ପାଲଲହଡା,୨୫ା୩(ଡି.ଏନ.ଏ.)- ଅନୁଗୋଳ ଜିଲା ପାଲଲହଡ଼ା ବ୍ଲକ ବାଲିପଶି ପଞ୍ଚାୟତର ସରପଞ୍ଚ ବାବୁଲି ନାୟକଙ୍କ ନଁ।ରେ ୧୮ ଲକ୍ଷ ଟଙ୍କା ଆତ୍ମସାତ ଅଭିଯୋଗ ହୋଇଥିଲା। ଏ ନେଇ ଜିଲାପାଳଙ୍କ ନିର୍ଦ୍ଦେଶ କ୍ରମେ ବୁଧବାର ଜିଲା ପଞ୍ଚାୟତ ଅଧିକାରୀ ଗୁରୁଭା ସିଂ ଉକ୍ତ ଅଭିଯୋଗର ତଦନ୍ତ କରିଛନ୍ତି। ତେବେ ଅଭିଯୋଗ ଆଣିଥିବା ପଞ୍ଚାୟତର ପୂର୍ବତନ ଅଧିକାରୀ ଶରତ ଚନ୍ଦ୍ର ଭୋଇ ଅସୁସ୍ଥତା ଯୋଗୁ ଅନୁପସ୍ଥିତ ରହିବାରୁ ପଞ୍ଚାୟତ କ୍ୟାଶ ବହି ଏବଂ ବ୍ୟାଙ୍କ ପାଶବୁକ୍ ଯାଞ୍ଚ ହୋଇପାରି ନାହିଁ। ସରପଞ୍ଚଙ୍କ ବ୍ୟକ୍ତିଗତ ବ୍ୟାଙ୍କ ଖାତାର ଷ୍ଟେଟମେଣ୍ଟ ଯୋଗାଇଦେବା ପାଇଁ ବ୍ୟାଙ୍କଗୁଡିକୁ କୁହାଯାଇଛି ଓ ସମସ୍ତ ତଥ୍ୟ ମିଳିବା ପରେ ତଦନ୍ତ ରିପୋର୍ଟ ଜିଲାପାଳଙ୍କୁ ପ୍ରଦାନ କରାଯିବ ବୋଲି ଜିଲା ପଞ୍ଚାୟତ ଅଧିକାରୀ ସିଂ ସୂଚନା ଦେଇଛନ୍ତି। ପ୍ରକାଶ ଯେ, ଗତ ଜାନୁୟାରୀ ୩୧ରେ ପଞ୍ଚାୟତ ନିର୍ବାହୀ ଅଧିକାରୀ ଭୋଇ କାର୍ଯ୍ୟରୁ ଅବସର ନେଇଥିଲେ ହେଁ ଏଭଳି ଆର୍ଥିକ ଅନିୟମିତତା ଯୋଗୁ ଦାୟିତ୍ୱ ହସ୍ତାନ୍ତର କରିପାରୁ ନ ଥିବା ଉପଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ଗତ ୧୭ ତାରିଖରେ ଉପଜିଲାପାଳ ଅଜିତ କୁମାର ପ୍ରଧାନ ଏବଂ ବିଡିଓ ରବିନାରାୟଣ ମାଝି ପଞ୍ଚାୟତ କାର୍ଯ୍ୟାଳୟକୁ ଯାଇ ତଦନ୍ତ କରିଥିଲେ। ହେଲେ ସରପଞ୍ଚ ନାୟକ କୌଣସି ସନ୍ତୋଷଜନକ ଉତ୍ତର ଦେଇପାରି ନ ଥିଲେ। ଏ ନେଇ ଗତ ଶୁକ୍ରବାର ଅନୁଗୋଳ ଜିଲାପାଳ ଏବଂ ଜିଲା ପ୍ରକଳ୍ପ ନିର୍ଦ୍ଦେଶକଙ୍କୁ ବିଡିଓ ରିପୋର୍ଟ ପ୍ରଦାନ କରିଥିଲେ। ଅନ୍ୟପଟେ ସରପଞ୍ଚ ବାବୁଲି ନାୟକ କହିଛନ୍ତି, ସେ କୌଣସି ବେନିୟମ କାର୍ଯ୍ୟ କରିନାହାନ୍ତି।
