କୋଲକାତା,୧୩ା୧(ପି.ଟି.): ଭାରତୀୟ ବାୟୁସେନାକୁ ଅଧିକ ବଳଦେବା ପାଇଁ ସରକାର ୨୦୦ ଲଢ଼ୁଆ ବିମାନ କ୍ରୟ କରିବେ। ଏନେଇ ପ୍ରକ୍ରିୟା ଜାରି ରହିଥିବା ପ୍ରତିରକ୍ଷା ବିଭାଗ ପକ୍ଷରୁ ସୂଚନା ଦିଆଯାଇଛି। ହାଲ୍ ନିର୍ମିତ ୮୩ ଏଲ୍ସିଏ ତେଜସ୍ ମାର୍କ୧ ଆଡଭାନ୍ସଡ୍ ଜେଟ୍ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ପ୍ରତିରକ୍ଷା ସଚିବ ଅଜୟ କୁମାର ପ୍ରକାଶ କରିଛନ୍ତି। ଏଥିସହ ଅନ୍ୟ ୧୧୦ ଲଢ଼ୁଆ ବିମାନ ଲାଗି ପ୍ରସ୍ତାବ ଦିଆଯାଇଥିବା ସେ କହିଛନ୍ତି। ସାମ୍ପ୍ରତିକ ସ୍ଥିତିକୁ ଦେଖି ୮୩ ଲାଇଟ୍ କମ୍ବାକ୍ଟ ଏୟାରକ୍ରାଫ୍ଟ ଚୂଡ଼ାନ୍ତ ହୋଇଥିଲା। ଭାରତୀୟ ଆବଶ୍ୟକତା ପୂରଣ କରିବା ସହ ବାୟୁସେନାର ଶକ୍ତି ଏହା ବୃଦ୍ଧି କରିପାରିବ ବୋଲି କୁମାର କହିଛନ୍ତି। ଚଳିତ ବର୍ଷ ଏହିକାର୍ଯ୍ୟ ସମ୍ପନ୍ନ କରାଯିବ ବୋଲି ସେ ମତ ଦେଇଛନ୍ତି। ବାୟୁସେନା ନିକଟରେ ଏବେ ସୁଖୋଇ ୩୦ ଏମ୍କେଆଇ, ମିରଜ୍ ୨୦୦୦, ମିଗ୍ ୨୯, ଜାଗୁଆର, ମିଗ୍ ୨୧ ବିସନ୍ ରହିଛି। ୧୯୯୯ କାର୍ଗିଲ ଯୁଦ୍ଧ ବେଳେ ଦମ୍ ଦେଖାଇଥିବା ମିଗ୍ ୨୭ ଯୁଦ୍ଧବିମାନ ଉପରେ କଟକଣା ଲଗାଯିବା ପରେ ଅଧିକ ଯୁଦ୍ଧବିମାନ କ୍ରୟର ଆବଶ୍ୟକତା ରହିଥିବା ପ୍ରତିରକ୍ଷା ସଚିବ ପ୍ରକାଶ କରିଛନ୍ତି।
