ଚେନ୍ନାଇ,୧୪ା୫: କୋଭିଡ୍-୧୯ ପାଇଁ ଦୀର୍ଘଦିନ ହେଲା ଦେଶରେ ବିମାନ ଚଳାଚଳ ବନ୍ଦ ରହିଥିବାବେଳେ ସରକାର ଏୟାରଲାଇନ୍ସ ଏୟାର ଇଣ୍ଡିଆ ଆସନ୍ତା ୧୯ରୁ ଜୁନ୍ ୨ ପର୍ଯ୍ୟନ୍ତ ଦେଶର ବିଭିନ୍ନ ସହରକୁ ସ୍ବତନ୍ତ୍ର ବିମାନ ସେବା ଯୋଗାଇଦେବାକୁ ନିଷ୍ପତ୍ତି ନେଇଛି। ଫଳରେ ବିଭିନ୍ନ ସହରରେ ଅଟକି ରହିଥିବା ଲୋକେ ଘରକୁ ଫେରିପାରିବେ। ଦିଲ୍ଲୀ, ମୁମ୍ବାଇ, ହାଇଦ୍ରାବାଦ ଓ ବେଙ୍ଗାଲୁରୁରୁ ଅଧିକାଂଶ ବିମାନ ଚଳାଚଳ କରିବ। ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ମଞ୍ଜୁରୀ ମିଳିବା ପରେ ଦିଲ୍ଲୀକୁ ୧୭୩, ମୁମ୍ବାଇକୁ ୪୦, ହାଇଦ୍ରାବାଦକୁ ୨୫ ଓ କୋଚିକୁ ୧୨ଟି ବିମାନ ଚାଲିବ ବୋଲି ଜଣାପଡିଛି। ଏଥିପାଇଁ ଖୁବ୍ଶୀଘ୍ର ଟିକେଟ ବୁକିଂ ଆରମ୍ଭ ହେବ। ଦିଲ୍ଲୀରୁ ସ୍ବତନ୍ତ୍ର ବିମାନ ଜୟପୁର, ବେଙ୍ଗାଲୁରୁ, ହାଇଦ୍ରାବାଦ, ଅମୃତସର, କୋଚି, ଅହମଦାବାଦ, ବିଜୟଓ୍ବାଡା, ଗୟା, ଲକ୍ଷ୍ନୌ ଆଦି ସହରକୁ ଚାଲିବ। ଭୁବନେଶ୍ୱରରୁ ଏକ ବିମାନ ବେଙ୍ଗାଲୁରୁ ଚାଲିବ ବୋଲି ଜଣାପଡିଛି।
