ନୂଆଦିଲ୍ଲୀ,୨୫।୩: କରୋନା ସଂକ୍ରମଣ ଯୋଗୁ ସାରା ପୃଥିବୀରେ ଅଚଳାବସ୍ଥା ସୃଷ୍ଟି ହୋଇଛି। ଭାରତ ସରକାର ଲୋକଙ୍କ ସୁରକ୍ଷା ଦୃଷ୍ଟିରୁ ୨୧ ଦିନିଆ ଲକ୍ ଡାଉନ୍ ଘୋଷଣା କରିଛନ୍ତି। ଲକ୍ ଡାଉନ୍ ଘୋଷଣା ପରେ ପନିପରିବା, ଖାଦ୍ୟ ସାମଗ୍ରୀର ଦାମ ବଢ଼ିବାରେ ଲାଗିଛି। ଫଳରେ ସାଧାରଣ ଲୋକେ ହନ୍ତସନ୍ତ ହେବା ଆରମ୍ଭ କରିଛନ୍ତି। ଲକ୍ ଡାଉନ୍ ଯୋଗୁ ଦେଶର ୨୪ କୋଟି ୯୮ ଲକ୍ଷରୁ ଅଧିକ ଶ୍ରମିକ ଏବେ ଅନିଶ୍ଚିତ ଭବିଷ୍ୟତ ମଧ୍ୟରେ ରହିଛନ୍ତି। ସେମାନଙ୍କ ପାଇଁ କାମ ନ କଲେ ଖାଇବା ବନ୍ଦ। କାମଧନ୍ଧା ନ ଥିବାରୁ ଏବେ ଖାଇବା ପାଇଁ ସେମାନଙ୍କ ପାଖରେ ଟଙ୍କା ନାହିଁ। ସମ୍ପ୍ରତି ଦେଶରେ ୪୬ କୋଟି ୭୦ ଲକ୍ଷରୁ ଅଧିକ ରୋଜଗାର କରୁଥିବା ଲୋକ ରହିଛନ୍ତି। ସେମାନଙ୍କ ମଧ୍ୟରେ ୪୭ ପ୍ରତିଶତ ଅର୍ଥାତ୍ ୨୧ କୋଟି ୯୪ ଲକ୍ଷରୁ ଅଧିକ ଲୋକ ନିଜେ ନିଜର କାମ ଧନ୍ଦା କରୁଥାନ୍ତି। ୫୩.୫ ପ୍ରତିଶତ ଅର୍ଥାତ୍ ୨୪ କୋଟି ୯୮ ଲକ୍ଷରୁ ଅଧିକ ଶ୍ରମିକ ରହିଛନ୍ତି। ଅପରପକ୍ଷରେ ୩୬.୫ ପ୍ରତିଶତ ସାମୟିକ ଶ୍ରମିକ ରହିଛନ୍ତି। ସେମାନଙ୍କ ସଂଖ୍ୟା ୧୭ କୋଟି ୪ ଲକ୍ଷରୁ ଅଧିକ ରହିଛି। ସେହିପରି ୧୭ ପ୍ରତିଶତ ଅର୍ଥାତ୍ ୭ କୋଟି ୯୩ ଲକ୍ଷରୁ ଅଧିକ ଦିନ ମଜୁରିଆ ରହିଛନ୍ତି। ୨୦୧୫ ରିପୋର୍ଟ ଅନୁସାରେ ରୋଜଗାର କରୁଥିବା ଲୋକଙ୍କ ମଧ୍ୟରୁ ୯୨ ପ୍ରତିଶତରୁ ଅଧିକ ମହିଳା ଏବଂ ୮୨ ପ୍ରତିଶତରୁ ଅଧିକ ପୁରୁଷଙ୍କ ମାସିକ ଆୟ ୧୦,୦୦୦ଟଙ୍କାରୁ କମ୍ ରହିଛି। ୭ମ ବେତନ କମିଶନଙ୍କ ଦ୍ୱାରା ଧାର୍ଯ୍ୟ ହୋଇଥିବା ମାସିକ ଆୟ ସୀମା ୧୮,୦୦୦ଟଙ୍କାଠାରୁ ସେମାନେ ଯଥେଷ୍ଟ କମ ରୋଜଗାର କରିଥାନ୍ତି। ସେହିପରି ବିଭିନ୍ନ ରାଜ୍ୟରୁ ଅନ୍ୟ ରାଜ୍ୟକୁ କାମ ଧନ୍ଦା ଉଦ୍ଦେଶ୍ୟରେ ଆସିଥିବା ଠିକା ଶ୍ରମିକଙ୍କ ଅବସ୍ଥା ମଧ୍ୟ ଲକ୍ ଡାଉନ୍ ଯୋଗୁ ଅଧିକ ପ୍ରଭାବିତ ହେବ ବୋଲି ବିଶେଷଜ୍ଞ ମତପୋଷଣ କରିଛନ୍ତି।
https://thewire.in/labour/migrant-contract-workers-coronavirus-lockdown
