ଭୁବନେଶ୍ୱର,୨୨।୧୨(ବ୍ୟୁରୋ): ସରକାରୀ ସ୍କୁଲରେ ପଢ଼ୁଥିବା ଛାତ୍ରୀଛାତ୍ରଙ୍କ ଶାରୀରିକ ତଥା ମାନସିକ ବିକାଶ କଥା ଚିନ୍ତା କରୁଛି ଭୁବନେଶ୍ୱର ମହାନଗର ନିଗମ (ବିଏମ୍ସି) ଓ ଭୁବନେଶ୍ୱର ଉନ୍ନୟକ କର୍ତ୍ତପକ୍ଷ (ବିଡିଏ)। ସ୍କୁଲ୍ଗୁଡ଼ିକରେ ରହିଥିବା ଖେଳପଡ଼ିଆର ନବୀକରଣ ପାଇଁ ଏହି ଦୁଇ କର୍ତ୍ତପକ୍ଷ ଅଣ୍ଟା ଭିଡ଼ିଛନ୍ତି। ଏଥିପାଇଁ ବାଙ୍ଗାଲୋରର ଏକ ଠିକା ସଂସ୍ଥା ଆନ୍ଥିଲି କ୍ରିଏଶନ ସହ ହାତ ମିଶାଇଛନ୍ତି। ସଂସ୍ଥା ପକ୍ଷରୁ ସ୍କୁଲର ଖେଳ ପଡ଼ିଆକୁ ସମ୍ପୂର୍ଣ୍ଣ ନବୀକରଣ କରାଯିବା ସହ ବର୍ଜ୍ୟ ଓ ବ୍ୟବହୃତ ଗାଡିମୋଟର ଟାୟାରରେ ନୂଆ ଢାଞ୍ଚା ନିର୍ମାଣ କରାଯିବ। ପ୍ରାଥମିକ ଭାବେ ଭୁବନେଶ୍ୱରର ୫ ସରକାରୀ ବିଦ୍ୟାଳୟରେ କାର୍ଯ୍ୟ ଆରମ୍ଭ ହୋଇଛି। ଆଗାମୀ ଦିନରେ ସହରର ସମସ୍ତ ସ୍କୁଲ୍ ଖେଳପଡ଼ିଆର ନବକଳେବର କରାଯିବ ବୋଲି ବିଡିଏ ଓ ବିଏମ୍ସି ପକ୍ଷରୁ ପ୍ରେସ୍ ବିବୃତ୍ତିରେ ସୂଚନା ଦିଆଯାଇଛି।
ସୂଚନାନୁସାରେ, ଖେଳପଡ଼ିଆକୁ ଭାଗ ଭାଗ କରାଯାଇ ସେଥିରେ ଭିନ୍ନ ଭିନ୍ନ ଢାଞ୍ଚାରେ ବିଭିନ୍ନ ପ୍ରକଳ୍ପ ନିର୍ମାଣ କରାଯିବ। ଏଥିରେ ‘ଦି ହିଭିଂ ହୁପ୍’, ‘ଷ୍ଟିପିଂ ଷ୍ଟେନ୍ସ’, ‘କ୍ୟୁବ୍ କ୍ଲାଇମ୍ବର’, ‘ସ୍ବିଂ’, ‘କ୍ୟାଟର ପିଲାର’ ଓ ‘ଟ୍ବିଷ୍ଟର’ ଖେଳ ଉପକରଣ ଲଗାଯିବ। ମୁଖ୍ୟତଃ ସେଗୁଡ଼ିକୁ ବ୍ୟବହୃତ ବର୍ଜ୍ୟ ଅଥବା ଟାୟାରରେ ତିଆରି କରାଯିବ। ବର୍ତ୍ତମାନ ସାଲିଆ ସାହିର ଏକାମ୍ର ବିହାର ପ୍ରାଇମେରୀ ସ୍କୁଲ, ବାପୁଜିନଗର ୟୁଜିୟୁପି ସ୍କୁଲ, ପଳାଶପଲ୍ଲୀସ୍ଥିତ ମୁକ ବଧିର ବିଦ୍ୟାଳୟ, ଶାନ୍ତିନଗର ବସ୍ତିର ଏଫ.ସି.ଆଇ କଲୋନୀ ଓ ସାଲିଆସାହି ବିର୍ଶାମୁଣ୍ଡା ପଡ଼ିଆରେ ଏହି ପ୍ରକଳ୍ପର ଶୁଭାରମ୍ଭ ହୋଇଛି।
ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି, ବ୍ୟବହୃତ ବର୍ଜ୍ୟକୁ ପୁନଃଚକ୍ରଣ କରାଯିବା ପରେ ପିଲାଙ୍କ ପାଇଁ ସେଥିରୁ ଖେଳିବା ପାଇଁ ଉପକରଣ ପ୍ରସ୍ତୁତ କରାଯାଇଛି। ପିଲାମାନଙ୍କୁ ଏକ ଇକୋ ଫ୍ରେଣ୍ଡ୍ଲି ପରିବେଶ ସହ ଖେଳକୁଦ କରିବାକୁ ବ୍ୟବସ୍ଥା କରାଯିବ ବୋଲି ସେ କହିଛନ୍ତି।
