ନୟାଗଡ଼ ଅଫିସ,୧୬ା୭-ନୟାଗଡରେ ସୋମବାର ପୃଥକ ସ୍ଥାନରେ ବିଦ୍ୟୁତ୍ ଦୁର୍ଘଟଣାରେ ଅଭାବନୀୟ ପରିସ୍ଥିତି ସୃଷ୍ଟି ହୋଇଛି। ବିଦ୍ୟୁତ୍ ସଂସ୍ପର୍ଶରେ ଆସି ନୟାଗଡ଼ ପୁରୁଣା ସହରର ଜଣେ ଲାଇନ୍ମ୍ୟାନ୍ଙ୍କ ମୃତ୍ୟୁ ଘଟିଥିବାବେଳେ ଶରଣକୁଳ ଥାନା ଗୋଡ଼ିପଡ଼ା ଧୁସୁମା ଗ୍ରାମର ଜଣେ ଶ୍ରମିକ ଗୁରୁତର ହୋଇଛନ୍ତି। ମୃତ ଲାଇନ୍ମ୍ୟାନ ହେଲେ ପ୍ରଭାତ କୁମାର ଦାସ(୪୦)। ଗୁରୁତର ଶ୍ରମିକ ହେଲେ ଶରତ ଜେନା।
ପ୍ରକାଶ ଯେ, ପ୍ରଭାତ ସେସୁ ଅନ୍ତର୍ଗତ ମହିପୁର ବିଦ୍ୟୁତ ସେକ୍ସନରେ ଲାଇନ୍ମ୍ୟାନ ଭାବେ କାର୍ଯ୍ୟ କରୁଥିଲେ। ସୋମବାର ଅପରାହ୍ନରେ ପ୍ରଭାତ ନୂଆଗାଁ ବ୍ଳକ ଗାତେରୀ ଗ୍ରାମ ନିକଟରେ ୧୧ କେଭି ବିଦ୍ୟୁତ୍ ତାର ଟାଣୁଥିଲେ। ଏହି ସମୟରେ ବିଦ୍ୟୁତ୍ ସଂଯୋଗ ହେବାରୁ ସେ ତଳେ ପଡ଼ି ଯାଇ ଗୁରୁତର ହୋଇଥିଲେ। ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା। ସେଠାରେ ଡ଼ାକ୍ତର ପ୍ରଭାତଙ୍କୁ ମୃତ ଘୋଷଣା କରିଥିଲେ। ରାତି ହୋଇ ଯାଇଥିବାରୁ ଡାକ୍ତରଖାନା ପକ୍ଷରୁ ଶବ ବ୍ୟବଚ୍ଛେଦ ପାଇଁ ମନା କରାଯାଇଥିବାବେଳେ ବ୍ୟବଚ୍ଛେଦ ପାଇଁ ଲୋକେ ଜିଦ୍ ଧରିଥିଲେ। ଏ ନେଇ ରାତି ୧୦ଟା ସୁଦ୍ଧା ରିପୋର୍ଟ ଲେଖା ହେବା ଯାଏଁ ଛକାପଞ୍ଝା ଲାଗି ରହିଛି।
ଶରଣକୁଳ ଥାନା ଗୋଡ଼ିପଡ଼ା ଧୁସୁମା ଗ୍ରାମର ଶରତ ଜେନା ଜଣେ ବିଦ୍ୟୁତ ଠିକାଦାରଙ୍କ ପାଖରେ ଶ୍ରମିକ ଭାବେ କାମ କରନ୍ତି। ସୋମବାର ତାଙ୍କ ଗ୍ରାମରେ ପଞ୍ଚାୟତ ତରଫରୁ ସମସ୍ତ ବିଦ୍ୟତ ଖୁଣ୍ଟିରେ ଏଲଇଡ଼ି ବଲବ୍ ଲଗାଇବା କାର୍ଯ୍ୟ ହେଉଥିଲା। ସେ ଏକ ଖୁଣ୍ଟିରେ ଚଢ଼ି ବଲବ୍ ଲଗାଉଥିଲେ,ଏହି ସମୟରେ କେହି ଜଣେ ବିଦ୍ୟୁତ୍ ସଂଯୋଗ କରି ଦେଇଥିଲା। ଫଳରେ ଶରତ ବିଦ୍ୟୁତ୍ ଆଘାତ ପାଇ ତଳେ ପଡ଼ି ଯାଇଥିଲେ। ସେଠାରୁ ଲୋକମାନେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଶରତଙ୍କ ଶରୀରର ପ୍ରାୟ ୫୦ ପ୍ରତିଶତ ପୋଡ଼ି ଯାଇଛି।
