ମୁମ୍ବାଇ: ଅକ୍ଟୋବର ପହିଲାରୁ ଆମଦାନୀ ହେଉଥିବା ଟିଭି ଓପନ ପ୍ୟାନେଲ ଉପରେ ୫% ଟିକସ ଲାଗୁ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି। ସ୍ଥାନୀୟ ଶିଳ୍ପଗୁଡିକରେ ଭାଲ୍ୟୁ ସଂଯୋଗ କରିବା ଲାଗି ସରକାର ଏଭଳି ନିଷ୍ପତ୍ତି ନେଇଥିବା କହିଛନ୍ତି। ମାତ୍ର ସରକାରଙ୍କ ନିଷ୍ପତ୍ତି ଦ୍ୱାରା ଟିଭି ମୂଲ୍ୟ ବଢିବ ବୋଲି କମ୍ପାନୀଗୁଡିକ ମତ ପ୍ରକାଶ କରିଛନ୍ତି। ପାର୍ବଣ ପୂର୍ବରୁ ଏହି ନିଷ୍ପତ୍ତି ସରକାର ଗ୍ରହଣ କରିଛନ୍ତି। ଫଳରେ ଟିଭି ଦାମ ବଢିବା ନେଇ ଆଶଙ୍କା କରାଯାଇଛି। ଗତ ଗୋଟିଏ ବର୍ଷ ତଳେ ସରକାର ଏଭଳି ଟିକସକୁ ହଟାଇ ଦେଇଥିଲେ। ଚାଇନା ଏବଂ ଭିଏତନାମ ଭଳି ଦେଶଗୁଡିକ ସହ ଭାରତୀୟ କମ୍ପାନୀଗୁଡିକୁ ପ୍ରତିଦ୍ୱନ୍ଦ୍ୱୀ କରିବା ଲାଗି ନିଷ୍ପତ୍ତି ହୋଇଥିଲା। ଏଥିଯୋଗୁ ସାମ୍ସଙ୍ଗ ଭଳି କମ୍ପାନୀ ଭିଏତନାମ ଛାଡି ଭାରତରେ ମାନୁଫାକଚରିଂକୁ ଗୁରୁତ୍ୱ ପ୍ରଦାନ କରିଥିଲା। ଏହା ସ୍ଥାନୀୟ କମ୍ପାନୀ ଡିକ୍ସନ ଟେକ୍ନୋଲୋଜି ସହ ମିଳିତ ହୋଇ ଯୋଜନା ଆଗକୁ ବଢାଇଥିଲା। ସରକାରଙ୍କ ଟିକସ ଲାଗି ଯୋଗୁ ଟିଭି ଦାମ ଉପରେ ବେଶି ପ୍ରଭାବ ପକାଇବା ନାହିଁ ବୋଲି ଜଣେ ଅଧିକାରୀ ମତ ରଖିଛନ୍ତି। ଟିଭି ଦାମ ପ୍ରାୟ ୪% ପର୍ଯ୍ୟନ୍ତ ବଢିବା ନେଇ ଆକଳନ କରାଯାଇଛି। ଏହା ୩୨ ଇଞ୍ଚ ବର୍ଗରେ ପ୍ରାୟ ୬୦୦ ଟଙ୍କା ଏବଂ ୪୨ ଇଞ୍ଚ ଉପରେ ପ୍ରାୟ ୧୨୦୦ରୁ ୧୫୦୦ ଟଙ୍କା ବଢିପାରେ। ନୂଆ ନିଷ୍ପତ୍ତି ଦ୍ୱାରା ଆସେମ୍ବିଲିଂ ପରିବର୍ତ୍ତେ ପ୍ରକୃତ ମାନୁଫାକଚରିଂ ଉପରେ କମ୍ପାନୀ ଧ୍ୟାନ ଦେବେ ବୋଲି ସରକାରୀ ଅଧିକାରୀ ମତ ପ୍ରକାଶ କରିଛନ୍ତି।
