ବାଲେଶ୍ୱର ଅଫିସ, ୧୨।୬-ବାଲେଶ୍ୱର ସହର ଅନ୍ତର୍ଗତ ଗୁଡ଼ିପଦାଠାରେ ପୌରାଞ୍ଚଳ ପକ୍ଷରୁ ବର୍ଜ୍ୟବସ୍ତୁ ଜମା ଓ ପ୍ରକ୍ରିୟାକରଣ ପ୍ଲାଣ୍ଟ ନିର୍ମାଣ କରାଯିବାକୁ ସ୍ଥିର କରାଯାଇଛି। ମାତ୍ର ଉକ୍ତ ସ୍ଥାନରେ ୧୦୦ଫୁଟ୍ ମଧ୍ୟରେ ଜଳଯୋଗାଣ ସମ୍ପ ହାଉସ୍ ନିର୍ମାଣ, ୩୦ଫୁଟ୍ ଭିତରେ ଆଦିବାସୀଙ୍କ ପୂଜାସ୍ଥଳୀ ଥିବାରୁ ସ୍ଥାନୀୟ ଅଞ୍ଚଳର ଲୋକମାନେ ବର୍ଜ୍ୟବସ୍ତୁ ପକାଇଲେ ଏସବୁ ଦୂଷିତ ହେବାର ଅଭିଯୋଗ କରିଥିଲେ। ଏହାକୁ ବିରୋଧ କରି ଶୁକ୍ରବାର ଗୁଡ଼ିପଦା ଗ୍ରାମବାସୀ ଜିଲାପାଳଙ୍କ ଅଫିସ୍ ଘେରାଉ କରି ଦାବିପତ୍ର ପ୍ରଦାନ କରିଛନ୍ତି।
ଓଡ଼ିଶା କୋଷ୍ଟ କେନାଲ ନିକଟ ସ୍ବାଧୀନ ପଡ଼ିଆରେ ବର୍ଜ୍ୟବସ୍ତୁ ଜମା ଓ ପ୍ରକ୍ରିୟାକରଣ ପାଇଁ ପୂର୍ବରୁ ଜାଗା ଚିହ୍ନଟ କରାଯାଇଥିଲା। ଉକ୍ତ ସ୍ଥାନକୁ ଛାଡି ଗୁଡିପଦା ଅଞ୍ଚଳରେ ନିର୍ମାଣ କରିବାର ନିଷ୍ପତ୍ତି ନେବାରୁ ପୌରକର୍ତ୍ତୃପକ୍ଷ, କଣ୍ଟ୍ରାକ୍ଟର, ତହସିଲଦାରଙ୍କ ତରବରିଆ ଭାବେ କାର୍ଯ୍ୟକୁ ସନ୍ଦେହ କରିଥିବା ଅଭିଯୋଗ ହୋଇଛି। ଜନବସତି ଭିତରେ ଏଭଳି ପ୍ରକଳ୍ପ ପ୍ରତିଷ୍ଠା କଲେ ସ୍ବାସ୍ଥ୍ୟବସ୍ଥାରେ ଘୋର ପ୍ରଭାବ ପକାଇବ ବୋଲି ଗୋଷ୍ଠୀ ବାସିନ୍ଦା ବେଣୁଧର ବାରିକ କହିଛନ୍ତି। ଉକ୍ତ ପ୍ରକଳ୍ପକୁ ସହରର ଜନବସତି ଭିତରେ କରା ନ ଯାଇ ବିକଳ୍ପ ବ୍ୟବସ୍ଥା କରିବାକୁ ଦାବି ହୋଇଛି। ସିପିଆଇ ନେତା ଜୟନ୍ତ ଦାସ, ଯତୀନ ପାତ୍ର, ଅରୁଣ ଜେନା, ବନ୍ଦନା ବିଶ୍ୱାସ, ଗୀତା ହେମ୍ବ୍ରମ, ବିଜୟଲକ୍ଷ୍ମୀ ବାସ୍କେ, ବାସନ୍ତୀ ସାହୁ, ଧାନୀ ସରେନ, ଫୁଲମଣି ହାଁସଦା, ଚମ୍ପାମଣି ହେମ୍ବ୍ରମ, ଶାନ୍ତି ମୁର୍ମୁ, ରାଇସେନ ହେମ୍ବ୍ରମ, ସମର ଲାଲ ହାଁସଦା, ସୁବୁଦା ଟୁଡୁ, ହେମେନ୍ଦ୍ର ମାଝି ଓ ମଙ୍ଗଳା ହେମ୍ବ୍ରମ ପ୍ରମୁଖ ଏହି ବିକ୍ଷୋଭରେ ଅଂଶଗ୍ରହଣ କରିଥିଲେ।
