ନୂଆଦିଲ୍ଲୀ, ୮।୮ (ପି.ଟି.)- ଛ’ଥର ବିଶ୍ୱବିଜୟିନୀ ଏମ୍.ସି. ମେରୀକମ୍ ଓ ଲଭ୍ଲିନା ବୋରଗୋହିନ ଆଗାମୀ ମହିଳା ବିଶ୍ୱ ବକ୍ସିଂ ଚାମ୍ପିୟନଶିପ୍ ପାଇଁ ଭାରତୀୟ ଦଳରେ ମନୋନୀତ ହୋଇଛନ୍ତି। ନିକଟର ପ୍ରଦର୍ଶନକୁ ଭିତ୍ତି କରି ଏହି ଚୟନ କରାଯାଇଛି। ୩୬ ବର୍ଷୀୟା ଷ୍ଟାର୍ ବକ୍ସର ମେରୀକମ୍ ଚଳିତ ବର୍ଷ ଇଣ୍ଡିଆ ଓପନ୍ ଓ ନିକଟରେ ଇଣ୍ଡୋନେସିଆରେ ଶେଷ ହୋଇଥିବା ଟୁର୍ନାମେଣ୍ଟରେ ସ୍ବର୍ଣ୍ଣ ପଦକ ଜିତିଥିଲେ। ସେ ୫୧ କିଗ୍ରାରେ ଅଂଶଗ୍ରହଣ କରିବା ପାଇଁ ମନୋନୀତ ହୋଇଛନ୍ତି। ସେହିଭଳି ବିଶ୍ୱ ଏବଂ ଏସିଆନ ବ୍ରୋଞ୍ଜ ପଦକ ବିଜୟିନୀ ଲଭ୍ଲିନା ୬୯ କିଗ୍ରାରେ ଭାଗନେବେ ବୋଲି ଜଣାପଡ଼ିଛି। ତେବେ ପୂର୍ବତନ ବିଶ୍ୱ ବିଜୟିନୀ ତଥା ନିକଟରେ ଥାଇଲାଣ୍ଡରେ ରୌପ୍ୟ ପଦକ ହାସଲ କରିଥିବା ନିଖାତ୍ ଜରୀନ ୫୧ କିଗ୍ରା ଟ୍ରାଏଲ୍ସରେ ମେରୀକମ୍କୁ ଚ୍ୟାଲେଞ୍ଜ କରିବାକୁ ଆଶାବାଦୀ ରହିଥିଲେ ମଧ୍ୟ ତାଙ୍କୁ ନିରାଶ ହେବାକୁ ପଡ଼ିଛି। ବକ୍ସିଂ ଫେଡେରେଶନ ଅଫ୍ ଇଣ୍ଡିଆ (ବିଏଫ୍ଆଇ)କୁ ଏକ ଚିଠି ଲେଖି ଅଭିଯୋଗ କରିଛନ୍ତି, ମଙ୍ଗଳବାର ଭନଲାଲ ଦୁଆତିଙ୍କ ବିପକ୍ଷରେ ଟ୍ରାଏଲ୍ ବାଉଟ୍ ଥିଲେ ମଧ୍ୟ ତାଙ୍କୁ ଚୟନ କମିଟିର ଅଧ୍ୟକ୍ଷ ରାଜେଶ ଭଣ୍ଡାରୀଙ୍କ ଦ୍ୱାରା‘ଅଂଶଗ୍ରହଣରୁ ବଞ୍ଚତ୍ତ କରାଯାଉଛି’। ଅପରପକ୍ଷରେ କିଛିଦିନ ପୂର୍ବରୁ ବିଏଫ୍ଆଇ ଶୀର୍ଷ ଅଧିକାରୀଙ୍କୁ ନେଇ ମେରୀକମ୍ଙ୍କୁ ଚୟନ କରିବା ନିଷ୍ପତ୍ତି ନିଆଯାଇଥିଲା ବୋଲି ଭଣ୍ଡାରୀ ତାଙ୍କ ପକ୍ଷ ରଖି କହିଛନ୍ତି। ‘ଇଣ୍ଡିଆନ୍ ଓପନ୍ ସେମିଫାଇନାଲରେ ନିଖାତ୍ଙ୍କୁ ମେରୀକମ୍ ପରାସ୍ତ କରିଥିଲେ। ଜାତୀୟ କ୍ୟାମ୍ପ୍ରେ ଅନ୍ୟମାନଙ୍କଠାରୁ ମେରୀକମ୍ଙ୍କ ପ୍ରଦର୍ଶନରେ ସ୍ଥିରତା ରହିଆସିଛି। ନିଖାତ୍ ୟଙ୍ଗ୍ ଓ ଜଣେ ଶ୍ରେଷ୍ଠ ବକ୍ସର। ସମୟ ଆସିଲେ ତାଙ୍କ ପାଇଁ ସୁଯୋଗ ରହିଛି। ବର୍ତ୍ତମାନ କିନ୍ତୁ ସମ୍ପୂର୍ଣ୍ଣ ଭାବେ ପ୍ରଦର୍ଶନ ଓ ଅଭିଜ୍ଞତା ଆଧାରରେ ଚୟନ କରାଯାଇଛି’ ବୋଲି ଭଣ୍ଡାରୀ ଏକ ସାକ୍ଷାତ୍କାର ଅବସରରେ କହିଛନ୍ତି। କିନ୍ତୁ ନିଖାତ୍ କହିଛନ୍ତି, ଏହି ନିଷ୍ପତ୍ତିକୁ ନେଇ ସମ୍ପୂର୍ଣ୍ଣ ଭାବେ ଆଶ୍ଚର୍ଯ୍ୟାନ୍ବିତ ହୋଇଛି। ପୂର୍ବରୁ ମୁଁ ୨୦୧୬ରେ ବିଶ୍ୱ ଚାମ୍ପିୟନଶିପ୍ରେ ଅଂଶଗ୍ରହଣ କରିସାରିଛି ଏବଂ ଯଦି ଫିଟ୍ ଅଛି ତାହାଲେ ୨୦୧୯ରେ କାହିଁକି ନୁହେଁ। ୟଙ୍ଗ୍ ଏକ କାରଣ ବୋଲି ଭାବୁନାହିଁ। ଓଭର୍ଓ୍ବେଟ୍ବର୍ଗର ଟ୍ରାଏଲ୍ସ ଗୁରୁବାର ପର୍ଯ୍ୟନ୍ତ ରହିଥିବାରୁ ତାଙ୍କୁ ଟାଏଲ୍ସର ସୁଯୋଗ ଦିଆଯାଉ ବୋଲି ନିଖାତ୍ ବିଏଫ୍ଆଇକୁ ଅନୁରୋଧ କରିଛନ୍ତି।
