ରାଜ୍ୟରେ ବନ୍ଦ ହେବ ଓଏସ୍‌ଟିଏଫ୍‌

କଟକ ଅଫିସ, ୯ା୧: ଓଡ଼ିଶା ରାଜ୍ୟ ଚିକିତ୍ସା ପାଣ୍ଠି (ଓଏସ୍‌ଟିଏଫ୍‌) ବନ୍ଦ ହେବାକୁ ଯାଉଛି। ଫେବୃୟାରୀ ମାସ ଅଧାରୁ ଏହି ଯୋଜନାକୁ ବନ୍ଦ କରାଯିବ। ଓଏସ୍‌ଟିଏଫ୍‌କୁ ସାର୍ବଜନୀନ ସ୍ବାସ୍ଥ୍ୟ କାର୍ଯ୍ୟକ୍ରମ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସ୍‌କେୱାଇ)ରେ ମିଶାଇ ଦେବାକୁ ସରକାର ଚିନ୍ତା କରୁଛନ୍ତି। ଏସ୍‌ସିବି ମେଡିକାଲ ଅଧୀକ୍ଷକ ପ୍ରଫେସର ଡାକ୍ତର ସରୋଜ କୁମାର ସାହୁ ଏହି ମର୍ମରେ ଗତ ୨ତାରିଖରେ ମେଡିକାଲ ସହିତ ସହବନ୍ଧିତ ଥିବା ସମସ୍ତ ମେଡିସିନ ଷ୍ଟୋର ମାଲିକମାନଙ୍କୁ ଚିଠି ଲେଖିଛନ୍ତି। ମେଡିକାଲ ଉପରେ ଏହି ସବୁ ଦୋକାନଗୁଡ଼ିକର ଯେତେ ବାକି ପଡ଼ିଛି ତା’ର ଏକ ତାଲିକା ପ୍ରସ୍ତୁତ ସହ ମେଡିକାଲର ସମସ୍ତ ବିଭାଗର ମୁଖ୍ୟଙ୍କଠାରୁ କାଉଣ୍ଟର ଦସ୍ତଖତ କରି ଜାନୁୟାରୀ ୧୫ ସୁଦ୍ଧା ଦାଖଲ କରିବା ପାଇଁ ଚିଠିରେ କୁହାଯାଇଛି। ଚିଠିରେ ଆହୁରି ଉଲ୍ଲେଖ ରହିଛି ଯେ, ମେଡିକାଲରେ ଓଏସ୍‌ଟିଏଫ ବାବଦରେ ଥିବା ଟଙ୍କାକୁ ସରକାର ଜାନୁୟାରୀ ୧୫ ପୂର୍ବରୁ ପ୍ରତ୍ୟାହାର କରି ନେଇପାରନ୍ତି। ତେଣୁ ଉକ୍ତ ସମୟ ମଧ୍ୟରେ ବିଲ୍‌ ଦାଖଲ କଲେ ସେମାନଙ୍କର ବକେୟା ପୈଠ କରାଯିବ।
ଅନ୍ୟପକ୍ଷରେ ଓଏସ୍‌ଟିଏଫ୍‌ ବନ୍ଦ କରାଯିବା ନିଷ୍ପତ୍ତିକୁ ନେଇ ଏବେ ତର୍ଜମା ଆରମ୍ଭ ହୋଇଛି। ଏହି ଯୋଜନା ବନ୍ଦ ହେବା ଦ୍ୱାରା ଗରିବ ରୋଗୀମାନେ ଚିକିତ୍ସା ସେବାରୁ ବଞ୍ଚତ୍ତ ହେବେ ବୋଲି ଅନେକ ବରିଷ୍ଠ ଡାକ୍ତର ମତ ଦେଉଛନ୍ତି। ମାତ୍ର ସରକାରୀ ସ୍ତରରେ ସେଭଳି କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇନାହିଁ। ଯଦି ଓଏସ୍‌ଟିଏଫ୍‌ ବନ୍ଦ କରାଯାଏ ରୋଗୀ ବିଏସ୍‌କେୱାଇରୁ ଉପକୃତ ହେବାରେ ସାମାନ୍ୟ ଅସୁବିଧା ଉପୁଜିବ ନାହିଁ ବୋଲି ମେଡିକାଲ ଅଧୀକ୍ଷକ ପ୍ରଫେସର ସାହୁ କହିଛନ୍ତି। ଓଏସ୍‌ଟିଏଫ୍‌ ତାଲିକାକୁ ଦେଖିଲେ ୨୦୧୭-୧୮ ଆର୍ଥିକ ବର୍ଷରେ ଏସ୍‌ସିବିରେ ୮୫୫୨ ଜଣ ରୋଗୀଙ୍କ ପିଛା ୩୭ କୋଟି ୯୭ ଲକ୍ଷ ୩୨ ହଜାର ୮୭୩ ଟଙ୍କା ଖର୍ଚ୍ଚ ହୋଇଥିବାବେଳେ ୨୦୧୮-୧୯ ବର୍ଷରେ ୭୦୫୪ ରୋଗୀଙ୍କ ବାବଦରେ ୨୯ କୋଟି ୩୦ ଲକ୍ଷ ୫୪ହଜାର ୯୫୬ ଟଙ୍କା ଖର୍ଚ୍ଚ କରାଯାଇଛି। ସେହିପରି ୨୦୧୯-୨୦ ଆର୍ଥିକ ବର୍ଷର ଡିସେମ୍ବର ମାସ ସୁଦ୍ଧା ଏହି ଯୋଜନାରୁ ୩୭୩୧ ରୋଗୀଙ୍କ ବାବଦରେ ୧୫ କୋଟି ଟଙ୍କା ଖର୍ଚ୍ଚ ହୋଇଛି। ସୂଚନା ଥାଉ କି, ୨୦୧୧ରେ ରାଜ୍ୟ ସରକାର ଓଡ଼ିଶା ରାଜ୍ୟ ଚିକିତ୍ସା ପାଣ୍ଠି ଆରମ୍ଭ କରିଥିଲେ। ଦାରିଦ୍ର୍ୟ ସୀମାରେଖା ତଳେ ରହୁଥିବା ରୋଗୀଙ୍କୁ ଏହି ଯୋଜନାରୁ ଚିକିତ୍ସା ସହାୟତା ଯୋଗାଇ ଦେଉଛନ୍ତି।
ଯୋଜନାର ରୂପରେଖ ଅନୁଯାୟୀ, ଗ୍ରାମାଞ୍ଚଳରେ ଯେଉଁମାନଙ୍କର ବାର୍ଷିକ ଆୟ ୪୦ ହଜାର ଟଙ୍କାରୁ କମ୍‌ ଓ ସହରାଞ୍ଚଳରେ ୬୦ହଜାର ଟଙ୍କାରୁ କମ୍‌ ସେହିମାନଙ୍କୁ ଏହି ଯୋଜନାରୁ ସହାୟତା ମିଳୁଛି। ରାଜ୍ୟର ୩ଟି ମେଡିକାଲ କଲେଜ ସମେତ ଜିଲା ମୁଖ୍ୟ ଚିକିତ୍ସାଳୟରେ ଏହି ଯୋଜନାକୁ କାର୍ଯ୍ୟକାରୀ କରାଯାଇଛି। ଏହା ବାଦ୍‌ ରାଜ୍ୟର ୧୪ଟି ଘରୋଇ ହସ୍ପିଟାଲ ସମେତ ରାଜ୍ୟ ବାହାରର ୬ଟି ଘରୋଇ ହସ୍ପିଟାଲ ସହିତ ସରକାର ଓଏସ୍‌ଟିଏଫ୍‌ ବାବଦରେ ଚୁକ୍ତି କରିଥିଲେ। କ୍ୟାନସର, କିଡ୍‌ନୀ, ଲିଭର, ହୃଦ୍‌ରୋଗୀମାନେ ଏହି ଯୋଜନାରେ ମାଗଣା ଚିକିତ୍ସା ପାଇପାରୁଥିଲେ। ସେମାନଙ୍କର ଚିକିତ୍ସା ପାଇଁ ଆବଶ୍ୟକ ଔଷଧ, ଉପକରଣ ସହବନ୍ଧିତ ଔଷଧ ଦୋକାନଗୁଡ଼ିକରୁ ଯୋଗାଇ ଦିଆଯାଉଥିଲା। ଏବେ ସରକାର ଓଏସ୍‌ଟିଏଫ୍‌କୁ ବିଏସ୍‌କେୱାଇ ସହିତ ମିଶାଇ ଦେବାକୁ ଯୋଜନା କରୁଛନ୍ତି। ମାତ୍ର ବିଏସ୍‌କେୱାଇ ଆରମ୍ଭ କରିବା ପୂର୍ବରୁ ଏହାର ଭିତ୍ତିଭୂମିକୁ ଅଦ୍ୟାବଧି ସୁଦୃଢ କରାଯାଇନାହିଁ। ମୁଖ୍ୟତଃ ବିଏସ୍‌କେୱାଇର ଅନୁଭାଗଗୁଡ଼ିକୁ ଦେଖିଲେ ଏହି ଯୋଜନାରେ ରୋଗୀ ନିରାମୟ କେନ୍ଦ୍ରରୁ ଔଷଧ ଆଣିବାକୁ ଥିବାବେଳେ ସହାୟ ମାଧ୍ୟମରେ ଡାଏଲିସିସ୍‌ ଓ ନିଦାନ ମାଧ୍ୟମରେ ପରୀକ୍ଷା ନିରୀକ୍ଷା କରାଇବେ। ମାତ୍ର ନିରାମୟ ଯୋଜନାର ବିକଳ ଚିତ୍ର ଦାଣ୍ଡରେ ପଡ଼ି ହାଟରେ ଗଡ଼ୁଛି। ନିରାମୟ ଯୋଜନାରେ ସରକାର ୫୧୨ ପ୍ରକାର ଅତ୍ୟାବଶ୍ୟକ ଔଷଧ ଯୋଗାଇ ଦେବେ ବୋଲି ଘୋଷଣା କରିଥିଲେ। ମାତ୍ର ନିରାମୟ କେନ୍ଦ୍ରଗୁଡ଼ିକରେ ସାଧାରଣ ଜ୍ୱର, ଝାଡ଼ା ଔଷଧ ବି ଉପଲବ୍ଧ ରହୁନି। ଏଭଳି ସ୍ଥିତିରେ ରୋଗୀ ନିରାମୟରୁ ଔଷଧ ନ ପାଇ ଘରୋଇ ଔଷଧ ଦୋକାନରୁ ଔଷଧ କିଣିବାକୁ ଏକପ୍ରକାର ବାଧ୍ୟ ହେଉଛନ୍ତି। ଏହାଦ୍ୱାରା ଔଷଧ ଦୋକାନୀମାନେ ଲାଭବାନ ହେଉଛନ୍ତି। ସେହିପରି ବିଏସ୍‌କେୱାଇ ଉପରେ ସମ୍ପୂର୍ଣ୍ଣ ନିର୍ଭରଶୀଳ ହେବା ଦ୍ୱାରା ରୋଗୀଙ୍କୁ ହୀନସ୍ତା ହେବାକୁ ପଡ଼ିବ ବୋଲି ମେଡିକାଲର କେତେଜଣ ବରିଷ୍ଠ ଡାକ୍ତର ମତ ଦେଇଛନ୍ତି । ଅନ୍ୟପକ୍ଷରେ ସରକାର ଓଏସ୍‌ଟିଏଫ୍‌କୁ ସରକାରୀ ମେଡିକାଲ ଓ ମେଡିକାଲ କଲେଜଗୁଡ଼ିକରେ ବନ୍ଦ କରି ଘରୋଇ ହସ୍ପିଟାଲଗୁଡ଼ିକରେ ଏହାକୁ ବଳବତ୍ତର ରଖିବା ଅନ୍ୟ ଏକ ପ୍ରଶ୍ନ ହୋଇଛି। ଘରୋଇ ହସ୍ପିଟାଲଗୁଡ଼ିକୁ ଲାଭ ପହଞ୍ଚାଇବା ପାଇଁ ଏଭଳି ଭିତିରି ବ୍ୟବସ୍ଥା ହୋଇଥିବା କେତେଜଣ ଡାକ୍ତର କହିଛନ୍ତି। ଉଦାହରଣ ସ୍ବରୂପ, ଏସ୍‌ସିବିରେ କିଡ୍‌ନୀ ଟ୍ରାନ୍ସପ୍ଲାଣ୍ଟ କଲେ ୨ରୁ ଅଢେଇ ଲକ୍ଷ ଟଙ୍କା ଓଏସ୍‌ଟିଏଫ୍‌ରୁ ଖର୍ଚ୍ଚ ହେଉଥିବାବେଳେ ବାହାର ରାଜ୍ୟରେ (ଓଏସ୍‌ଟିଏଫ୍‌ ସୁବିଧା ଥିବା ହସ୍ପିଟାଲ)ରେ ଏହି ଖର୍ଚ୍ଚ ୧୫ ଲକ୍ଷ ହେଉଛି। ସେହିପରି ଓପନ ହାର୍ଟ ସର୍ଜରି ପାଇଁ ଏସ୍‌ସିବିରେ ଓଏସ୍‌ଟିଏଫ୍‌ରୁ ଅଢେଇରୁ ୩ ଲକ୍ଷ ଟଙ୍କା ଖର୍ଚ୍ଚ ହେଉଥିବାବେଳେ ଘରୋଇ ହସ୍ପିଟାଲରେ ଏହି ପରିମାଣ ଢେର ଅଧିକ ରହୁଛି। କିନ୍ତୁ ଓଏସ୍‌ଟିଏଫ୍‌ ବନ୍ଦ ହେବା ଦ୍ୱାରା ରୋଗୀଙ୍କୁ ଔଷଧ ଯୋଗାଣରେ କୌଣସି ଅସୁବିଧା ଉପୁଜିବ ନାହିଁ। ସରକାରୀ ସହବନ୍ଧିତ ଔଷଧଦୋକାନଗୁଡ଼ିକ ମେଡିକାଲ ଷ୍ଟୋରରେ ଔଷଧ ଗଚ୍ଛିତ ରଖିବେ। ପୂର୍ବରୁ ରୋଗୀମାନେ ସିଧାସଳଖ ସରକାରୀ ସହବନ୍ଧିତ ଦୋକାନରୁ ଔଷଧ କିଣୁଥିଲେ। ମାତ୍ର ଏବେ ମେଡିକାଲ ପକ୍ଷରୁ ସେମାନଙ୍କୁ ଏହି ଔଷଧକୁ ଷ୍ଟୋର ଜରିଆରେ ଦିଆଯିବ ବୋଲି ହସ୍ପିଟାଲ ମ୍ୟାନେଜର ସୌମ୍ୟା ମହାନ୍ତି କହିଛନ୍ତି।


