ଓ୍ବାଶିଂଟନ୍,୧୪।୧୦:ମିଶରର ଶାର୍ମ ଏଲ-ଶେଖରେ ଗାଜା ଶାନ୍ତି ଚୁକ୍ତିନାମା ସ୍ବାକ୍ଷର କରିବା ପୂର୍ବରୁ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରାୟ ଅଧ ଘଣ୍ଟାର ଭାଷଣ ଦେଇଥିଲେ। ପ୍ରଧାନମନ୍ତ୍ରୀ ମୋଦିଙ୍କ ଅନୁପସ୍ଥିତି ସତ୍ତ୍ୱେ ସେ ଭାରତକୁ ଏକ ମହାନ ଦେଶ ଭାବରେ ପ୍ରଶଂସା କରିଥିଲେ ଏବଂ ତାଙ୍କୁ ଜଣେ ଭଲ ବନ୍ଧୁ ବୋଲି କହିଥିଲେ। ତାଙ୍କ ଭାଷଣରେ ରାଷ୍ଟ୍ରପତି ଟ୍ରମ୍ପ କହିଥିଲେ ଯେ, ଭାରତ ଏକ ମହାନ ଦେଶ ଏବଂ ତାଙ୍କର ଜଣେ ବନ୍ଧୁ ସେଠାରେ ଏକ ଉଚ୍ଚ ପଦବୀରେ ଅଛନ୍ତି ଯିଏ ଏକ ଚମତ୍କାର କାମ କରିଛନ୍ତି।
ପାକିସ୍ତାନୀ ପ୍ରଧାନମନ୍ତ୍ରୀ ଶେହହବାଜ ଶରିଫ ସିଧାସଳଖ ରାଷ୍ଟ୍ରପତି ଟ୍ରମ୍ପଙ୍କ ପଛରେ ଠିଆ ହୋଇଥିଲେ। କିନ୍ତୁ ଶରିଫଙ୍କ ଆଚରଣ ଏପରି ଥିଲା ଯେପରି ସେ ପାକିସ୍ତାନର ପ୍ରଧାନମନ୍ତ୍ରୀ ନୁହଁନ୍ତି, ବରଂ ଜଣେ ଆମେରିକୀୟ କ୍ୟାବିନେଟ ମନ୍ତ୍ରୀ କିମ୍ବା କଂଗ୍ରେସମ୍ୟାନ ଯାହାଙ୍କର ଏକମାତ୍ର କାମ ରାଷ୍ଟ୍ରପତି ଟ୍ରମ୍ପଙ୍କୁ ଖୁସି କରିବା। ତାଙ୍କ ଭାଷଣ ସମୟରେ, ରାଷ୍ଟ୍ରପତି ଟ୍ରମ୍ପ କହିଥିଲେ ଯେ, ଭାରତ ଏବଂ ପାକିସ୍ତାନ ବହୁତ ଭଲ ସମ୍ପର୍କ ଉପଭୋଗ କରିବେ। ଟ୍ରମ୍ପ ଶରିଫଙ୍କ ଆଡ଼କୁ ଚାହିଁଥିଲେ ଏବଂ ସେ ବାରମ୍ବାର ସହମତିରେ ମୁଣ୍ଡ ହଲାଇଲେ, ତାଙ୍କ ଶରୀର ଭାଷା ଟ୍ରମ୍ପଙ୍କ ପାଇଁ ‘ହଁ ବ୍ୟକ୍ତ’ ପରି ମନେହେଉଥିଲା।
ତାଙ୍କ ଭାଷଣରେ, ଟ୍ରମ୍ପ ପାକିସ୍ତାନୀ ଫିଲ୍ଡ ମାର୍ଶାଲ ଅସୀମ ମୁନିରଙ୍କୁ ତାଙ୍କର ପ୍ରିୟ ବୋଲି କହିଥିଲେ ଏବଂ ଶରିଫଙ୍କୁ ଟ୍ରମ୍ପଙ୍କ ପୁରସ୍କାର ପ୍ରଦାନ କରିବାକୁ କହିଥିଲେ। ଏହା ପରେ ଆମେରିକା ରାଷ୍ଟ୍ରପତି ଟ୍ରମ୍ପ ପାକିସ୍ତାନ ପ୍ରଧାନମନ୍ତ୍ରୀଙ୍କୁ କହିବାର ସୁଯୋଗ ଦେଇଥିଲେ। ପ୍ରଥମେ ଷରିଫ ଟ୍ରମ୍ପଙ୍କୁ ନୋବେଲ ଶାନ୍ତି ପୁରସ୍କାର ପାଇଁ ପୁଣି ଥରେ ମନୋନୀତ କରି କହିଥିଲେ, ମୁଁ ପୁଣି ଥରେ ଏହି ମହାନ ରାଷ୍ଟ୍ରପତିଙ୍କୁ ନୋବେଲ ଶାନ୍ତି ପୁରସ୍କାର ପାଇଁ ମନୋନୀତ କରିବାକୁ ଚାହୁଁଛି। କାରଣ ସେ ସବୁଠାରୁ ସଚ୍ଚା ଏବଂ ଚମତ୍କାର ପ୍ରାର୍ଥୀ ଏବଂ କେବଳ ଦକ୍ଷିଣ ଏସିଆରେ ଶାନ୍ତି ଆଣି ନାହାଁନ୍ତି ବରଂ ଲକ୍ଷ ଲକ୍ଷ ଜୀବନ ବଞ୍ଚାଇଛନ୍ତି।
ଟ୍ରମ୍ଫଙ୍କୁ ଖୁସି କରିବା ପାଇଁ, ପାକିସ୍ତାନ ପ୍ରଧାନମନ୍ତ୍ରୀ ଶରିଫ ସେଠାରେ ଅଟକି ନ ଥିଲେ। ସେ ବ୍ୟକ୍ତିଗତ ଭାବରେ ରାଷ୍ଟ୍ରପତି ଟ୍ରମ୍ପଙ୍କୁ ସାଲ୍ୟୁଟ କରି କହିଥିଲେ, ଆଜି ଶାର୍ମ ଏଲ-ଶେଖରେ ଗାଜାରେ ଶାନ୍ତି ପ୍ରତିଷ୍ଠା କରିବା ମଧ୍ୟପ୍ରାଚ୍ୟରେ ଲକ୍ଷ ଲକ୍ଷ ଜୀବନ ବଞ୍ଚାଇବା ସହିତ ସମାନ। ରାଷ୍ଟ୍ରପତି ଟ୍ରମ୍ପ, ମୁଁ ଆପଣଙ୍କ ଅନନ୍ୟ ଏବଂ ଦୂରଦୃଷ୍ଟିସମ୍ପନ୍ନ ନେତୃତ୍ୱ ପାଇଁ ଆପଣଙ୍କୁ ସାଲ୍ୟୁଟ କରୁଛି।
