟେଡ ଓ ପାରାଦୀପ ଗ୍ୟାସ ପ୍ରାଇଭେଟ ଲିମିଟେଡ ପକ୍ଷରୁ ଅକ୍ସିଜେନ ଯୋଗାଣ କରାଯାଉଛି। ମାତ୍ର ଉକ୍ତ ଦୁଇ ସଂସ୍ଥା ମାର୍ଚ୍ଚ, ଏପ୍ରିଲ, ମେ ଓ ଜୁନ ମାସର ବିଲ ମେଡିକାଲ ଠାରୁ ପାଇନି। ଆନନ୍ଦ ଗ୍ୟାସ ମେଡିକାଲ ଠାରୁ ୩୮ଲକ୍ଷ ୧୭ ହଜାର ୫୬୧ ଟଙ୍କା ପାଇବାକୁ ଥିବାବେଳେ ପାରାଦୀପ ଗ୍ୟାସ ପ୍ରାଇଭେଟ୍ ଲିମିଟେଡ ୩୨ ଲକ୍ଷ ୩୪ ହଜାର ୧୦୯ ଟଙ୍କା ପାଇବ ବୋଲି ମେଡିକାଲ ପକ୍ଷରୁ ଜଣାପଡିଛି।
ସୂଚନାଯୋଗ୍ୟ, ୨୦୧୭ ଅଗଷ୍ଟରେ ଉତ୍ତରପ୍ରଦେଶ ରାଜ୍ୟର ଗୋରଖପୁର ଠାରେ ଥିବା ବାବା ରାଘବଦାସ ମେଡିକାଲ କଲେଜ ଓ ହସ୍ପିଟାଲରେ ଅକ୍ସିଜେନ ଅଭାବରୁ ୬୦ଜଣ ଶିଶୁରୋଗୀଙ୍କ ମୃତ୍ୟୁ ଘଟିଥିଲା। ଅକ୍ସିଜେନ ଅଭାବର କାରଣ ଥିଲା ଯେ, ମେଡିକାଲ ଉପରେ ଯୋଗାଣକାରୀ ସଂସ୍ଥାର ୬୮ଲକ୍ଷ ଟଙ୍କା ବାକି ପଡିଥିଲା। ବକେୟା ଟଙ୍କା ପାଇଁ ଉକ୍ତ ସଂସ୍ଥା ମେଡିକାଲକୁ ବାରମ୍ବାର ଚିଠି ଲେଖିଥିଲା। ହେଲେ ମେଡିକାଲ କର୍ତ୍ତୃପକ୍ଷ ବକେୟା ଟଙ୍କା ପଇଠ କରି ନ ଥିଲେ। ଫଳରେ ଯୋଗାଣକାରୀ ସଂସ୍ଥା ମେଡିକାଲକୁ ଅକ୍ସିଜେନ ଯୋଗାଣ ବନ୍ଦ କରିଦେଇଥିଲା। ଏବେ ଏସ୍ସିବି ମେଡିକାଲ କ୍ଷେତ୍ରରେ ସମାନ ପରିସ୍ଥିତି ଉପୁଜିବାକୁ ଯାଉଛି। ମାର୍ଚ୍ଚରୁ ବିଲ୍ ପାଇ ନ ଥିବାରୁ ଯୋଗାଣକାରୀ ସଂସ୍ଥା ଏସ୍ସିବିକୁ ଇତିମଧ୍ୟରେ ପ୍ରତି ମାସରେ ବାକି ଟଙ୍କା ପାଇଁ ଚିଠି ଲେଖି ଚାଲିଛି। ଗୋରଖପୁରରେ ୬୮ଲକ୍ଷ ଟଙ୍କା ବାକି ଥିବାବେଳେ ଏସ୍ସିବିରେ ୭୦ଲକ୍ଷ ବାକି ପଡିଛି। ଯଦି ଯୋଗାଣକାରୀ ସଂସ୍ଥା ଯୋଗାଣ ବନ୍ଦ କରିଦିଏ ତେବେ ପରିସ୍ଥିତି ଅଣାୟତ୍ତ ହୋଇପଡିବ, ଏଥିରେ ତିଳେମାତ୍ର ସନ୍ଦେହ ନାହିଁ। ମେଡିକାଲ ପ୍ରଶାସନିକ ଅଧିକାରୀ କଳ୍ପତରୁ ବେହେରାଙ୍କ କହିବାନୁଯାୟୀ, ଯୋଗାଣକାରୀ ସଂସ୍ଥାକୁ ଖୁବ୍ଶୀଘ୍ର ବକେୟା ବିଲ ପଇଠ କରାଯିବାକୁ ବ୍ୟବସ୍ଥା କରାଯାଉଛି।
