ଖୋର୍ଦ୍ଧା ଅଫିସ,୨୩ା୮:ପ୍ରାକୃତିକ ବିପର୍ଯ୍ୟୟ ଓ ଅନ୍ୟ କୌଣସି କାରଣରୁ ଫସଲ ନଷ୍ଟ ହେଲେ କ୍ଷତିପୂରଣ ପାଇବା ଲକ୍ଷ୍ୟ ନେଇ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଚାଷୀ କରିଥିଲେ। ହେଲେ ତିତ୍ଲି ବାତ୍ୟା ଯିବାର ୧୦ ମାସ ବିତି ଯାଇଥିଲେ ହେଁ କ୍ଷତିଗ୍ରସ୍ତ ଚାଷୀ ବୀମା କ୍ଷତିପୂରଣ ପାଇ ପାରୁନାହାନ୍ତି। ଇତି ମଧ୍ୟରେ ବୀମା କମ୍ପାନୀ ବି ବଦଳି ସାରିଲାଣି। ଏଭଳିସ୍ଥଳେ ଖୋର୍ଦ୍ଧା ଜିଲାରୁ ୫ କୋଟି ୪୪ ଲକ୍ଷ ୬୦ ହଜାର ଟଙ୍କା ପ୍ରମିୟମ ନେଇ ଇନ୍ସୁରାନ୍ସ କମ୍ପାନୀ ଲାଭରେ ରହିଲେ। ସେପଟେ କ୍ଷତିପୂରଣ ପାଇବା ପାଇଁ ଚାଷୀ ବିକ୍ଷୋଭ, ଆନ୍ଦୋଳନ କରିଥିଲେ ମଧ୍ୟ ବୀମା ସହାୟତା ରାଶି ପାଇ ପାରିଲେ ନାହିଁ। ଅନ୍ୟପକ୍ଷେ ତିତ୍ଲି ଯାଇ ବାତ୍ୟା ଫନୀ ଚାଷୀର ମେରୁଦଣ୍ଡ ଭାଙ୍ଗି ସାରିଲାଣି। ତଥାପି ବୀମା କମ୍ପାନୀର ଚାଷୀଙ୍କ କ୍ଷତିପୂରଣ ଦେବାକୁ ମନେପଡୁନାହିଁ।
ଖୋର୍ଦ୍ଧା ଜିଲାର ୧୦ଟି ବ୍ଲକ ଅଞ୍ଚଳରେ ୬୮,୮୫୬ ଋଣୀ ଚାଷୀ ଓ ୬, ୭୨୦ ଅଣଋଣୀ ଚାଷୀ ଏପରି ମୋଟରେ ୭୫,୫୭୬ ଚାଷୀ ୨୦୧୮ ଖରିଫରେ ଶସ୍ୟ ବୀମା ପାଇଁ ନାମ ପଞ୍ଜୀକରଣ କରିଥିଲେ। ଏଠାକାର ଚାଷୀଙ୍କର ୫୦, ୬୬୬ ହେକ୍ଟର ଜମି ପାଇଁ ୫ କୋଟି ୪୪ ଲକ୍ଷ ୬୦ ହଜାର ଟଙ୍କା ବୀମା କମ୍ପାନୀ ପ୍ରିମିୟମ ନେଇଥିଲେ। ହେଲେ ଜିଲାର କ୍ଷତିଗ୍ରସ୍ତ ଚାଷୀଙ୍କୁ ବୀମାରାଶି ଦେଲେ ନାହିଁ। ତିତ୍ଲି ଯୋଗୁ ୨୦୧୮ର ଖରିଫ ଚାଷ ଉଜୁଡି ଯାଇଥିଲା। ବେଗୁନିଆ, ବୋଲଗଡ ଓ ଜଟଣୀ ବ୍ଲକର ୯୮୨.୬ ହେକ୍ଟର ଜମିର ଚାଷୀ ବୀମା କ୍ଷତିପୂରଣ ପାଇବାକୁ ସରକାରୀ ରିପୋର୍ଟରେ ସ୍ଥିରୀକୃତ ହୋଇଥିଲା। ଏଥିରେ ବେଗୁନିଆ ବ୍ଳକର ୫ଟି ପଞ୍ଚାୟତ ୧୫ଟି ଗଁାର ୩୯୭ ହେକ୍ଟର, ବୋଲଗଡ ବ୍ଲ୍ଳକ ୨ ପଞ୍ଚାୟତର ୯ଟି ଗଁାର ୪୪୫. ୫୪ ହେକ୍ଟର ଓ ଜଟଣୀ ବ୍ଲ୍ଳକ ୩ ପଞ୍ଚାୟତର ୧୪୦ ହେକ୍ଟର ଜମି ରହିଛି। ସେହିପରି ମହାନଦୀରେ ବନ୍ୟା ଯୋଗୁ ରାଜୁଆ ଓ ଦୟାନଦୀ ଉପକୂଳରେ ଥିବା ଖୋର୍ଦ୍ଧା ବ୍ଲକର ୪ଟି ପଞ୍ଚାୟତ ୨୦ଟି ଗଁାର ୬୨୫ ହେକ୍ଟର ଜମିର କ୍ଷତିଗ୍ରସ୍ତ ଚାଷୀ ବୀମାରାଶି ପାଇବାକୁ ଦରକାର ବୋଲି କୃଷି ବିଭାଗର ତଥ୍ୟ କହୁଛି। ତେବେ କ୍ଷତିଗ୍ରସ୍ତ ଚାଷୀଙ୍କ କ୍ଷତିପୂରଣ ପାଇବା ଶୀତଳଭଣ୍ଡାରରେ ରହି ଯାଇଛି। ଦେଖାଯାଉ ସରକାର ଓ ପ୍ରଶାସନ କେତେଦୂର ଚାଷୀଙ୍କୁ ଗୁରୁତ୍ୱ ଦେଉଛନ୍ତି ତାହା ଜଣାପଡିବ। ଏ ନେଇ ଉପକୃଷିନିର୍ଦ୍ଦେଶକ ଭାସ୍କର ବାରିକ କୁହନ୍ତି, ତିତ୍ଲି ଯାଇ ଫନୀ ଗଲାଣି। ତେବେ ଚାଷୀ ୨୦୧୮ ଖରିଫ ଋତୁର ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ବୀମା ଅର୍ଥ ପାଇ ପାରିଲେନି। ଇନ୍ସୁରାନ୍ସ ପାଇବାକୁ କୃଷି ବିଭାଗ ପକ୍ଷରୁ ଜିଲାପାଳଙ୍କ ଆପ୍ରୁଭ କରାଯାଇ ଆବଶ୍ୟକ କାଗଜାତ ସରକାରଙ୍କୁ ଦିଆଯାଇଥିଲା। ହେଲେ ଏଯାବତ୍ କିଛି ଜଣାପଡୁନି। ଇତି ମଧ୍ୟରେ ପ୍ରିମିୟମ ଟଙ୍କା ନେଇଥିବା କମ୍ପାନୀ ବଦଳରେ ଏବେ ରିଲିୟାନ୍ସ କମ୍ପାନୀ ବୀମା ଦାୟିତ୍ୱ ନେଇଛି ବୋଲି ସୂଚନା ଦେଇଛନ୍ତି।