Enter your email to get our daily news in your inbox.

All Right Reserved By Dharitri.Com

ରାସଗୋବିନ୍ଦପୁରରେ ଥମୁନି ହାତୀ ଉପଦ୍ରବ

ରାସଗୋବିନ୍ଦପୁର,୧୪।୧୨(ଡି.ଏନ୍‌.ଏ.): ମୟୂରଭଞ୍ଜ ଜିଲା ରାସଗୋବିନ୍ଦପୁର ଅଞ୍ଚଳରେ ଏବେ ଧାନ ଅମଳ ଚାଲିଥିବା ବେଳେ ଝାଡଖଣ୍ଡରୁ ଆସିଥିବା ଶତାଧିକ ହାତୀ ଉପଦ୍ରବ ଚଳାଇଛନ୍ତି। ଏହି ହାତୀପଲ ସାରୁମଳା,...

ଲୋକସେବା ଭବନରେ ଦିବ୍ୟାଙ୍ଗ ଓ ବରିଷ୍ଠଙ୍କ ପାଇଁ ସ୍ବତନ୍ତ୍ର ଯାନ ଲୋକାର୍ପିତ

ଭୁବନେଶ୍ୱର, ୧୫।୨ (ବ୍ୟୁରୋ): ଲୋକସେବା ଭବନକୁ ପ୍ରତିଦିନ କାର୍ଯ୍ୟୋପଲକ୍ଷେ ବିଭିନ୍ନ ସ୍ଥାନରୁ ଦିବ୍ୟାଙ୍ଗ ଓ ବରିଷ୍ଠ ନାଗରିକଙ୍କ ସୁଗମ ଯାତାୟାତ ନିମନ୍ତେ ଏକ ସ୍ବତନ୍ତ୍ର ଯାନର...

ନିଆଁରେ ପୋଡ଼ି ହୋଇ ଯୁବକ ଗୁରୁତର

ଛେଣ୍ଡିପଦା,୩।୧୦(ସ୍ବ.ପ୍ର.): ଅନୁଗୋଳ ଜିଲା ଛେଣ୍ଡିପଦା ବ୍ଲକ ଗୋପୀବଲ୍ଲଭପୁର ଗ୍ରାମରେ ଗୁରୁବାର ନିଆଁରେ ପୋଡ଼ି ହୋଇ ଜଣେ ଯୁବକ ଗୁରୁତର ହୋଇଛନ୍ତି। ଗୁରୁତର ଜଣଙ୍କ ହେଲେ ଉକ୍ତ...

