ଅନୁଗୋଳ ଅଫିସ, ୨୯।୭: ଅନୁଗୋଳ ଜିଲାରେ ଶିକ୍ଷକ ଅଭାବ ସମସ୍ୟା ଯୋଗୁ ବିଭିନ୍ନ ବିଦ୍ୟାଳୟରେ ଶିକ୍ଷାଦାନ ବାଧାପ୍ରାପ୍ତ ହେଉଛି। ବର୍ଷ ବର୍ଷ ଧରି ଶିକ୍ଷକ ନିଯୁକ୍ତି ଦିଆଯାଉ ନ ଥିବାରୁ ଏହି ସମସ୍ୟା ଏବେ ପୂରା ବ୍ୟବସ୍ଥାକୁ ବିପର୍ଯ୍ୟସ୍ତ କରିଦେବାକୁ ବସିଛି। ଏପରି କି ଅନେକ ସ୍କୁଲର ଗୋଟିଏ ଲେଖାଏ ଶ୍ରେଣୀ କକ୍ଷରେ ଧାର୍ଯ୍ୟଠାରୁ ୩ରୁ ୪ ଗୁଣା ଛାତ୍ରୀଛାତ୍ର ବସି ପଢ଼ିବାକୁ ବାଧ୍ୟ ହେଉଥିବା ଦେଖିବାକୁ ମିଳୁଛି। ଏତେ ସଂଖ୍ୟାରେ ଛାତ୍ରୀଛାତ୍ର ଗୋଟିଏ କୋଠରିରେ ବସୁଥିବାରୁ ସେମାନେ କିପରି ଶିକ୍ଷାଲାଭ କରୁଥିବେ ତାହକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ସ୍କୁଲ ଶିକ୍ଷାରେ ଏପରି ଅବ୍ୟବସ୍ଥା ନେଇ ଅଭିଭାବକମାନେ ତୀବ୍ର ଅସନ୍ତୋଷ ପ୍ରକାଶ କରିବା ସହ ତୁରନ୍ତ ଶିକ୍ଷକ ନିଯୁକ୍ତି ସହ ସେକସନ୍ କରିବା ପାଇଁ ଦାବି କରିଛନ୍ତି।
ଅନୁଗୋଳ ସହର ଓ ଉପକଣ୍ଠରେ ଥିବା ଅନେକ ବିଦ୍ୟାଳୟରେ ଏପରି ଅବ୍ୟବସ୍ଥା ନଜରକୁ ଆସିଛି। ସହର ଛାତି ଉପରେ ଥିବା ପିଟିସି ଉଚ୍ଚ ବିଦ୍ୟାଳୟରେ ମଧ୍ୟ ଆବଶ୍ୟକ ଶିକ୍ଷକ ଅଭାବରୁ ଏହି ସମସ୍ୟା ସୃଷ୍ଟି ହୋଇଛି। ଏଠାରେ ୯ମ ଶ୍ରେଣୀରେ ଅଧ୍ୟୟନ କରୁଥିବା ୧୨୬ ଛାତ୍ରୀଛାତ୍ରୀ ଗୋଟିଏ କୋଠରିରେ ବସିଛନ୍ତି। ଫଳରେ ଶୈକ୍ଷିକ ବାତାବରଣ ଖରାପ ହେଉଥିବା ଅଭିଯୋଗ ହେଉଛି। କେବଳ ଏହି ଗୋଟିଏ ସ୍କୁଲ ନୁହେଁ, ସହର ଉପକଣ୍ଠ ବଡ଼କେରା ଶ୍ରୀ ଜଗନ୍ନାଥ ଉଚ୍ଚ ବିଦ୍ୟାଳୟରେ ଗୋଟିଏ କ୍ଲାସରୁମ୍ରେ ୧୬୧, ପୁରୁଣାଗଡ଼ ଉଚ୍ଚ ବିଦ୍ୟାଳୟରେ ୧୩୫, କୁମୁରିସିଂହା ପଞ୍ଚାୟତ ଉଚ୍ଚ ବିଦ୍ୟାଳୟରେ ୧୪୫ ଛାତ୍ରୀଛାତ୍ର ଗୋଟିଏ ଲେଖାଏ ଶ୍ରେଣୀଗୃହରେ ବସି ପାଠପଢ଼ୁଛନ୍ତି। ଜିଲା ଶିକ୍ଷା ପ୍ରଶାସନ ନିକଟରେ ମଧ୍ୟ କୌଣସି ପଦକ୍ଷେପ ନେଉନାହିଁ। ଗୋଟିଏ ଶ୍ରେଣୀ ଗୃହରେ ୪୦ ଛାତ୍ରୀଛାତ୍ର ଅଧ୍ୟୟନ କରିପାରିବେ ବୋଲି ନିୟମ କରିଥିଲେ ମଧ୍ୟ ଏସବୁ ସ୍କୁଲଗୁଡ଼ିକରେ ଏହାର ୩ରୁ ୪ ଗୁଣା ପିଲା ବସିବା ଅଭିଭାବକଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି। ଏପରି କ୍ଷେତ୍ରରେ ଅଧିକ ସେକସନ୍ କରାଯିବା ପାଇଁ ନିୟମ ରହିଛି। କିନ୍ତୁ ପରସ୍ଥିତିରେ ପଡ଼ି ଏତେ ସଂଖ୍ୟାରେ ଛାତ୍ରୀଛାତ୍ରୀଙ୍କୁ ଶିକ୍ଷାଦାନ କରାଯାଉଥିବା ଶିକ୍ଷକମାନେ କହିଛନ୍ତି। ଜିଲା ଶିକ୍ଷା ଅଧିକାରୀ ସଚ୍ଚିଦାନନ୍ଦ ବେହେରା କହିଛନ୍ତି, ଶିକ୍ଷକ ଅଭାବ କାରଣରୁ ଏପରି ପରସ୍ଥିତି ଉପୁଜୁଛି। ତେବେ ସ୍ଥିତି ସୁଧାରିବାକୁ ଉଦ୍ୟମ ଜାରି ରହିଛି।
