ନୂଆଦିଲ୍ଲୀ. ୧୨।୬: ଆନ୍ଧ୍ର ପ୍ରଦେଶର ଜଗନମୋହନଙ୍କ ନେତୃତ୍ୱାଧୀନ ଓ୍ବାଇଏସଆର କଂଗ୍ରେସକୁ ଏଥର ଲୋକ ସଭା ଉପବାଚସ୍ପତି ପଦ ଅଫର୍ ଭାଜପା ଦେଇପାରେ। ମଙ୍ଗଳବାର ଭାଜପା ସାଂସଦ ଜିଭିଏଲ ନରସିଂହା ରାଓ ମୁଖ୍ୟମନ୍ତ୍ରୀ ଜଗନଙ୍କୁ ଭେଟିବା ପରେ ଏହି ଚର୍ଚ୍ଚା ଜୋର ଧରିଛି। ତେବେ ହଠାତ୍ ନିଷ୍ପତ୍ତି ନ ନେଇ କିଛି ଦିନ ସମୟ ନେଇଛନ୍ତି ଜଗନ। ଏନେଇ ସେ ଦଳର ବରିଷ୍ଠ ନେତାଙ୍କ ସହ ଆଲୋଚନା କରିଛନ୍ତି। ଗୃହରେ ସବୁଠାରୁ ବଡ଼ ଦଳ ଭାବେ ଅଛନ୍ତି କଂଗ୍ରେସ ଓ ଡିଏମକେ। ଏହି ଦୁଇ ଦଳ ଉପ ବାଚସ୍ପତି ପଦବୀ ନେବା ପାଇଁ ମନା କରିଛନ୍ତି। ତେଣୁ ତୃତୀୟ ବୃହତ ଦଳ ଭାବରେ ୱାଇଏସଆର କଂଗ୍ରେସକୁ ଏହି ପ୍ରସ୍ତାବ ଦିଆଯାଇପାରେ ଚର୍ଚ୍ଚା ହେଉଛି। ସୂଚନାଯୋଗ୍ୟ, ଗତ ଲୋକ ସଭାରେ ଭାଜପାର ୩୦୩ଜଣ ସାଂସଦ, କଂଗ୍ରେସ ୫୨, ଡିଏମକେ ୨୩ ଏବଂ ୱାଇଏସଆର କଂଗ୍ରେସ ୨୨, ତୃଣମୂଳ କଂଗ୍ରେସ ୨୨, ଶିବସେନା ୧୮, ଜେଡିୟୁ ୧୬, ବିଜେଡି ୧୨ ଏବଂ ବିଏସପି ୧୦ ଆସନ ଓ ଅନ୍ୟାନ୍ୟ ଦଳ ୧୦ରୁ କମ ଆସନରେ ବିଜୟୀ ହୋଇଛନ୍ତି। ଆନ୍ଧ୍ର ପ୍ରଦେଶରେ ଏକକ ସଂଖ୍ୟାଗରିଷ୍ଠତା ହାସଲ କରି ସରକାର ଗଢିଥିବା ଜଗନ ନିର୍ବାଚନ ଜିତିବା ପରେ ମୋଦିଙ୍କୁ ସୌଜନ୍ୟମୂଳକ ସାକ୍ଷାତ କରିଥିଲେ। ସେହିପରି ନୀତି ଆୟୋଗ ବୈଠକରେ ମଧ୍ୟ ଉଭୟ ନେତା ଆଲୋଚନା କରିବାର କାର୍ଯ୍ୟକ୍ରମ ରହିଛି।
