ଭୁବନେଶ୍ୱର,୨।୩(ବ୍ୟୁରୋ): ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରବିବାର ୪ ନେତାଙ୍କୁ ମୟୂରଭଞ୍ଜ ଜିଲାର ୮ ବିଧାନସଭା ନିର୍ବାଚନମଣ୍ଡଳୀ ପର୍ଯ୍ୟବେକ୍ଷକ ଭାବେ ଦାୟିତ୍ୱ ପ୍ରଦାନ କରିଛନ୍ତି। ଜଣେ ନେତାଙ୍କ ହାତରେ ମୟୂରଭଞ୍ଜ ଜିଲାର ଦୁଇଟି ଲେଖାଏ ବିଧାନସଭା କ୍ଷେତ୍ର ପ୍ରଦାନ କରାଯାଇଛି। ୨୦୧୬ ପଞ୍ଚାୟତ ନିର୍ବାଚନରେ ମୟୂରଭଞ୍ଜ ଜିଲାରେ ବିଜେଡି ଫଳାଫଳ ସେତେଟା ଆଖିଦୃଶିଆ ହୋଇ ନ ଥିଲା। ପରବର୍ତ୍ତୀ ସମୟରେ ୨୦୧୯ ସାଧାରଣ ନିର୍ବାଚନ ଫଳାଫଳ ମଧ୍ୟ ଶାସକ ଦଳ ସପକ୍ଷରେ ଗଲାନାହିଁ। ତେଣୁ ଏହାପରଠାରୁ ବିଜେଡି ସଭାପତି ମୟୂରଭଞ୍ଜ ଜିଲା ସାଙ୍ଗଠନିକ ସ୍ଥିତି ସଜାଡିବାକୁ ଏକ ପ୍ରକାର ଜୋରଦାର ଉଦ୍ୟମ ଆରମ୍ଭ କରିଦେଇଛନ୍ତି। ଚାନ୍ଦବାଲି ବିଧାୟକ ବ୍ୟୋମକେଶ ରାୟ ମୟୂରଭଞ୍ଜ ନିର୍ବାଚନମଣ୍ଡଳୀର କରଞ୍ଜିଆ ଏବଂ ଯଶିପୁର ନିର୍ବାଚନମଣ୍ଡଳୀ ପର୍ଯ୍ୟବେକ୍ଷକ ଦାୟିତ୍ୱ ପାଇଛନ୍ତି। ଉତ୍ତର ଭୁବନେଶ୍ୱର ନିର୍ବାଚନମଣ୍ଡଳୀ ବିଧାୟକ ସୁଶାନ୍ତ ରାଉତଙ୍କ ହାତରେ ବାରିପଦା ଏବଂ ମୋରଡା ବିଧାନସଭା କ୍ଷେତ୍ର ଦାୟିତ୍ୱ ଦିଆଯାଇଛି। ସେହିପରି ଧାମନଗରର ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳଙ୍କୁ ରାଇରଙ୍ଗପୁର ଏବଂ ସାରଶକଣା ଦାୟିତ୍ୱ ଦିଆଯାଇଛି। ଭଦ୍ରକ ବିଧାୟକ ସଞ୍ଜୀବ ମଲିକଙ୍କ ହାତରେ ଉଦଳା ଓ ବଡସାହି ଦାୟିତ୍ୱ ପ୍ରଦାନ କରାଯାଇଛି। ଗତ ସାଧାରଣ ନିର୍ବାଚନ ଫଳାଫଳ ପ୍ରକାଶ ପାଇବା ପରେ ଯାଜପୁର ବିଧାୟକ ପ୍ରଣବ ପ୍ରକାଶ ଦାସଙ୍କୁ ମୟୂରଭଞ୍ଜ ଜିଲାର ପର୍ଯ୍ୟବେକ୍ଷକ ଦାୟିତ୍ୱ ଦିଆଯାଇଛି। ତେଣୁ ୮ ନିର୍ବାଚନମଣ୍ଡଳୀ ଦାୟିତ୍ୱ ପାଇଥିବା ୪ ନେତା ବର୍ତ୍ତମାନ ପ୍ରଣବ ପ୍ରକାଶଙ୍କ ନିଷ୍ପତ୍ତି ଅନୁଯାୟୀ କାର୍ଯ୍ୟ କରିବେ। ଆଗକୁ ପଞ୍ଚାୟତ ଏବଂ ମ୍ୟୁନିସିପାଲିଟି ନିର୍ବାଚନ ଆସୁଥିବାରୁ ଏବେଠାରୁ ଉକ୍ତ ଜିଲାକୁ ବିଜେଡି ସଭାପତି ଅଧିକ ଗୁରୁତ୍ୱ ଦେଉଥିବା ଚର୍ଚ୍ଚା ହେଉଛି।
