ନଟିଂହାମ, ୭ା୬:ଟ୍ରେଣ୍ଟବ୍ରିଜଠାରେ ଗୁରୁବାର ଖେଳାଯାଇଥିବା ଆଇସିସି ବିଶ୍ୱକପ ମ୍ୟାଚରେ ଗତଥରର ଚାମ୍ପିୟନ ଅଷ୍ଟ୍ରେଲିଆ ୧୫ ରନରେ ଓ୍ବେଷ୍ଟଇଣ୍ଡିଜକୁ ହରାଇ ଦେଇଛି। ୨୮୯ ରନର ବିଜୟ ଲକ୍ଷ୍ୟକୁ ପିଛା କରିି ଓ୍ବେଷ୍ଟଇଣ୍ଡିଜ ନିର୍ଦ୍ଧାରିତ ଓଭରରେ ୯ ଉଇକେଟ ବିନିମୟରେ ୨୭୩ରନ କରିପାରିଥିଲା। ଦଳ ପକ୍ଷରୁ ଉଇକେଟକିପର ସାଇ ହୋପ ସର୍ବାଧିକ ୬୮ ରନ କରିଥିବା ବେଳେ ଅଧିନାୟକ ଜାସନ ହୋଲ୍ଡର ୫୧ ଏବଂ ନିକୋଲାସ ପୁରାନ ୪୦ ରନ କରିଥିଲେ। ଅଷ୍ଟ୍ରେଲିଆ ପକ୍ଷରୁ ସବୁଠାରୁ ସଫଳ ବୋଲର ମିଚେଲ ଷ୍ଟାର୍କ ୪୬ ରନ ବିନିମୟରେ ୫ଟି ଉଇକେଟ ଅକ୍ତିଆର କରି ୨୧ବର୍ଷ ରେକର୍ଡ ଭାଙ୍ଗିଛନ୍ତି। ସେ ପାକିସ୍ତାନ ବୋଲର ସାକଲିନ୍ ମୁସ୍ତାକଙ୍କ ରେକର୍ଡ ଭାଙ୍ଗିଛନ୍ତି। ସାକଲିନ୍ ୭୮ଟି ମ୍ୟାଚ୍ ଖେଳି ୧୫୦ ଓ୍ବିକେଟ ନେଇଥିବାବେଳେ ଷ୍ଟାର୍କ ୭୭ଟି ମ୍ୟାଚ୍ ଖେଳି ଏହି କାରନାମା ହାସଲ କରିଛନ୍ତି।
