ହାଇଦ୍ରାବାଦ୍, ୨୮।୫: ତେଲେଙ୍ଗାନା ମୁଖ୍ୟମନ୍ତ୍ରୀ କେ.ଚନ୍ଦ୍ରଶେଖର ରାଓଙ୍କ ଝିଅ ଲୋକ ସଭା ନିର୍ବାଚନରେ ପରାସ୍ତ ହେବା ପରେ ତାଙ୍କର ଜଣେ ସମର୍ଥକ ହୃଦ୍ଘାତରେ ପ୍ରାଣ ହରାଇଛନ୍ତି। ନିଜାମବାଦ ଲୋକ ସଭା ଆସନରୁ ନିର୍ବାଚନ ଲଢୁଥିବା କବିତା ଭାଜପାର ଡି ଅରବିନ୍ଦଙ୍କଠାରୁ ୭୧ହଜାର ଭୋଟରେ ପରାସ୍ତ ହେବା ଶୁଣି କିଶୋର ନାମକ ଜଣେ ବ୍ୟକ୍ତି ଶନିବାରଠାରୁ ଖାଇବା, ଶୋଇବା ବନ୍ଦ କରିଦେଇଥିଲେ। ସୋମବାର ସକାଳୁ ତାଙ୍କର ମୃତ୍ୟୁ ହୋଇଥିଲା। ତେଲେଙ୍ଗାନା ରାଷ୍ଟ୍ର ସମିତି(ଟିଆରଏସ) ପକ୍ଷରୁ କବିତା ନିଜ ସମର୍ଥକଙ୍କ ସହ କିଶୋରଙ୍କ ଘରେ ପହଞ୍ଚି ତାଙ୍କ ପରିବାରକୁ ଆଶ୍ୱାସନା ଦେଇଥିଲେ। କାର୍ଯ୍ୟକର୍ତ୍ତାମାନେ ଦଳର ଶକ୍ତି, ଲୋକତାନ୍ତ୍ରିକ ପ୍ରକ୍ରିୟାରେ ଜୟ ପରାଜୟ ଲାଗିରହିଛି, ତେଣୁ ସମର୍ଥକମାନେ ଦୃଢତାର ସହିତ ପରାଜୟକୁ ସ୍ବୀକାର କରନ୍ତୁ ବୋଲି କବିତା ଆହ୍ବାନ ଦେଇଛନ୍ତି।
