ବାଲିଆପାଳ, ୧୨।୯(ଡି.ଏନ.ଏ.)-ବାଲେଶ୍ୱର ଜିଲାର ବାଲିଆପାଳ ବ୍ଲକ ଅନ୍ତର୍ଗତ ଉପକୂଳବର୍ତ୍ତୀ ବୋଳଂ ପଞ୍ଚାୟତ ଓ ଆଖପାଖ ଅଞ୍ଚଳରେ ହେଉଥିବା ଲୁଣ ଚାଷ ଏବେ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ଲୁଣ ଚାଷ କରି ଜୀବିକା ନିର୍ବାହ କରୁଥିବା ଚାଷୀ ବୃତ୍ତିହରା ହୋଇପଡିଛନ୍ତି। ଏଠାରେ ଗଢି ଉଠିଥିବା ସମବାୟ ସମିତି ‘ସଲ୍ଟ ମାନୁଫାକଚରିଂ ଇଣ୍ଡଷ୍ଟ୍ରିଜ’ ଅକାମୀ ହୋଇପଡିଛି। ଓଡିଶାରେ ଲୁଣ ଉତ୍ପାଦିତ ହେଉଥିବା ଗଞ୍ଜାମ ଜିିଲାର ହୁୁମ୍ମା, ସୁରନ୍ଦା, ସୁମଣି ଆଦି ସ୍ଥାନର ଲୁଣଠାରୁ ବୋଳଂ ଲୁଣର ଗୁଣବତ୍ତା ଅଧିକ ା ଏଥିରେ ଶତକଡା ୧୫ ଭାଗ ଆୟୋଡିନ ରହିଥାଏ। ବୋଳଂ ଲୁଣ ଚାଷର ପୁନଃ ଉଦ୍ଧାର ଓ କାରଖାନ ପ୍ରତିଷ୍ଠା ସକାଶେ ସରକାରୀ ସ୍ତରରେ ହୋଇଥିବା ଯୋଜନା କେବଳ କାଗଜପତ୍ରରେ ସୀମିତ ରହିଛି ବୋଲି ଲୁଣ ଚାଷୀ ଲକ୍ଷ୍ମୀଧର ସାମନ୍ତ, ସୁଧୀର ମଣ୍ଡଳ, ବିକାଶ ମଣ୍ଡଳ, ଅରୁଣ ମଇକାପ,ସୁମତୀ ମଇକାପ, ସାଧନା ମଣ୍ଡଳ ପ୍ରମୁଖ ଅଭିଯୋଗ କରିଛନ୍ତି ା
ଅତୀତରେ ଲୁଣ ଚାଷକୁ ଜୀବିକା କରି କେବଳ ବୋଳଂ ପଞ୍ଚାୟତର ୫ଶହରୁ ଊର୍ଦ୍ଧ୍ୱ ପରିବାର ଗୁଜୁରାଣ ମେଣ୍ଟାଉଥିଲେ। ଆୟୋଡିନ ମିଶ୍ରିତ ଲୁଣ ବିକ୍ରି ହେବା ପରେ ଏଠାକାର ଚାଷୀ ଉପତ୍ାଦନ କରୁଥିବା ଲୁଣକୁ ଆୟୋଡିନ ଯୁକ୍ତ କରିବା ପାଇଁ ସରକାର ଆବଶ୍ୟକ ମେଶିନ ଓ ପରୀକ୍ଷା ଗୃହ ଯୋଗାଇ ଦେଇଥିଲେ ା ପ୍ରାୟ ୭୦ ଦଶକରୁ ବୋଳଂ ଲୁଣ ଚାଷ ନିଜର ଏକ ସ୍ବତନ୍ତ୍ର ପରିଚୟ ହାସଲ କରିଥିଲା। ସରକାର ଯୋଗାଇଥିବା ମେଶିନ ଅଳ୍ପ କିଛି ମାସ ଚାଲି ଅଚଳ ହୋଇପଡିବାରୁ ଲୁଣ ଉତ୍ପାଦନ ବାଧାପ୍ରାପ୍ତ ହୋଇଥିଲା। ସରକାର ଏ ଦିଗରେ କୌଣସି ପଦକ୍ଷେପ ନ ନେବାରୁ ଚାଷୀମାନେ ବାଧ୍ୟ ହୋଇ ଉପତ୍ାଦିତ ଲୁଣକୁ ଦଲାଲଙ୍କ ମାଧ୍ୟମରେ ଖୁବ କମ ଦରରେ ବିକ୍ରି କରି କ୍ଷତି ସହିଥିଲେ। ଏଭଳି ସ୍ଥିତିରେ କେତେକ ଚାଷୀ ଲୁଣଚାଷ ଛାଡି ରାଜ୍ୟ ବାହାରକୁ ଦାଦନ ଖଟିବାକୁ ଚାଲିଯାଇଥିଲେ ା ଲୁଣ ଚାଷୀଙ୍କଠାରୁ ସରକାର ଭୂମି କର ବାବଦରେ ଅଧିକ୨୦ ଗୁଣ ଅର୍ଥ ଆଦାୟ କରିବାରୁ ଏହା ବୋଝ ଉପରେ ନଳିତା ବିଡା ସଦୃଶ ହୋଇଥିଲା। ୧୯୭୦ରୁ ୧୯୯୬ ପର୍ଯ୍ୟନ୍ତ ଲାଭରେ ଚାଲିଥିବା ସମବାୟ ସମିତି କ୍ରମେ ରୁଗ୍ଣ ହୋଇପଡିଥିଲା। ବୋଳଂ ଅଞ୍ଚଳର ୫ଶହରୁ ଊର୍ଦ୍ଧ୍ୱ ପରିବାର ସେହି ଦିନରୁ ବୃତ୍ତିହରା ହୋଇ ଦୁର୍ଦ୍ଦଶାମୟ ଜୀବନକୁ ଆଦରି ନେଇଛନ୍ତି।
ଲୁଣ ଉପତ୍ାଦନ ପାଇଁ ବୋଳଂରେ ବ୍ୟାପକ ଭିତ୍ତିଭୂମି ଥିଲେ ମଧ୍ୟ ଏହାର ଉପଯୋଗ କରାଯାଉ ନାହିଁ । ଏବେ ଲୋକେ ଖୋଲା ବଜାରରୁ ବିଭିନ୍ନ କମ୍ପାନୀର ଆୟୋଡିନଯୁକ୍ତ ଲୁଣ କିଲୋପ୍ରତି ୧୫ରୁ୨୦ ଟଙ୍କାରେ କିଣୁଛନ୍ତି ା ହେଲେ ବୋଳଂ ଲୁଣକୁ ଉପଯୋଗ କରାଯାଇ ପାରିଲେ ଲୋକେ କିଲୋପ୍ରତି ୮ରୁ ୧୦ ଟଙ୍କା ପର୍ଯ୍ୟନ୍ତ ଲାଭ ପାଇପାରନ୍ତେ ା ଚାଷୀମାନେ ପୂର୍ବଭଳି କର୍ମନିଯୁକ୍ତି ପାଇ ଏହି ପାରମ୍ପରିକ ଲୁଣ ଚାଷକୁ ବଞ୍ଚାଇ ରଖି ପାରନ୍ତେ। ଏଥର ସାଧାରଣ ନିର୍ବାଚନ ଅବ୍ୟବହିତ ପୂର୍ବରୁ ବୋଳଂ ଲୁଣ ଚାଷର ପୁନଃ ଉଦ୍ଧାର କରାଯିବା ସହ କାରଖାନ ପ୍ରତିଷ୍ଠା ଲାଗି ଏକ ମେଗା ପ୍ରକଳ୍ପ କାର୍ଯ୍ୟକାରୀ ହେବ ବୋଲି କୁହାଯାଇଥିଲା। ବର୍ତ୍ତମାନ ସୁଦ୍ଧା ଏ ଦିଗରେ କୌଣସି କାମରେ ଅଗ୍ରଗତି ହୋଇନାହିଁ ବୋଲି ସ୍ଥାନୀୟ ଚାଷୀ ଅଭିଯୋଗ କରିଛନ୍ତି।
