ପୁରୀ ଅଫିସ, ୯।୫: ମହାମାରୀ କରୋନା ପାଇଁ ମହାପ୍ରଭୁଙ୍କ ରଥ ନିର୍ମାଣକୁ ନେଇ ଯେଉଁ ଅନିଶ୍ଚିତତା ଲାଗି ରହିଥିଲା ତାହା ଦୂର ହୋଇଛି। କେନ୍ଦ୍ର ସରକାରଙ୍କଠାରୁ ସର୍ତ୍ତମୂଳକ ଅନୁମତି ମିଳିବା ପରେ ଶୁକ୍ରବାର ଠାରୁ ରଥ ନିର୍ମାଣ କାମ ଚାଲିଛି। ରଥ ନିର୍ମାଣ ବେଳେ ଜାରି ଗାଇଡ୍ଲାଇନ୍କୁ ପାଳନ କରିବା ଲାଗି ଶନିବାର ରଥ ଖଳାରେ ସେବକମାନଙ୍କୁ ସଚେତନ କରାଯାଇଛି। କାମ ଆରମ୍ଭ କରିବା ପୂର୍ବରୁ ମହାରଣା ସେବକଙ୍କ ସହିତ ରଥ ନିର୍ମାଣରେ ସାମିଲ ଅନ୍ୟ ସେବକଙ୍କୁ କିପରି ମାସ୍କ ପରିଥାନ କରିବେ, ଏକାଧିକ ଥର ହାତ ଭଲ ଭାବେ ସଫା କରିବେ ଏବଂ ସାମାଜିକ ଦୂରତ୍ୱ ରକ୍ଷା କରିବା ଲାଗି ସଚେତନ କରାଯାଇଛି। ଏଡିଏମ୍ଓ(ପରିବାର କଲ୍ୟାଣ) ଦେବୀ ପ୍ରସାଦ ମହାପାତ୍ର ରଥ ଖଳାରେ ସେବକମାନଙ୍କୁ ଏହିଭଳି ସଚେତନ କରିଥିଲେ। ଏତଦ୍ବ୍ୟତିତ ସ୍ବାସ୍ଥ୍ୟ ବିଭାଗ ପକ୍ଷରୁ ୪ଟି ଟିମ୍ ଗଠନ କରାଯାଇଛି। ଗୋଟିଏ ଟିମ୍ ଭକ୍ତ ନିବାସରେ ରହୁଥିବା ସେବାୟତଙ୍କ ସ୍ବାସ୍ଥାବସ୍ଥା ଯାଞ୍ଚ କରିବ। ସେହିପରି ରଥ ଖଳାରେ ଗୋଟିଏ, ଜରୁରୀ କାଳିନ ସେବା ପାଇଁ ଗୋଟିଏ ଏବଂ ଅନ୍ୟ ଏକ ଟିମ୍ ରଥ ନିର୍ମାଣରେ ସମ୍ପୃକ୍ତ ସେବକ ପରିବାର ସଦସ୍ୟଙ୍କ ସ୍ବାସ୍ଥ୍ୟ ସେବା ଯାଞ୍ଚ କରିବ ବୋଲି ଜିଲା ମୁଖ୍ୟ ଚିକିତ୍ସାଧିକାରୀ ଡା. ନିଳକଣ୍ଠ ମିଶ୍ର ସୂଚନା ଦେଇଛନ୍ତି।
