କଟକ ଅଫିସ,୧୧ା୧: ରୋହତକର ଚୌଧୁରୀ ବଂଶୀଲାଲ କ୍ରିକେଟ ଷ୍ଟାଡିୟମରେ ଶନିବାରଠାରୁ ଓଡ଼ିଶା-ହରିୟାଣା ରଣଜୀ ମ୍ୟାଚ୍ ଆରମ୍ଭ ହୋଇଛି। ଓଡ଼ିଶାର ପେସ୍ ବୋଲିଂ ଆଟାକ ପୁଣି ଥରେ ଫଳପ୍ରଦ ହୋଇଛି। ସୂର୍ଯ୍ୟକାନ୍ତ ପ୍ରଧାନଙ୍କ ୬ ଉଇକେଟ ସଫଳତା ଯୋଗୁ ହରିୟାଣା ପ୍ରଥମ ଇନିଂସରେ ୯୦ ରନରେ ଅଲଆଉଟ ହୋଇଯାଇଛି। ଜବାବରେ ଓଡ଼ିଶା ପ୍ରଥମ ଦିବସ ଖେଳ ଷ୍ଟମ୍ପ ଅପସାରଣ ସୁଦ୍ଧା ୫ ଉଇକେଟ ହରାଇ ୧୪୧ରନ କରିଛି। ପେସ୍ ବୋଲରଙ୍କୁ ସୁହାଉଥିବା ଏହି ପିଚ୍ରେ ଗୋଟିଏ ଦିନରେ ୧୫ଟି ଉଇକେଟ ପତନ ଘଟିଥିବା ବେଳେ ପ୍ରଥମ ଇନିଂସ ଅଗ୍ରଣୀ ହାସଲ କରିଥିବା ଓଡ଼ିଶା ବିଜୟ ଆଶାରେ ରହିଛି ।
ହରିୟାଣା ଅଧିନାୟକ ହର୍ଷଲ ପଟେଲ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମ ଉଇକେଟରେ ୧୩ରନ ଯୋଡ଼ିବା ପରେ ଦଳ କ୍ରମାନ୍ବୟରେ ଉଇକେଟ ହରାଇଥିଲା। ୪୩ରନରେ ଦଳର ୬ଜଣ ଖେଳାଳି ପ୍ୟାଭିଲିୟନ ଫେରିଥିଲେ। ଓଡ଼ିଶାର ଯୁବ ପେସ୍ ତାରକା ରାଜେଶ ମହାନ୍ତି ହରିୟାଣାର ପ୍ରଥମ ଦୁଇଟି ଉଇକେଟ ଦଖଲ କରିବା ପରେ ସୂର୍ଯ୍ୟକାନ୍ତ ମଧ୍ୟକ୍ରମ ବ୍ୟାଟିଂ ଲାଇନଅପ୍କୁ ଭୁଶୁୁଡ଼ାଇ ଦେଇଥିଲେ। ଶୁଭମ ରୋହିଲା ହରିୟାଣା ପକ୍ଷରୁ ସର୍ବାଧିକ ୨୦ରନ କରିଥିଲେ। ପ୍ରମୋଦ ଚାଣ୍ଡିଲା ୧୬ରନ, ଟିନୁ କୁଣ୍ଡୁ ୧୫ରନ, ଆଶିଷ ହୁଡ଼ା ୧୨ରନ, ଅଙ୍କିତ କୁମାର ୧୦ରନ କରିଥିଲେ। ୧୨ ଓଭର ବୋଲିଂ କରିଥିବା ସୂର୍ଯ୍ୟକାନ୍ତ ୩୬ ରନ ବ୍ୟୟରେ ୬ଟି ଉଇକେଟ ଦଖଲ କରିଥିଲେ। ରାଜେଶ ୨ଟି, ବସନ୍ତ ମହାନ୍ତି ଓ ପପୁ ରାୟଙ୍କୁ ଗୋଟିଏ ଲେଖାଏ ଉଇକେଟ ମିଳିଥିଲା। ପ୍ରଥମ ଇନିଂସ ବ୍ୟାଟିଂ ଆରମ୍ଭ କରିଥିବା ଓଡ଼ିଶା ୧୭ରନରେ ଓପନର ଦେବାଶିଷ ସାମନ୍ତରାୟଙ୍କୁ ହରାଇଥିଲା। ଦେବାଶିଷ ଅଜିତ ଚହଲଙ୍କ ଦ୍ୱାରା କ୍ଲିନ ବୋଲ୍ଡ ହୋଇଥିଲେ। ପରେ ୪୭ ରନରେ ୪ଟି ଉଇକେଟ ହରାଇ ଓଡ଼ିଶା ସଙ୍କଟରେ ପଡ଼ିଥିଲା। ଶାନ୍ତନୁ ମିଶ୍ର ୧୭ ରନ, ଅଧିନାୟକ ଶୁଭ୍ରାଂଶୁ ସେନାପତି ୧୨ରନ, ଗୋବିନ୍ଦ ପୋଦ୍ଦାର ୨ରନରେ ପ୍ୟାଭିଲିୟନ ଫେରିଥିଲେ। ପୂର୍ବତନ ଅଧିନାୟକ ବିପ୍ଳବ ସାମନ୍ତରାୟଙ୍କ ରକ୍ଷଣାତ୍ମକ ବ୍ୟାଟିଂ ଦେଖିବାକୁ ମିଳିଥିଲା। ଏହି ମ୍ୟାଚ୍ରେ ଅଭିଶେକ ରାଉତଙ୍କ ବଦଳରେ ରାଜେଶ ଧୁପରଙ୍କୁ ଚୂଡ଼ାନ୍ତ ଏକାଦଶରେ ସାମିଲ କରାଯାଇଥିଲା। ୫ମ ଉଇକେଟ ଭାଗିଦାରୀରେ ରାଜେଶ ଧୂପରଙ୍କ ୪୬ ରନ ଓ ୬ଷ୍ଠ ଉଇକେଟରେ ଉଇକେଟ କିପର ସୁଜିତ ଲେଙ୍କାଙ୍କ ସହ ୪୮ରନର ଭାଗିଦାରୀ ସୃଷ୍ଟି କୁଣ୍ଡୁଙ୍କ ବଲରେ ଆଉଟ ହୋଇଛନ୍ତି। ବିପ୍ଳବ ୪୫ ଓ ସୁଜିତ ୨୧ରନ କରି ଅପରାଜିତ ଅଛନ୍ତି। ହର୍ଷଲ ପଟେଲ ସର୍ବାଧିକ ୨ଟି ଉଇକେଟ ଅକ୍ତିଆର କରିଥିବା ବେଳେ ଆଶିଷ ହୁଦା, ଅଜିତ ଚହଲ ଓ ଟିନୁ କୁଣ୍ଡୁ ୧ଗୋଟିଏ ଲେଖାଏ ଉଇକେଟ ପାଇଥିଲେ ।