ଯେକୌଣସି ସମୟରେ ଯେକୌଣସି ବ୍ୟକ୍ତି ହୋଇପାରନ୍ତି କରୋନା ସଂକ୍ରମିତ: ବାଗ୍‌ଚୀ

ଭୁବନେଶ୍ୱର,୧।୪(ବ୍ୟୁରୋ): କରୋନା ଏଭଳି ଏକ ରୋଗ ଯାହାକି ଧର୍ମ, ଜାତି, ଧନି, ଗରିବ,ବର୍ଣ୍ଣ ନିର୍ବିଶେଷରେ ଏକ ଭୟଙ୍କର ପରିସ୍ଥିତି ସୃଷ୍ଟି କରିଛି। ଏହା ଯେକୌଣସି ସମୟରେ...

ରାଜ୍ୟରେ ଆଖିବୁଜିଲେ ଆଉ ୧୬ କରୋନା ଆକ୍ରାନ୍ତ: ମୃତକଙ୍କ ସଂଖ୍ୟା ପହଞ୍ଚିଲା ୧୬୮୭ରେ

ଭୁବନେଶ୍ୱର, ୨୫।୧୧(ବ୍ୟୁରୋ): ରାଜ୍ୟରେ ବୁଧବାର କରୋନାରେ ୧୬ଜଣଙ୍କ ମୃତ୍ୟୁ ଘଟିଛି। ଏହାକୁ ମିଶାଇ ମୋଟ କରୋନାଜନିତ ମୃତ୍ୟୁ ସଂଖ୍ୟା ୧୬୮୭କୁ ବୃଦ୍ଧି ପାଇଛି। ଏ ନେଇ...

ରାଜ୍ୟରେ କରୋନାରେ ଆଖି ବୁଜିଲେ ଆଉ ୧୨ ଆକ୍ରାନ୍ତ

ଭୁବନେଶ୍ୱର, ୩୧।୧୦(ବ୍ୟୁରୋ): ରାଜ୍ୟରେ ଶନିବାର କରୋନାରେ ଆଉ ୧୨ ଜଣଙ୍କ ମୃତ୍ୟୁ ଘଟିଛି। ଏମାନଙ୍କୁ ମିଶାଇ ରାଜ୍ୟରେ ମୋଟ କରୋନା ଜନିତ ମୃତ୍ୟୁ ସଂଖ୍ୟା ୧୩୨୦ରେ...

ଛେଳିଆ ମାଝି ହତ୍ୟାକାଣ୍ଡ ଘଟଣା: ୯ ଜଣଙ୍କୁ ଆଜୀବନ କାରାଦଣ୍ଡ

ରାୟଗଡ଼ା ଅଫିସ,୧୭।୧୨: ବହୁଚର୍ଚ୍ଚିତ ଛେଳିଆ ମାଝି ହତ୍ୟାକାଣ୍ଡ ମାମଲାରେ ଅଦାଲତ ୯ ଜଣ ଅଭିଯୁକ୍ତଙ୍କୁ ଆଜୀବନ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଜିଲା ଦୌରାଜଜ୍‌ ସୋମଶେଖର...

ବାଦାମବାଡ଼ି ଥାନା ଅଧିକାରୀଙ୍କ ଅନୁଭୂତି: ଆଖି ସାମ୍ନାରେ ମାଓବାଦୀଙ୍କ ଗୁଳିରେ ଟଳିଥିଲେ ସାଥୀ

ଦେଶର ଆଭ୍ୟନ୍ତରୀଣ ସୁରକ୍ଷା ପୋଲିସର ପ୍ରମୁଖ ଦାୟିତ୍ୱ। ଏହି ଦାୟିତ୍ୱ ସମ୍ପାଦନରେ ଅନେକ ପୋଲିସ କର୍ମଚାରୀ ନିଜ ଜୀବନ ଉତ୍ସର୍ଗ କରିଥିବା ନଜିର ରହିଛି। ଅନେକେ...

Advertisement


Archives

Model This Week

Why Dharitri