ବାଲେଶ୍ୱର ଅଫିସ, ୨୮।୪-ଏକ ବଳାତ୍କାର ମାମଲାର ବିଚାର କରି ଶନିବାର ବାଲେଶ୍ୱର ସ୍ବତନ୍ତ୍ର ଜଜ୍ ପୋକ୍ସୋ ଅଦାଲତରେ ଜିଲା ଅତିରିକ୍ତ ଦୌରାଜଜ୍ କମ୍ ସ୍ପେଶାଲ ଜଜ୍ ଅଜନ୍ତା ଷଡ଼ଙ୍ଗୀ ଅଭିଯୁକ୍ତଙ୍କୁ ୭ବର୍ଷ ଜେଲଦଣ୍ଡ ସହ ୫ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦେୟ ୩ମାସ ଜେଲଦଣ୍ଡ ଭୋଗିବାକୁ ରାୟରେ କୁହାଯାଇଛି।
ରେମୁଣା ଥାନା ଅଞ୍ଚଳର ଜଣେ ୧୨ବର୍ଷର ନାବାଳିକା ନିଜର ମାମୁ ଘରେ ରହି ପାଠ ପଢୁଥିଲେ। ଗତ ୨୦୧୩ ଫେବୃୟାରୀ ୫ ତାରିଖ ସନ୍ଧ୍ୟାରେ ପରିବାର ଲୋକେ ଚାଷ କାମରେ ଅନ୍ୟ ଜଣକ ଘରକୁ ବଳଦ ଆଣିବାକୁ ଯାଇଥିଲେ। ଘରେ କେହି ନ ଥିବା ସୁଯୋଗ ନେଇ ଅନୀଲ ମଲ୍ଲିକ (୧୯) ନାବାଳିକାର ମୁହଁରେ ଗାମୁଛା ବାନ୍ଧି ପଡ଼ିଶା ଘର କୁଟାପୁଞ୍ଜି ନିକଟକୁ ନେଇଯାଇ ବଳାତ୍କାର କରିଥିଲେ। ତାଙ୍କ ମାଇଁ ମାମୁଁ ଘରକୁ ଫେରି ନାବାଳିକାଙ୍କୁ ନ ପାଇବାରୁ ଖୋଜାଖୋଜି କରି କିଛି ସମୟ ପରେ କୁଟାପୁଞ୍ଜି ନିକଟରେ ନାବାଳିକା ଜଣକ କାନ୍ଦୁଥିବା ଶୁଣି ତାଙ୍କୁ ଉଦ୍ଧାର କରିଥିଲେ। ନାବାଳିକାଙ୍କ ପ୍ରାଥମିକ ଚିକିତ୍ସା କରି ରେମୁଣା ଥାନାରେ ଲିଖିତ ଅଭିଯୋଗ କରାଯାଇଥିଲା। ଏହି ମାମଲାର ବିଚାର କରି ଜଜ୍ ୧୪ ସାକ୍ଷୀଙ୍କ ବୟାନକୁ ଭିତ୍ତି କରି ଏହି ରାୟ ଦେଇଛନ୍ତି।
