ମହାକାଳପଡ଼ା,୨୨ା୬(ଡି.ଏନ୍.ଏ.): ମହାକାଳପଡା ବ୍ଲକ ଅଧୀନ ଜମ୍ବୁ ମେରାଇନ୍ ଥାନା ଅଞ୍ଚଳରେ ଶିଶୁ ସୁରକ୍ଷା ବିଭାଗ, ବ୍ଲକ ସମନ୍ବିତ ଶିଶୁ ସୁରକ୍ଷା କମିଟି ଓ ପୋଲିସର ହସ୍ତକ୍ଷେପ ପରେ ଶୁକ୍ରବାର ଜଣେ ନାବାଳିକାଙ୍କ ବିବାହ ବନ୍ଦ କରାଯାଇଛି। ସେହିପରି ଅନ୍ୟ ଜଣେ ନାବାଳିକାଙ୍କୁ ପ୍ରେମିକଙ୍କ ଘରୁ ଉଠାଇ ଆଣି କେନ୍ଦ୍ରାପଡାସ୍ଥିତ ରେସଓ୍ବାରେ ଅସ୍ଥାୟୀ ଭାବେ ରଖାଯାଇଛି।
ସୂଚନାଯୋଗ୍ୟ, ଏହି ଅଞ୍ଚଳର ଜଣେ ନାବାଳିକାଙ୍କୁ ଶୁକ୍ରବାର ରାତିରେ ବିବାହ କରାଇବା ପାଇଁ ସମସ୍ତ ପ୍ରସ୍ତୁତି ସରିଥିଲା। ବେଦି ତିଆରି ସରିଥିବା ବେଳେ ଭୋଜି ପାଇଁ ଆୟୋଜନ ଚାଲିଥିଲା। ଏସମ୍ପର୍କରେ କୌଣସି ସୂତ୍ରରୁ ବ୍ଲକ ସମନ୍ବିତ ଶିଶୁ ସୁରକ୍ଷା କମିଟିକୁ ସୂଚନା ମିଳିଥିଲା। ପରେ ବ୍ଲକ ସମନ୍ବିତ ଶିଶୁ ସୁରକ୍ଷା ଅଧିକାରିଣୀ ମନୋରମା ସ୍ବାଇଁଙ୍କ ସମେତ ଜମ୍ବୁ ମେରାଇନ ପୋଲିସ ପକ୍ଷରୁ ବର ଓ କନ୍ୟା ଘରେ ଚଢ଼ାଉ କରାଯାଇ ବାହାଘରକୁ ବନ୍ଦ କରି ଦିଆଯାଇଥିଲା। ଉଭୟ ବର ଓ କନ୍ୟାଙ୍କ ବିବାହ ବୟସ ହୋଇ ନ ଥିବାରୁ ପ୍ରଶାସନ ପକ୍ଷରୁ ସେମାନଙ୍କ ଅଭିଭାବକଙ୍କଠାରୁ ଏକ ଲିଖିତନାମା ଗ୍ରହଣ କରାଯାଇଛି। ଆସନ୍ତା ୨ ଦିନ ମଧ୍ୟରେ ଉଭୟ ପରିବାରକୁ ଶିଶୁ ସୁରକ୍ଷା କମିଟି ନିକଟରେ ଉପସ୍ଥିତ ରହି ସେମାନଙ୍କ ବୟସ ପ୍ରମାଣ ପତ୍ର ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ଚଢ଼ାଉ ସମୟରେ ଉକ୍ତ ଅଞ୍ଚଳରେ ଅନ୍ୟ ଜଣେ ନାବାଳିକାଙ୍କୁ ପ୍ରେମିକ ଘରେ ଗତ ୨ ମାସେ ହେବ ରହୁଥିବା ଦେଖି କମିଟି ପକ୍ଷରୁ ପ୍ରଶ୍ନ କରାଯାଇଥିଲା। ମାତ୍ର କୌଣସି ସନ୍ତୋଷଜନକ ଉତ୍ତର ନ ମିଳିବାରୁ ପ୍ରଶାସନ ପକ୍ଷରୁ ତାଙ୍କୁ ଉଠାଇ ନିଆଯାଇଛି। ନାବାଳିକା ଜଣକ ଏବେ ମାଟ୍ରିକ ପରୀକ୍ଷା ଦେଇଥିବା ସୂଚନା ମିଳିଛି। ଏହି ଚଢ଼ାଉ ସମୟରେ ଜିଲା ସୁରକ୍ଷା କମିଟିର ପ୍ରବେସନ ଅଫିସର ବିବେକାନନ୍ଦ ଅତବୁଦ୍ଧି, ପରମର୍ଶଦାତା କନକଲତା ବେହେରା, ଅନନ୍ତ କିଶୋର ବେହେରା, ଜମ୍ବୁ ମେରାଇନ୍ ଥାନା ସବ୍ ଇନ୍ସ୍ପେକ୍ଟର ପବିତ୍ର କୁମାର ପଟ୍ଟନାୟକ ଓ ଅଙ୍ଗନଓ୍ବାଡି କର୍ମୀ ପାର୍ବତୀ ରାୟ ପ୍ରମୁଖ ଉପସ୍ଥିତ ଥିଲେ।
