ଗୋପ,୧୦।୬(ଡି.ଏନ୍.ଏ)- ଗୋପ ବ୍ଲକ ଅଞ୍ଚଳର ୨ ବେଆଇନ କରତକଳ ଉପରେ ବୁଧବାର ସକାଳୁ ପୁରୀ ବନଖଣ୍ଡ ଡିଭିଜନ ଓ ଭୁବନେଶ୍ବର ଭିଜିଲାନ୍ସ ବିଭାଗ ପକ୍ଷରୁ ମିଳିତ ଭାବେ ଚଢ଼ାଉ କରାଯାଇଛି। ଏହି ଚଢ଼ାଉରେ ୨ କରତକଳରୁ ୨୬ ଲକ୍ଷ ଟଙ୍କାର ଯନ୍ତ୍ରାଂଶ ସହ କାଠ ଜବତ କରାଯାଇଥିବା ଜଙ୍ଗଲ ବିଭାଗ ପକ୍ଷରୁ କୁହାଯାଇଛି। ସୂଚନା ମୁତାବକ, କିଛି ଦିନ ଧରି ଗୋପ ଜଙ୍ଗଲ ବିଭାଗ ଅଧୀନ ଗଣେଶ୍ୱରପୁର, ଚାଉଳିଆପାଟେଣା, ଦିଘାଳୋ, ତମ୍ପାଳ, ମଦରଙ୍ଗ ସହିତ ଆଉ କେତେକ ସ୍ଥାନରେ ବେଆଇନ ଭାବରେ ୨୫ରୁ ଊଦ୍ଧର୍ବ କରତକଳ ଚାଲୁଥିବା ଅଭିଯୋଗ ହେଉଥିଲା। ଏହି ଅଭିଯୋଗକୁ ନେଇ ବୁଧବାର ଗୋପ- ଚାରିଛକ ରାସ୍ତାର ଜମରା ଛକ ନିକଟରେ ଥିବା ୨ଟି ବେଆଇନ କରତକଳ ଉପରେ ଭୁବନେଶ୍ବର ଭିଜିଲାନ୍ସ ବିଭାଗ ଏସିଏ୍ଫ ବିଷ୍ଣୁଚରଣ ବେହେରାଙ୍କ ନେତୃତ୍ୱରେ ପୁରୀ ବନଖଣ୍ଡ କର୍ମଚାରୀ ଓ ଗୋପ ପୋଲିସଙ୍କୁ ନେଇ ମିଳିତ ଚଢାଉ କରାଯାଇଥିଲା। ଚଢ଼ାଉ ସମୟରେ ସମସ୍ତ କରତକଳ ଯନ୍ତ୍ରାଂଶ ଓ ବ୍ୟାପକ ଚିରା କାଠ ଜବତ କରାଯାଇଥିଲା। ଏହି ଜବତ କାଠ ଓ ଯନ୍ତ୍ରାଂଶର ମୂଲ୍ୟ ୨୬ଲକ୍ଷ ଟଙ୍କା ହେବ ବୋଲି ଏସିଏଫ୍ ବେହେରା କହିଛନ୍ତି। ଚଢ଼ାଉ ହେବା ଜାଣି ପୂର୍ବରୁ କରତକଳର ମାଲିକ ଓ କର୍ମଚାରୀମାନେ ଫେରାର ହୋଇଯାଇଥିଲେ। ଏ ସମ୍ପର୍କରେ ଗୋପ ବନବିଭାଗ କାର୍ଯ୍ୟାଳୟରେ ନଂ.୧,୨,୩,୪/୨୦,୨୧ ରେ କରତକଳ ମାଲିକଙ୍କ ନାମରେ ମାମଲା ରୁଜୁ ହୋଇଛି। ଚଢ଼ାଉ ବେଳେ ବ୍ୟାପକ ପୋଲିସ ଫୋର୍ସ ସହିତ ଜିଲାର ବରିଷ୍ଠ ଜଙ୍ଗଲ ବିଭାଗ ଅଧିକାରୀମାନେ ଉପସ୍ଥିତ ଥିଲେ।
