ଭବାନୀପାଟଣା, ୧୫ା୬(ଡି.ଏନ୍.ଏ) : ଦିନ୍ଥିଲା କଳହାଣ୍ଡି ଜିଲା ଭୁଖମରି ଆର ପିଲାବିକ୍ରି ଲାଗି ବଦ୍ନାମ ଥିଲା। ଏହେଦେ ସାରା ରାଏଜେ ଭାତହଁ।ଡ଼ି ହିସାବେ ନଁ। କମେଇଛେ। ହେଲେ ଆଏଜ୍ ବି ଜିଲାରେ ଅନେକ ଜାଗାରେ ଲୋକ୍ ଭୋକ୍ ଉପାସରେ ଦିନ୍ ବିତଉଥିବାର ଦେଖ୍ବାକେ ମିଲୁଛେ। ବହୁତ ଲୋକ୍ ଫିଦିନ ଦୁଇବେଲା ଦୁଇମୁଠା ଖାଏବାକେ ନାଇଁ ପାଏବାର। ଝନେ ଭିନ୍ନକ୍ଷମ ବାପ୍ ତା’ର ୪ ବଛର୍ର ଛୁଆକେ ଧରି ଖରା, ବରଷା, ଶୀତ କାକରରେ ଘର ଘର ବୁଲି ଭିଖ୍ ମାଗୁଥିବାର ଦୁରୁଶ୍ ଇଥିର ଗୁଟେ ଉଦାହରନ୍ ଆଏ।
ସୂଚନା ଅନ୍ସାରେ କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକ ଧାମନପୁର ପଁଚେତ୍ ଅଧୀନ ମକୁନ୍ଦପୁର ସାଲେପଡ଼ାର ଦିବ୍ୟାଙ୍ଗ ତ୍ରିବନ ବାଗ(୪୯)। ତାକର ପରିବାର କହେଲେ ମାନସିକ ଭିନ୍ନକ୍ଷମ ମାଏକିନା ପୁଷ୍ପା(୩୬) ଆର ୪ ବଛର୍ର ଝି’। ତ୍ରିବନକଁର ଝାଟି ମାଟିର ଘର ଖଁଡେକେ ଛାଡ଼ିଦେଲେ ଜମିବାଡ଼ି ବଲି କିଛି ନାଇଁ। ଏହେଦ୍କା ତ୍ରିବନକଁର ପାସେ ଖାଏବାକେ ଦାନା ଆର ପିଁଧବାକେ କପଡ଼ାର ବଡ଼ଭାରି ଅଭାବ ରହିଛେ। କହେବାକେ ଗଲେ ଭଗବାନ ଭରସାରେ ଚାଲିଛେ ତାକର ପରିବାର। ସେ ବିପିଏଲ ଶ୍ରେଣୀର ହେଇଥିଲାବେଲେ ତାହାକୁ ପଁଚେତ୍ରୁ ଚାଉଲ ଆର ୩ଶହ ଟଁକା ଭିନ୍ନକ୍ଷମ ଭତା ମିଲୁଛେ। ହେଲେ ମାଏକିନା ପୁଷ୍ପା ମାନସିକ ଭିନ୍ନକ୍ଷମ ହେଇଥିଲେ ବି ଭତା ପାଏବାରୁ ବଁଚିତ୍ ହେଇ ରହିଛନ୍। ତ୍ରିବନ ପାଉଥିବାର ସରକାରୀ ସାହାଯ୍ ପରିବାରକେ ନିଅଁଟ୍ ହେଉଛେ। ଇଆଡ଼େ ଦୁଇ ମାଏଝି ମୁନୁଷ୍ କାମ୍ଧଁଦା କରବାକେ ସକ୍ଷମ ନୁହଁନ୍। ସେଥିରଲାଗି ଘଏତାମାଏପୋ ଛୁଆକେ ଧରି ଗୁଟେ ତିନ୍ ଚକିଆ ସାଇକେଲରେ ଘରର ବୁଲି ଭିଖ୍ ମାଗି ପେଟ ପାଲୁଛନ୍। ସରକାର ଗରିବ୍ ଦୁଖି, ଭିନ୍ନକ୍ଷମମାନକର ଲାଗି ଯୋଜନା ଉପରେ ଯୋଜନା ତିଆର କଲାବେଲେ ତ୍ରିବନକଁର ଲାଗି ସରକାରୀ ଯୋଜନା ସାତ୍ସପନ ହେଇଛେ। ମୋର ୪ ବଛ୍ରିଆ ଛୁଆର ଗୁଲ୍ଗୁଲା ଦେଖି ଲୋକ୍ ଭିଖ୍ ଦେଉଛନ୍ ସତ୍, ହେଲେ ଝନକର ଘରକେ ସବୁଦିନ ମାଗିଗଲେ ସେ କେତେ ଦିନ୍ ଭିଖ୍ ଦେବା ବଲି ତ୍ରିବନ କହିଛନ୍। ସେନ୍ତା ଦୁଇ ମାଏଝିମୁନୁଷ୍ ଭିନ୍ନକ୍ଷମ ହେଇଥିଲାବେଲେ ଗୁଟେ ଭଂଗା ଦଦ୍ରା ଘରେ ଜୀବନ୍କେ ପାଏନ୍ଛଡ଼େଇ ରହୁଛନ୍। ହେଲେ ଇ ଦୁଖି ପରିବାର ଉପରେ ଆଏଜ୍ତକ ଥାନୀୟ ପରଶାସନର ଦୁରୁଷ୍ଟି ନାଇଁପଡ଼ି। ଯେନ୍ଥିରଲାଗି ପରିବାରଟା ଆବାସ ଯୋଜନାରେ ପକା ଘରଖଁଡ଼େ ପାଏବାରୁ ବି ବଁଚିତ୍ ହେଇ ରହିଛନ୍। ଯେତେ ଜଲଦି ହେବା ଜିଲା ଆର ଥାନୀୟ ପରଶାସନ ଇ ଦୁଖି ପରିବାର ଉପରେ ଦୁରୁଷ୍ଟି ଦେଇ ସବୁ ପରକାର ସରକାରୀ ସାହାଯ୍ ଯୁଗେଇ ଦେବାକେ ଜନସାଧାରନରେ ଦାବି ହେଉଛେ। ନାଇଁହେଲେ ଇ ଦୁଖି ପରିବାରର କାହାର କେତେବେଲେ ଅଭାବ ଅନାଟନ ଲାଗି ଅନାହାର ମୁର୍ତୁ ହେବା କିଛି କହି ନାଇଁହୁଏ।
