ଏରସମା,୨୧ା୧(ସ୍ବ.ପ୍ର.): ଏରସମା ବ୍ଲକ ଅନ୍ତର୍ଗତ ଭିତର ଅନ୍ଧାରୀ ପଞ୍ଚାୟତସ୍ଥିତ ଜାମୁକଣ ଗ୍ରାମର ଭିନ୍ନକ୍ଷମ ଲକ୍ଷ୍ମୀଧର ମହାପାତ୍ର ୨୨ମାସ ଧରି ଭତ୍ତା ପାଇବାରୁ ବଞ୍ଚତ୍ତ ହୋଇଥିଲେ। ଫଳରେ ଏ ନେଇ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। କୋର୍ଟ ଏହା ଜାଣିବା ପରେ ତୁରନ୍ତ ତାଙ୍କୁ ସମ୍ପୂର୍ଣ୍ଣ ଭତ୍ତା ପ୍ରଦାନ କରିବାକୁ ବ୍ଲକ ପ୍ରଶାସନକୁ ନିର୍ଦ୍ଦେଶ ଦେଇଥିଲେ। କୋର୍ଟଙ୍କ ନିର୍ଦ୍ଦେଶପରେ ସୋମବାର ତାଙ୍କୁ ୨୨ମାସର ଭତ୍ତା ପ୍ରଦାନ କରାଯାଇଛି। ବ୍ଲକ ପ୍ରଶାସନ ପକ୍ଷରୁ ଭିଏଲଡବ୍ଲ୍ୟୁ ନିହାର ରଞ୍ଜନ ଜେନା ଲକ୍ଷ୍ମୀଧରଙ୍କ ନିକଟକୁ ଯାଇ ସମସ୍ତ ଭତ୍ତା ଟଙ୍କା ପ୍ରଦାନ କରିଛନ୍ତି। ଲକ୍ଷ୍ମୀଧର ଭିନ୍ନକ୍ଷମ ପ୍ରମାଣପତ୍ର ଦେଇ ଭତ୍ତା ପାଉଥିଲେ। ମାତ୍ର ତାହାକୁ ବେଆଇନ ଦର୍ଶାଇ ୨୦୧୭ରେ ବନ୍ଦ କରାଯାଇଥିଲା। କିଛି ନ୍ୟସ୍ତସ୍ବାର୍ଥ ବ୍ୟକ୍ତି ଏହି କାର୍ଯ୍ୟ କରିଥିଲେ। ପରେ ଲକ୍ଷ୍ମୀଧର ବ୍ଲକ, ଜିଲା ପ୍ରଶାସନ ଓ ଲୋକ ପ୍ରତିନିଧିଙ୍କୁ ଭେଟି ଏ ସମ୍ପର୍କରେ ଜଣାଇଥିଲେ ମଧ୍ୟ କେହି ତାଙ୍କ କଥାକୁ କର୍ଣ୍ଣପାତ କରି ନ ଥିଲେ। ବାଧ୍ୟ ହୋଇ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। କୋର୍ଟ ଏହାକୁ ବିଚାର କରି ସମସ୍ତ ଭତ୍ତା ଓ ଲକ୍ଷ୍ମୀଧର କୋର୍ଟରେ ଖର୍ଚ୍ଚ କରିଥିବା ଅର୍ଥ ବ୍ଲକ ପ୍ରଶାସନ ଦେବେ ବୋଲି ନିର୍ଦ୍ଦେଶ ଦେଇଥିଲେ। ଏସମ୍ପର୍କରେ ସମ୍ପୃକ୍ତ ଭିଏଲଡବ୍ଲ୍ୟୁ ଜେନାଙ୍କୁ ପଚାରିବାରୁ ସେ କହିଛନ୍ତି, ଲକ୍ଷ୍ମୀଧରଙ୍କ ଭତ୍ତା କ’ଣ ବନ୍ଦ ହୋଇଥିଲା ତାହା ମୋତେ ଜଣାନାହିଁ। ସେତେବେଳେ ମୁଁ ଦାୟିତ୍ୱରେ ନ ଥିଲି। ଏବେ କୋର୍ଟଙ୍କ ନିର୍ଦ୍ଦେଶ କ୍ରମେ ତାଙ୍କର ସମସ୍ତ ଭତ୍ତା ଟଙ୍କା ବାବାଦକୁ ୧୦,୯୦୦ଟଙ୍କା ପ୍ରଦାନ କରାଯାଇଛି।
