ସାଓ ପାଉଲୋ,୯।୬(ଏପି): ୨୦୨୩ ଫିଫା ମହିଳା ବିଶ୍ୱକପ ଆୟୋଜନରୁ ବ୍ରାଜିଲ ଓହରିଯିବାକୁ ନିଷ୍ପତ୍ତି ନେଇଛି। ଆୟୋଜନ ନେଇ ବ୍ରାଜିଲ ତା’ର ବିଡ୍ ପ୍ରତ୍ୟାହାର କରିନେଇଛି। କୋଭିଡ୍-୧୯ ମହାମାରୀ କାରଣରୁ ବ୍ରାଜିଲ ଫିଫାକୁ ଆର୍ଥିକ ଆଶ୍ୱାସନା ଦେବାକୁ ଅକ୍ଷମତା ପ୍ରକାଶ କରିଛି। ଏ ନେଇ ବ୍ରାଜିଲ ଫୁଟବଲ କନଫେଡେରେଶନ (ବିଏଫ୍ସି) ସୋମବାର ଏ ନେଇ ସୂଚନା ଦେଇଛି। ପୂର୍ବରୁ ଦକ୍ଷିଣ ଆମେରିକାର କୌଣସି ଦେଶ ଏହି ଟୁର୍ନାମେଣ୍ଟ ଆୟୋଜନ କରି ନାହାନ୍ତି। ତେଣୁ ବିଏଫ୍ସି କଲମ୍ବିଆର ବିଡ୍କୁ ସମର୍ଥନ କରିବ ବୋଲି କହିଛି। ଏହି ମେଗା ଇଭେଣ୍ଟ ଆୟୋଜନ କରିବାକୁ ଜାପାନ ମଧ୍ୟ ବିଡ୍ ଦାଖଲ କରିଛି। ସେହିପରି ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ଯୁଗ୍ମ ବିଡ୍ ଦାଖଲ କରିଛନ୍ତି। ତେବେ ଜାପାନ ଓ ଅଷ୍ଟ୍ରେଲିଆ- ନ୍ୟୁଜିଲାଣ୍ଡର ବିଡ୍କୁ ବିଏଫ୍ସି ସମର୍ଥନ କରିବ ନାହିଁ। ଏ ନେଇ ଜୁନ୍ ୨୫ ତାରିଖରେ ଅନ୍ତିମ ନିଷ୍ପତ୍ତି ନିଆଯିବ ବୋଲି କୁହାଯାଇଛି।
କୋଭିଡ୍ -୧୯ ମହାମାରୀ କାରଣରୁ ସୃଷ୍ଟି ହୋଇଥିବା ଆର୍ଥତ୍କ ବିପର୍ଯ୍ୟୟ ପାଇଁ ବ୍ରାଜିଲ ତା’ର ବିଡ୍ ପ୍ରତ୍ୟାହାର କରିନେଇଛି। ବ୍ରାଜିଲ ଏ ନେଇ ବଶ୍ୱ ଫୁଟବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫାକୁ ଅବଗତ କରିଛି। ଏଭଳି ପରିସ୍ଥିତିରେ ବିଶ୍ୱକପ୍ ଆୟୋଜନ ନେଇ ବିଡ୍ ଦାଖଲ କରିବା ଠିକ୍ ହେବ ନାହିଁ ବୋଲି ବ୍ରାଜିଲ ତରଫରୁ କୁହାଯାଇଛି। କୋଭିଡ୍-୧୯ କାରଣରୁ ବ୍ରାଜିଲ ଅର୍ଥନୀତି ଗୁରୁତର ଭାବେ କ୍ଷତିଗ୍ରସ୍ତ ହୋଇଛି। ବ୍ରାଜିଲ ମଧ୍ୟ ଏହି ମହାମାରୀ ଦ୍ୱାରା ଅଧିକ ପ୍ରଭାବିତ ହୋଇଛି।
