ଜୟପୁର,୧୭ା୮: ବହୁଚର୍ଚ୍ଚିତ ପେହଲୁ ଖାନ୍ ଭିଡ଼ହିଂସା ମାମଲାରେ ତଳକୋର୍ଟ ସମସ୍ତ ୬ ଅଭିଯୁକ୍ତଙ୍କୁ ଦୋଷମୁକ୍ତ କରିଦେବା ଘଟଣାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇବା ପରେ ରାଜସ୍ଥାନ ସରକାର ଘଟଣାର ପୁନଃ ତଦନ୍ତ ନିର୍ଦ୍ଦେଶ ଦେଇଛନ୍ତି। ଅତିରିକ୍ତ ଜିଲା ଜଜ୍ କୋର୍ଟର ଏହି ରାୟ ବିରୋଧରେ ରାଜ୍ୟ ସରକାର ଅପିଲ୍ କରିବେ ବୋଲି ବୁଧବାର ମୁଖ୍ୟମନ୍ତ୍ରୀ ଅଶୋକ ଗେହଲଟ କହିଥିଲେ।
୨୦୧୭ ଏପ୍ରିଲରେ ହରିୟାଣାର ୫୫ ବର୍ଷୀୟ ପେହଲୁ ଗୋରୁ କିଣି ଦିଲ୍ଲୀ-ଅଲଓ୍ବର ଜାତୀୟ ରାଜପଥରେ ଆସୁଥିବାବେଳେ ନିଜକୁ ଗୋସୁରକ୍ଷା କର୍ମୀ କହୁଥିବା କିଛି ଲୋକ ତାଙ୍କୁ ଅଟକାଇ ମାଡ଼ ମାରିଥିଲେ। ଦୁଇଦିନ ପରେ ହସ୍ପିଟାଲରେ ପେହଲୁଙ୍କ ମୃତ୍ୟୁ ଘଟିଥିଲା। ଏହି ଭିଡ଼ହିଂସା ଘଟଣାର ୬ ଅଭିଯୁକ୍ତ ବିପିନ ଯାଦବ, ରବୀନ୍ଦ୍ର କୁମାର, କାଲୁରାମ୍, ଦୟାନନ୍ଦ, ଯୋଗେଶ କୁମାର ଏବଂ ଭୀମ ରାଠିଙ୍କ ବିରୋଧରେ ଚାର୍ଜଶିଟ୍ ଦାଖଲ ହୋଇଥିଲା। ତେବେ ପ୍ରମାଣ ଅଭାବରୁ କୋର୍ଟ ସେମାନଙ୍କୁ ଦୋଷମୁକ୍ତ କରିଥିଲେ। ଆକ୍ରମଣ ଦୃଶ୍ୟର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଆକ୍ରମଣକାରୀଙ୍କୁ ନିର୍ଦ୍ଦୋଷରେ ଖଲାସ କରାଯିବା ଘଟଣାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି। ପୋଲିସ ତଦନ୍ତରେ ବହୁ ତ୍ରୁଟି ରହିଥିବା କୋର୍ଟ ତାଙ୍କ ରାୟରେ କହିଥିଲେ। ଯେଉଁ ମୋବାଇଲ ଫୋନ୍ରେ ଆକ୍ରମଣ ସମୟର ଭିଡିଓ ପ୍ରସ୍ତୁତ ହୋଇଥିଲା ପୋଲିସ ତାହାକୁ ଜବତ କରିନାହିଁ। ସେହିପରି ଭିଡିଓକୁ ଫୋରେନ୍ସିକ ଲାବ୍କୁ ପରୀକ୍ଷା ପାଇଁ ପଠାଯାଇନାହିଁ ଓ ଅଭିଯୁକ୍ତମାନଙ୍କୁ ଚିହ୍ନଟ କରିବା ଲାଗି ସାକ୍ଷୀମାନଙ୍କୁ ସୁଯୋଗ ଦିଆଯାଇ ନାହିଁ। ସବୁଠୁ ଗୁରୁତ୍ୱପୂର୍ଣ୍ଣ ହେଲା, ପେହଲୁଙ୍କ ମୃତ୍ୟୁକାଳୀନ ଜମାନବନ୍ଦୀ ମଧ୍ୟ ପୋଲିସ ଠିକ୍ ଭାବେ ରେକର୍ଡ କରି ନ ଥିବା ଅଦାଲତ କହିଛନ୍ତି।
