ରାଞ୍ଚି,୨୩।୧୨: ଝାଡ଼ଖଣ୍ଡରେ ଭାଜପାର ମିଶନ ୬୫ ଫେଲ୍ ମାରିଛି। ବିଧାନସଭା ନିର୍ବାଚନ ଫଳାଫଳ କଂଗ୍ରେସ-ଜେଏମ୍ଏମ ମେଣ୍ଟ ସପକ୍ଷରେ ଯାଇଛି। ମୁଖ୍ୟମନ୍ତ୍ରୀ ରଘୁବର ଦାସ ସରକାରଙ୍କୁ ଲୋକେ ପ୍ରତ୍ୟାଖାନ କରିଛନ୍ତି। ଭାଜପାର ବିଜୟ ପଥରେ ୫ଟି କାରଣ କଣ୍ଟା ସାଜିଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ରଘୁବର ଦାସଙ୍କ ଅଣ ଆଦିବାସୀ ଚେହେରାକୁ ଲୋକେ ପସନ୍ଦ କରି ନ ଥିଲେ। ସ୍ଥାନୀୟ ଜନଜାତି ସମ୍ପ୍ରଦାୟଙ୍କୁ ଦେଶଦ୍ରୋହୀ ଘୋଷଣା କରାଯିବା ଘଟଣା ଏବଂ ୨୦୧୮ ନଭେମ୍ବର ୧୫ରେ ପାରାଶିକ୍ଷକଙ୍କ ଉପରେ ଲାଠି ଚାଳନା ଭଳି ଘଟଣା ଭୋଟରଙ୍କୁ ବେଶ୍ ପ୍ରଭାବିତ କରିଥିଲା। ସେହିପରି ଭାଜପା ସରକାର ସ୍ଥାନୀୟ ସମସ୍ୟାକୁ ଗୁରୁତ୍ୱ ନ ଦେଇ ଜାତୀୟ ଉପଲବ୍ଧି ସମ୍ପର୍କରେ ନିର୍ବାଚନ ପ୍ରଚାରରେ କହିଥିଲେ। ଗତ ୫ ବର୍ଷ ମଧ୍ୟରେ ରଘୁବର ଦାସ ସରକାରଙ୍କ ପକ୍ଷରୁ କୌଣସି ନିଯୁକ୍ତି ବିଜ୍ଞାପନ ବାହାରି ନ ଥିଲା। ଏହା ଯୁବବର୍ଗଙ୍କ ମଧ୍ୟରେ ହତାସ ଭାବ ସୃଷ୍ଟି କରିଥିଲା। ଏହାର ନକାରାତ୍ମକ ପ୍ରଭାବ ନିର୍ବାଚନ ଉପରେ ପଡ଼ିଥିଲା। ରଘୁବର ଦାସ ସରକାରଙ୍କ ସହିତ ୫ ବର୍ଷ ଝାଡ଼ଖଣ୍ଡ ଷ୍ଟୁଡେଣ୍ଟ ୟୁନିୟନ ମିଳିତ ହୋଇଥିବାବେଳେ ନିର୍ବାଚନ ମଇଦାନକୁ ଓହ୍ଲାଇବା ସମୟରେ ଅଲଗା ରାସ୍ତା ଆପଣେଇଥିଲେ। ଏହାଦ୍ୱାରା ଭୋଟର କଂଗ୍ରେସ-ଜେଏମ୍ଏମ୍ ମେଣ୍ଟ ଆଡ଼କୁ ଆକର୍ଷିତ ହୋଇଥିଲେ। ସରଜୂ ରାୟଙ୍କ ଭଳି ନୀତିବାନ ନେତାଙ୍କୁ ଟିକେଟ ନ ମିଳିବାରୁ ସେ ବିଦ୍ରୋହ କରିଥିଲେ। ଏହାର ପ୍ରଭାବ ଭୋଟରଙ୍କ ପଡ଼ିଥିଲା। ସେହିପରି ଶାସକ ଦଳରେ ବିଭିନ୍ନ ନେତାଙ୍କ ମଧ୍ୟରେ ତାଳମେଳ ନ ରହିବାରୁ ଦଳୀୟ କନ୍ଦଳ ଆରମ୍ଭ ହୋଇଥିଲା। ଫଳରେ ନେତା ବିଦ୍ରୋହ କରିଥିଲେ। ଏହା ଯୋଗୁ ଭୋଟରଙ୍କ ଉପରେ ନକାରାତ୍ମକ ପ୍ରଭାବ ପଡ଼ିଥିଲା। ଏସବୁ କାରଣ ଯୋଗୁ ବିଧାନସଭାର ୮୧ ଆସନ ମଧ୍ୟରୁ ୬୫ ଆସନ ହାତେଇବା ପାଇଁ ଯୋଜନା କରିଥିବା ଭାଜପାକୁ ଶେଷରେ ନିରାଶ ହେବାକୁ ପଡ଼ିଛି।