ସୂଚନାଯୋଗ୍ୟ ଯେ, ମୟୂରଭଞ୍ଜ ଲୋକ ସଭା ନିର୍ବାଚନମଣ୍ଡଳୀର ୭ ବିଧାନସଭା କ୍ଷେତ୍ର ମଧ୍ୟରୁ ୨ଟି ବିଜେଡି ହାତରେ ଥିବାବେଳେ ୫ଟି ଆସନ ଭାଜପା ଅକ୍ତିଆର କରିନେଇଛି। ମୟୁରଭଞ୍ଜ ଜିଲାର ଉଦଳା, ବାରିପଦା, ଜଶିପୁର, ସାରସକଣା, ରାଇରଙ୍ଗପୁର ବିଧାନସଭା ଆସନରେ ଭାଜପା ବିଜୟୀ ହୋଇଛି। ସେହିପରି ମୋରଡା ଏବଂ ବାଙ୍ଗିରପୋଷି ଆସନରେ ବିଜେଡି ବିଜୟୀ ହୋଇଛି। ସେହିପରି ମୟୁରଭଞ୍ଜ ଲୋକ ସଭା ଆସନରେ ଭାଜପା ପ୍ରାର୍ଥୀ ବିଶେଶ୍ୱର ଟୁଡୁ ଏମ୍ପି ଭାବେ ବିଜୟୀ ହୋଇଛନ୍ତି। ସେହିପରି ପର୍ଯ୍ୟବେକ୍ଷକ ଦାୟିତ୍ୱ ଦିଆଯାଇଥିବା ୮ ବିଧାନସଭା କ୍ଷେତ୍ର ମଧ୍ୟରୁ କରଞ୍ଜିଆ ନିର୍ବାଚନମଣ୍ଡଳୀ ମୟୂରଭଞ୍ଜ ଜିଲା ଭିତରେ ଥିଲେ ମଧ୍ୟ ଏହା କେନ୍ଦୁଝର ଲୋକ ସଭା କ୍ଷେତ୍ର ମଧ୍ୟରେ ଆସୁଛି। ଏହି ଆସନରେ ବିଜେଡି ହାତରେ ଅଛି। ଅନ୍ୟପଟେ ଉଦଳା ମଧ୍ୟ ସମାନଭାବେ ଏହି ଜିଲା ମଧ୍ୟରେ ରହିଥିଲେ ସୁଦ୍ଧା ବାଲେଶ୍ୱର ଲୋକ ସଭା କ୍ଷେତ୍ର ଅନ୍ତର୍ଗତ ଆସୁଛି। ତେବେ ମୟୂରଭଞ୍ଜ ଜିଲାର ୮ଟି ବିଧାନସଭା କ୍ଷେତ୍ର ଦାୟିତ୍ୱ ଅନ୍ୟ ଜିଲା ନେତାଙ୍କ ହାତରେ ଦିଆଯାଇଥିଲେ ମଧ୍ୟ ବାଙ୍ଗିରପୋଷି ନିର୍ବାଚନମଣ୍ଡଳୀ ଏହି ଜିଲା ଭିତରେ ଥାଇ ସୁଦ୍ଧା କାହାକୁ ବଣ୍ଟାଯାଇନାହିଁ। ବରିଷ୍ଠ ବିଜେଡି ନେତା ତଥା ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି ଏହି ଆସନରୁ ଜିତିଥିବାରୁ ଏହାର ଦାୟିତ୍ୱ କାହାକୁ ମିଳି ନ ଥିବା କୁହାଯାଉଛି।
