ଖୋର୍ଦ୍ଧା ଅଫିସ, ୨୩।୮: ଛଟେଇ ବନ୍ଦ କରିବା, ଲୋଡିଂ ଅନଲୋଡିଂ ଗୋଟିଏ ପେଟି ପ୍ରତି ୧ ଟଙ୍କା କରାଇବା ଓ ଦାୟିତ୍ୱ ନ ପାଇ ସବୁ କାମରେ ହସ୍ତକ୍ଷେପ କରୁଥିବା ଜଣେ ବ୍ୟକ୍ତିଙ୍କୁ ହଟାଇବା ଦାବି ନେଇ ଶୁକ୍ରବାର ପୂର୍ବାହ୍ନ ୯ଟାରୁ ଖୋର୍ଦ୍ଧା ମଦ ନିଗମ ସମ୍ମୁଖରେ ଶ୍ରମିକମାନେ ଧାରଣା ଦେଇଥିଲେ। ଘଟଣାସ୍ଥଳକୁ ମଦ ନିଗମର ଜି.ଏମ. ଟେକ୍ନିକାଲ ପ୍ରଭାତ ବେହେରା ଆସି ଆନ୍ଦୋଳନକାରୀଙ୍କୁ ବୁଝାଶୁଝା କରିଥିଲେ ମଧ୍ୟ ଧାରଣା ହଟିନାହିଁ। ଦାବି ପୂରଣ ନ ହେଲେ ଆନ୍ଦୋଳନ ପ୍ରତ୍ୟାହୃତ ହେବ ନାହିଁ ବୋଲି ଆନ୍ଦୋଳନରତ ଶ୍ରମିକମାନେ କହିଛନ୍ତି। ଅଭିଯୋଗ ଅନୁସାରେ, ରିଟେଲର ଓ କମ୍ପାନୀ ଗାଡିରେ ମଦ ଲୋଡିଂ ଅନଲୋଡିଂ ପାଇଁ ଶ୍ରମିକମାନଙ୍କୁ ପୂର୍ବରୁ ପେଟି ପିଛା ୪୦ ପଇସା ଦିଆ ଯାଉଥିଲା। ଆନ୍ଦୋଳନ ପରେ ୬୦ ପଇସାକୁ ବୃଦ୍ଧି କରାଯାଇଥିଲା। ଶ୍ରମିକଙ୍କ ଯୁକ୍ତି ପେଟି ପିଛା ଦେଢ଼ ଟଙ୍କା ଆସୁଥିବାବେଳେ ୧ ଟଙ୍କା ୧୦ ପଇସା ଓ ୯୦ ପଇସା କୁଆଡେ ଯାଉଛି। ଏହାର ତଦନ୍ତ କରାଯିବାର ଆବଶ୍ୟକତା ଥିବାବେଳେ କରାଯାଉନାହିଁ। ମଜୁରୀ ଦେବାରେ ଉପେକ୍ଷା କରାଯିବା ପରେ ଜିଲା ଶ୍ରମ ଅଧିକାରୀଙ୍କ ପାଖରେ ଅଭିଯୋଗ କରାଯାଇ ମକଦ୍ଦମା କରାଯାଇଛି। ଏଭଳିସ୍ଥଳେ ଖୋର୍ଦ୍ଧା ମଦ ନିଗମରେ କାର୍ଯ୍ୟରତ ଶ୍ରମିକମାନେ ୧୫ ବର୍ଷ ହେଲା କାର୍ଯ୍ୟ କରି ଆସୁଥିଲେ ମଧ୍ୟ ସେମାନଙ୍କୁ ଛଟେଇ କରାଯାଇ ନୂଆ ନିଯୁକ୍ତି ଦେବା ପରେ ଆନ୍ଦୋଳନ କରାଯାଇଥିବା ସମ୍ପାଦକ ପ୍ରକାଶ ନାୟକ କହିଛନ୍ତି। ଆନ୍ଦୋଳନ ପୂର୍ବରୁ ଜିଲାପାଳ, ଏସ୍ପି, ଜିଲା ଶ୍ରମ ଅଧିକାରୀ, ଏମ୍ଡି ମଦ ନିଗମର ଅବଗତ କରାଯାଇଥିଲା।
