ପ୍ରେମିକଙ୍କ ବିରୋଧରେ ନିର୍ଯାତନା ଅଭିଯୋଗ
8:46 amAugust 11, 2019 / 21

ଭାପୁର, ୧୧।୮(ଡି.ଏନ୍‌.ଏ.) – ଢେଙ୍କାନାଳ ସଦର ଥାନା ଭାପୁର ଫାଣ୍ଡି ଅଧୀନ ଜରିପାଳ ଛକରୁ ଜଣେ ଅସହାୟ ଯୁବତୀ (୧୮ବର୍ଷ)ଙ୍କୁ ଶନିବାର ପୋଲିସ ଉଦ୍ଧାର କରିଛି। ସମ୍ପୃକ୍ତ ଯୁବତୀ ଜଣକ ପ୍ରେମିକଙ୍କ ଦ୍ୱାରା ନିର୍ଯାତନାର ଶିକାର ହୋଇଥିବା କହିଛନ୍ତି। ଏ ନେଇ ଥାନାରେ ମାମଲା ରୁଜୁ ହୋଇଛି। ଖବର ଲେଖାଯିବା ସୁଦ୍ଧା ଅଭିଯୁକ୍ତ ଫେରାର ଥିବାବେଳେ ପୋଲିସ ତଦନ୍ତ ଆରମ୍ଭ କରିଛି। ଯୁବତୀ ଜଣକ ଇତଃସ୍ତତଃ ଭାବେ ବୁଲୁଥିବା ଦେଖି ଗ୍ରାମବାସୀଙ୍କ ସନ୍ଦେହ ହୋଇଥିଲା। ଏ ନେଇ ସେମାନେ ପୋଲିସକୁ ସୂଚନା ଦେଇଥିଲେ। ପ୍ରଥମେ ଯୁବତୀଜଣକ ନିଜକୁ ତିଗିରିଆ ଅଞ୍ଚଳର ବାସିନ୍ଦା ବୋଲି ପରିଚୟ ଦେଇଥିଲେ। ଘରୁ ରାଗି ପଳାଇ ଆସିଥିବାରୁ ଘର ଲୋକେ ତାଙ୍କୁ ଗ୍ରହଣ କରୁ ନ ଥିବା କହିଥିଲେ। ଏହାକୁ ନେଇ ସନ୍ଦେହ ଉପୁଜିଥିଲା। ପୋଲିସଠାରୁ ସୂଚନା ପାଇ ପୂର୍ବାହ୍ନ ୯ଟାରେ ଘର ଲୋକେ ପହଞ୍ଚତ୍ବା ପରେ ପ୍ରକୃତ କଥା ପଦାକୁ ଆସିଥିଲା। ପୋଲିସ ସୂଚନା ଅନୁଯାୟୀ, ସମ୍ପୃକ୍ତ ଯୁବତୀଙ୍କ ସହ କଦଳୀପାଳ ଗ୍ରାମର ଦୁଷ୍ମନ୍ତ ନାଏକଙ୍କ ପ୍ରେମ ସମ୍ପର୍କ ଗଢ଼ିଉଠିଥିଲା। ୨୦୧୬ରେ ସେ ଘର ଛାଡ଼ି ତାଙ୍କ ସହ ପଳାଇ ଆସିଥିଲେ। ହେଲେ ନାବାଳିକା ହୋଇଥିବାରୁ ଉକ୍ତ ସମୟରେ ମୁନିଗୁଡ଼ା ଥାନାରେ ଏକ ମାମଲା ରୁଜୁ ହୋଇଥିଲା। ଅଭିଯୁକ୍ତ ଯୁବକ ଗିରଫ ହୋଇଥିଲେ। ଏହାପରେ ନାବାଳିକା ସ୍ବଧାର ଗୃହରେ ରହୁଥିଲେ। ଦୁଷ୍ମନ୍ତ ଜେଲରୁ ଫେରିବା ପରେ ୭ମାସ ହେଲା ଉଭୟେ କଳଦୀପାଳ ଗ୍ରାମରେ ରହୁଥିଲେ। ଶୁକ୍ରବାର ରାତିରେ ଯୁବକ ଜଣକ ମାଡ଼ ମାରିବାରୁ ଯୁବତୀଜଣକ ଭୟରେ ଘରୁ ପଳାଇ ଆସି ରାତିସାରା ଏକ ବୁଦାମୂଳେ ଲୁଚି ରହିଥିଲେ। ସକାଳୁ ଜରିପାଳ ଛକରେ ଅସହାୟ ଅବସ୍ଥାରେ ବୁଲୁଥିବାବେଳେ ଅଞ୍ଚଳବାସୀଙ୍କଠାରୁ ସୂଚନା ପାଇ ପୋଲିସ ତାଙ୍କୁ ଉଦ୍ଧାର କରି ପରିବାର ଲୋକଙ୍କ ଜିମା ଦେଇଥିଲା। ରାସୋଳ ଥାନା ଅଞ୍ଚଳରେ ଘଟଣା ଘଟିଥିବାରୁ ଯୁବତୀ ଜଣକ ସେଠାକାର ପୋଲିସ ନିକଟରେ ଅଭିଯୋଗ କରିଛନ୍ତି।