ଅନୁଗୋଳ ଅଫିସ, ୨୦।୯-ଅନୁଗୋଳ ପୌରପାଳିକାର ଅଳିଆ ବିବାଦ ଥମିବାର ନା ଧରୁନି। ଯୁଆଡ଼େ ଅଳିଆ ନେଇ ଗଲେ ବି ସ୍ଥାନୀୟ ଅଞ୍ଚଳବାସୀଙ୍କଠାରୁ ବିରୋଧର ସମ୍ମୁଖୀନ ହେବାକୁ ପଡ଼ୁଛି। ଫଳରେ ଅନୁଗୋଳ ପୌରପାଳିକା କର୍ତ୍ତୃପକ୍ଷ ବିଭିନ୍ନ ସମୟରେ ହଟହଟା ହେଉଥିବା ଦେଖିବାକୁ ମିଳୁଛି। ଏଥିଯୋଗୁ ସହରର ବିଭିନ୍ନ ସ୍ଥାନରେ ଅଳିଆ ଗଦା ହୋଇ ରହୁଥିଲେ ମଧ୍ୟ ଡମ୍ପିଂ କରିବାକୁ ଜାଗା ମିଳୁନି।
ଅନୁଗୋଳ ପୌରପାଳିକା ୬ଟି ଟ୍ରାକ୍ଟରରେ ଗୁରୁବାର ସହରରୁ ଆବର୍ଜନା ଉଠାଇ ପଞ୍ଚମହଲା ଏଫ୍ଏସ୍ଟିପି ପ୍ଲାଣ୍ଟ ପଛ ପଡ଼ିଆରେ ପକାଇବାକୁ ଯାଇଥିଲା। କିନ୍ତୁ ନୂଆମୌଜା ଗ୍ରାମବାସୀ ଏହାକୁ ବିରୋଧ କରିବା ସହ ଇଟା ପଥର ଥୋଇ ରାସ୍ତା ଅବରୋଧ କରିଥିଲେ। ଫଳରେ ଦିନ ତମାମ୍ ଅଳିଆ ବୋଝେଇ ଟ୍ରାକ୍ଟର ଏଫ୍ଏସ୍ଟିପି ନିକଟରେ ଛିଡ଼ା ହୋଇ ରହିଥିଲା।
