ଯାଜପୁର ଟାଉନ,୨୨।୧୧(ଡିଏନଏ): ଯାଜପୁର ଅବକାରୀ ବିଭାଗର ମୋବାଇଲ ସ୍କ୍ବାର୍ଡ ୧୬ନଂ ଜାତୀୟ ରାଜପଥ ବଡଚଣା ନିକଟରୁ ଗଞ୍ଜେଇ ଭର୍ତ୍ତି ଏକ କାର୍କୁ ଜବତ କରିଛି। ଅବକାରୀ ଅଧୀକ୍ଷକ ରଜତ କୁମାର ପ୍ରହରାଜ କୌଣସି ସୂତ୍ରରୁ ଖବରପାଇ ଇନ୍ସପେକ୍ଟର ସ୍ବପ୍ନାରାଣୀ ସାହୁଙ୍କୁ ଉକ୍ତ ଗଞ୍ଜେଇ ଚୋରାଚାଲାଣ କରୁଥିବା ଗାଡିକୁ ଧରିବା ପାଇଁ ନିର୍ଦ୍ଦେଶ ଦେଇଥିଲେ। ଇନ୍ସପେକ୍ଟର ସ୍ବପ୍ନାରାଣୀ, ସବଇନ୍ସପେକ୍ଟର ବିଜୟଲକ୍ଷ୍ମୀ ଦାସ ମୋବାଇଲ ଟିମକୁ ନେଇ ଉକ୍ତ ସ୍ଥାନରେ ଜଗି ରହି ଓଆର୦୫ଏସଇ୩୫୯୮ ନମ୍ବର ବିଶିଷ୍ଟ କାର୍ଟିକୁ ଅଟକାଇ ଥିଲେ। ସେଥିରୁ ୨ଟି ବସ୍ତାରେ ଥିବା ୩ଲକ୍ଷ ଟଙ୍କାରୁ ଊର୍ଦ୍ଧ୍ୱ ମୂଲ୍ୟର ଗଞ୍ଜେଇକୁ ଜବତ କରାଯାଇଥିଲା। ଏଥିସହିତ ଗାଡି ଚାଳକ ଫୁଲବାଣୀର ପ୍ରମୋଦ କୁମାର ଗୌଡ ଓ କଟକ ଜିଲା ଟାଙ୍ଗୀ ଥାନା ଗୋବିନ୍ଦପୁରର ଶରତ ବାରିକଙ୍କୁ ଅବକାରୀ ବିଭାଗ ଗିରଫ କରିଥିଲେ। ଏହି ଗଞ୍ଜେଇ ଫୁଲବାଣୀରୁ ଭଦ୍ରକ ନେଇ ଯାଉଥିବା ଡ୍ରାଇଭର ତଥା ଚୋରାଚାଲାଣକାରୀ ଦ୍ୱୟ ଅଧିକାରୀଙ୍କ ନିକଟରେ ପ୍ରକାଶ କରିଥିବାବେଳେ କାହାକୁ ଏହି ଗଞ୍ଜେଇ ବିକ୍ରି କରାଯାଇଥାନ୍ତା ସେ ସମ୍ପର୍କରେ ସେମାନେ କୌଣସି ମୁହଁ ଖୋଲିନାହାନ୍ତି। ଏ ନେଇ ଏକ ମାମଲା (ନଂ ୧୨/୧୯) ରୁଜୁ କରାଯାଇ ଅଭିଯୁକ୍ତ ଦ୍ୱୟଙ୍କୁ କୋର୍ଟଚାଲାଣ କରାଯାଇଛି।
