ପାତ୍ରପଡ଼ା,୧୦।୯(ଡି.ଏନ୍.ଏ.): ଖଣ୍ଡଗିରି ଥାନା ଅନ୍ତର୍ଗତ ଶ୍ୟାମପୁର ନିକଟରେ ସୋମବାର ରାତିରେ ଜଣେ ଓଡ଼ିଆ ସିନେ କଳାକାରଙ୍କ କାର ଧକ୍କାରେ ଜଣେ ଯୁବକ ଗୁରୁତର ହୋଇଛନ୍ତି। ସେ ହେଲେ ସ୍ଥାନୀୟ ଅଞ୍ଚଳର ରଞ୍ଜନ ନାୟକ। ଏହା ପରେ ସ୍ଥାନୀୟ ଲୋକେ ଦୁଘର୍ଟଣା ଘଟାଇଥିବା କାରକୁ ଅଟକାଇଥିଲେ। ଏହାକୁ ନେଇ ଘଟଣାସ୍ଥଳରେ ଚାପା ଉତ୍ତେଜନା ଦେଖାଦେଇଥିଲା।
ସୂଚନା ଅନୁଯାୟୀ, ଶ୍ୟାମପୁର ଅଞ୍ଚଳରେ ଓଡ଼ିଆ ଫିଲ୍ମ ଶୁଟିଂ ଚାଲିଥିଲା। ଜଣେ କଳାକାର ଆସିଥିବା ଏକ ନମ୍ବର ବିହୀନ କାର ଶୁଟିଂ ସେଟ ନିକଟରେ ଛିଡା ହୋଇଥିବା ବେଳେ ଚାଳକ ଜଣକ କାରକୁ ପଛକୁ ନେଉଥିଲେ। ଏହି ସମୟରେ ସେଠାରେ ଶୁଟିଂ ଦେଖୁଥିବା ରଞ୍ଜନଙ୍କୁ କାରଟି ଧକ୍କା ଦେଇଥିଲା। ଫଳରେ ସେ ତଳେ ପଡିଯାଇଥିଲେ। ଧକ୍କା ଦେବା ପରେ ଲୋକମାନେ ହୋ ହଲ୍ଲା କରିବାରୁ ଚାଳକ ଗାଡିକୁ ଆଗକୁ ନେଉଥିବା ବେଳେ ଲୋକମାନେ କାରକୁ ଘେରିଯାଇଥିଲେ। ପରେ ଶୁଟିଂ ସେଟର କଳାକାରମାନେ କାର ଛାଡି ଘଟଣାସ୍ଥଳରୁ ପଳାଇଯାଇଥିଲେ। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ଲୋକମାନଙ୍କୁ ବୁଝାଶୁଝା କରିବା ସହ ଆହତଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରିଥିଲା। ଏହା ସହ ଦୁର୍ଘଟଣା ଘଟାଇଥିବା କାରକୁ ଜବତ କରିବା ସହ ଚାଳକଙ୍କୁ ଅଟକ ରଖି ପଚରାଉଚରା ଚଳାଇଛି।
