ଗୋପ, ୨୬।୭(ଡି.ଏନ୍.ଏ.) : ଓଡ଼ିଶା ଜୀବିକା ମିଶନ ଜରିଆରେ ଗୋପ ବ୍ଲକର ୩୧ଟି ପଞ୍ଚାୟତ ପାଇଁ ପ୍ରାଣୀ ମିତ୍ର ଓ କୃଷି ମିତ୍ର ପଦବୀ ଲାଗି ବିଜ୍ଞପ୍ତି ପ୍ରକାଶ ପାଇଥିଲା। ମାତ୍ର ଏଥିପାଇଁ ଆରମ୍ଭରୁ ଅନିୟମିତତା ହୋଇଥିବା ଦେଖାଦେଇଛି। ଗୋପ ଜୀବିକା ମିଶନର ପ୍ରକଳ୍ପ ପରିଚାଳିକା ଗତ ୧ ତାରିଖରେ ବ୍ଲକ୍ର ବଉଳାଙ୍ଗ, ଏରବଙ୍ଗ ଏବଂ ଧୂମାଳ ପଞ୍ଚାୟତରେ ଏଥିପାଇଁ ପରୀକ୍ଷା କରିଥିଲେ ମଧ୍ୟ ଏପର୍ଯ୍ୟନ୍ତ ଫଳାଫଳ ପ୍ରକାଶ ହୋଇନାହିଁ। ଫଳରେ ଆଶାୟୀ ପ୍ରାର୍ଥୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଓଡ଼ିଶା ଜୀବିକା ମିଶନ ତରଫରୁ ଗୋପ ବ୍ଲକ୍ର ୩୧ଟି ପଞ୍ଚାୟତ ପାଇଁ ୬୨ଟି ପ୍ରାଣୀ ମିତ୍ର, ୯୩ଟି କୃଷି ମିତ୍ର ଓ ୩୧ଟି ସିଆର୍ପି ପଦ ପାଇଁ ବିଜ୍ଞପ୍ତି ପ୍ରକାଶ ପାଇଥିଲା। ପଞ୍ଚାୟତ ମହିଳା ମହାସଂଘ ଜରିଆରେ ଶହ ଶହ ଆଶାୟୀ ଆବେଦନ କରିଥିଲେ। ପରୀକ୍ଷା ସରିବା ମାତ୍ରେ ସଙ୍ଗେ ସଙ୍ଗେ ଫଳ ପ୍ରକାଶିତ କରି ଚୟନ ହୋଇଥିବା ପ୍ରାର୍ଥୀଙ୍କ ନାମ ଘୋଷଣା କରିବା ନିୟମ ରହିଛି। ମାତ୍ର ପରୀକ୍ଷା ପରେ ଖାତା ବ୍ଲକ କାର୍ଯ୍ୟାଳୟରେ ରହିଥିବାରୁ ଏଥିରେ ଅନିୟମିତତା ହୋଇଥିବା ନେଇ ଆଶାୟୀମାନେ ଅଭିଯୋଗ କରିଛନ୍ତି। ଏନେଇ ଆଶାୟୀମାନେ ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ରାଜ୍ୟ ସରକାର ରାଜ୍ୟର ଉନ୍ନତୀକରଣ ଓ ମହିଳା ସଶକ୍ତୀକରଣର ଠିକ୍ କାର୍ଯ୍ୟଧାରାକୁ ନେଇ ଏପରି ଏକ ଯୋଜନା ପ୍ରସ୍ତୁତ କରିଥିବାବେଳେ ବ୍ଲକ୍ରେ କାର୍ଯ୍ୟ କରୁଥିବା ଓଡ଼ିଶା ଜୀବିକା ମିଶନର ଅଧିକାରିଣୀମାନେ ଏହି ଯୋଜନାକୁ ଠିକ୍ ଭାବରେ ପରିଚାଳନା ନ କରିବାରୁ ସରକାରଙ୍କ ଯୋଜନା ବାଟବଣା ହେବାର ଆଶଙ୍କା ପ୍ରକାଶ ପାଇଛି। ଏ ସମ୍ପର୍କରେ ଗୋପ ଜୀବିକା ମିଶନ ପ୍ରକଳ୍ପ ପରିଚାଳିକା ଦୀପାଳି ଛାଟୋଇଙ୍କୁ ପଚାରିବାରେ ପରୀକ୍ଷା କରାଯାଇଛି। ଖୁବ୍ ଶୀଘ୍ର ଫଳ ପ୍ରକାଶ କରାଯିବ ବୋଲି କହିଥିଲେ।
