ପାରାଦୀପ ଜାହାଜରେ ବିଦେଶୀ ନାଗରିକଙ୍କ ଅସ୍ବାଭାବିକ ମୃତ୍ୟୁ
5:11 pmMarch 16, 2020 / 43

ପାରାଦୀପ, ୧୬।୩(ସ୍ବ.ପ୍ର.): ପାରାଦୀପ ବନ୍ଦର ଆଙ୍କରେଜ ଏରିଆରେ ଥିବା ଏକ ପଣ୍ୟବାହୀ ଜାହାଜରେ ସୋମବାର ଜଣେ ୟୁକ୍ରେନ୍‌ ନାଗରିକଙ୍କର ଅସ୍ବାଭାବିକ ମୃତ୍ୟୁ ଘଟିଛି। ସେ ହେଲେ ଜାହାଜ କ୍ୟାପ୍‌ଟେନ ୟୁଦିନ ବିଟାଲୀ(୪୭)। ଏହା ଜଣାପଡ଼ିବା ପରେ ପୋର୍ଟ ପିଏଚ୍‌ଓ(ପୋର୍ଟ ହେଲ୍ପ ଅଫିସ) ପକ୍ଷରୁ ସ୍ବତନ୍ତ୍ର ଟିମ୍‌ ଘଟଣାସ୍ଥଳକୁ ଯାଇଛନ୍ତି। ମୃତଦେହ ବ୍ୟବଚ୍ଛେଦ ନିମନ୍ତେ ପଠାଯାଇଛି।
ୟୁଏଇରୁ ଆସିଥିବା ଏମ୍‌ଭି ନିୟୁ ଡେଷ୍ଟିନ ନାମକ ଜାହାଜ ପାରାଦୀପ ବନ୍ଦରରୁ ଲୁହାପଥର ବୋଝେଇକରି ଚାଇନା ଅଭିମୁଖେ ଯିବାର ଥିବା ପୋର୍ଟ ଡିଟିଆଇ(ଡେଲି ଟ୍ରାଫିକ ରିପୋର୍ଟ) ରୁ ଜଣାଯାଇଛି। ତେବେ ମୃତ୍ୟୁର କାରଣ ସ୍ପଷ୍ଟ ହୋଇ ନ ଥିବା ବେଳେ ଏହା ହୃଦ୍‌ଘାତଜନିତ ବୋଲି କୁହାଯାଉଛି।