ଭୁବନେଶ୍ୱର,୧ା୫ (ବ୍ୟୁରୋ)- ମାଡ଼ି ଆସୁଛି ବାତ୍ୟା ‘ଫନୀ’। ଏହା ୩ ତାରିଖରେ ପୁରୀ ନିକଟରେ ସ୍ଥଳଭାଗ ଛୁଇଁ ଉପକୂଳ ଓଡ଼ିଶାରେ ତାଣ୍ଡବ ରଚାଇବ। ଜାତୀୟ ପାଣିପାଗ ବିଭାଗ ଏନେଇ ସତର୍କ କରାଇବା ପରେ ଏହାର ମୁକାବିଲା ପାଇଁ ଅଗ୍ନିଶମ ବିଭାଗ ପୂରା ପ୍ରସ୍ତୁତ ରହିଛି। ଏଥିପାଇଁ ଅଗ୍ନିଶମ ବିଭାଗର ସମସ୍ତ ଅଧିକାରୀ ଓ କର୍ମଚାରୀଙ୍କ ଛୁଟି ବାତିଲ କରାଯାଇଛି। ଯେଉଁମାନେ ଛୁଟିରେ ଅଛନ୍ତି ସେମାନଙ୍କୁ ତୁରନ୍ତ କାର୍ଯ୍ୟରେ ଯୋଗଦେବାକୁ ନିର୍ଦ୍ଦେଶ ଦିଆଯାଇଛି ବୋଲି ଅଗ୍ନିଶମ ଡିଜି ବି.କେ ଶର୍ମା ସୂଚନା ଦେଇଛନ୍ତି।
ଶର୍ମା କହିଛନ୍ତି, ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ସମସ୍ତ ସରଞ୍ଜାମ ପ୍ରସ୍ତୁତ କରି ରଖାଯାଇଛି। ଜେନେରେଟର, ଲାଇଟ୍, ଗଛକଟା ସରଞ୍ଜାମ ସମେତ ଉଦ୍ଧାର କାର୍ଯ୍ୟରେ ଆବଶ୍ୟକ ସାମଗ୍ରୀ ମହଜୁଦ ରହିଛି। ପୁରୀ, ଖୋର୍ଦ୍ଧା, ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକ, ଯାଜପୁର ଓ ବାଲେଶ୍ୱର ଆଦି ୯ ଜିଲାରେ ବ୍ୟାପକ କ୍ଷୟକ୍ଷତି ଘଟିବ। ବିଶେଷ କରି ପୁରୁଣା ପକ୍କାଘର ଭୁଶୁଡିବା ସହ ବିଜୁଳି ଖୁଣ୍ଟ ଓ ଏକାଧିକ ଗଛ ଉପୁଡ଼ିବାର ଆଶଙ୍କା କରାଯାଇଛି। ତେଣୁ ବାତ୍ୟା ସମୟରେ ଓ ପରେ ଆବଶ୍ୟକ ପଦକ୍ଷେପ ନେବାକୁ ଅଗ୍ନିଶମ କର୍ମଚାରୀ ପ୍ରସ୍ତୁତ ଅଛନ୍ତି। ବିଶେଷକରି ଉପକୂଳ ଅଞ୍ଚଳକୁ ଅଗ୍ନିଶମ ବିଭାଗ ବିଶେଷ ଗୁରୁତ୍ୱ ଦେଇଛି। ୨ହଜାର କର୍ମଚାରୀ ପ୍ରସ୍ତୁତ ହୋଇ ରହିଥିବାବେଳେ ବାତ୍ୟା ଆଶଙ୍କା ନ ଥିବା ଜିଲାରୁ ମଧ୍ୟ ଅଗ୍ନିଶମ କର୍ମଚାରୀଙ୍କୁ ଅଣାଯାଇଛି। ମଙ୍ଗଳବାର ରାତି ସୁଦ୍ଧା ସ୍ବତନ୍ତ୍ର ଟିମ୍କୁ ଆବଶ୍ୟକ ସରଞ୍ଜାମ ସହ ଉପକୂଳବର୍ତ୍ତୀ ଅଞ୍ଚଳକୁ ପଠାଯାଇଛି। ସେହିଭଳି କଟକ ଓ ଭୁବନେଶ୍ୱରରେ ସ୍ବତନ୍ତ୍ର ଟିମ୍ଗୁଡ଼ିକ ପ୍ରସ୍ତୁତ ହୋଇ ରହିଛନ୍ତି। ବୁଧବାରଠାରୁ ସବୁ ଜିଲା ମୁଖ୍ୟାଳୟରେ ୨୪ଘଣ୍ଟିଆ କ୍ୟାମ୍ପ୍ ଖୋଲିବ। ଦାୟିତ୍ୱରେ ଥିବା ବରିଷ୍ଠ ଅଧିକାରୀମାନେ ଉଦ୍ଧାର ଓ ରିଲିଫ୍ କାର୍ଯ୍ୟ ଉପରେ ନଜର ରଖିବା ସହ ପରିସ୍ଥିତିର ସମୀକ୍ଷା କରିବେ। ବାତ୍ୟା ପରେ ଭାଙ୍ଗିଯାଇଥିବା ଗଛ ଓ ବିଦ୍ୟୁତ୍ ଖୁଣ୍ଟକୁ ରାସ୍ତାରୁ ହଟାଇ ଯାତାୟାତକୁ ସ୍ବାଭାବିକ କରିବେ। ଅଧିକ କ୍ଷୟକ୍ଷତି ହୋଇଥିବା ଜିଲାରେ ତୁରନ୍ତ ଉଦ୍ଧାର କାର୍ଯ୍ୟକୁ ତ୍ୱରାନ୍ବିତ କରିବା ସହ ରିଲିଫ ଯୋଗାଇ ଦିଆଯିବ। ବାତ୍ୟା ପ୍ରଭାବରେ ସମୁଦ୍ରରୁ ଉଚ୍ଚ ଜୁଆର ଉଠିବାର ସମ୍ଭାବନା ରହିଥିବାରୁ ଉପକୂଳ ତଳିଆ ଅଞ୍ଚଳରେ ରହୁଥିବା ଲୋକଙ୍କୁ ବାତ୍ୟା ଆଶ୍ରୟସ୍ଥଳୀକୁ ନେବା କାର୍ଯ୍ୟରେ ଅଗ୍ନିଶମ କର୍ମଚାରୀ ସହଯୋଗ କରିବେ। ଏଥିସହ ୨୦ ଓଡ୍ରାଫ ଓ ୧୨ ଏନ୍୍ଡିଆର୍ଏଫ୍ ଟିମ୍ ନିୟୋଜିତ ହେବେ ବୋଲି ଅଗ୍ନିଶମ ଡିଜି ଶର୍ମା ସୂଚନା ଦେଇଛନ୍ତି।
